Habakuki 3 - U TIENU MAAMA TILI 2013

Habakuki n mia o Diedo yaala 3 Habakuki miabu

¹ O Diedo saawalipualo Habakuki n mia o Diedo yaa miabu i wanli nni.

² O Diedo, n gbadi ke bi togidi Ŋan den tieni yaala ke i jeje cuo nni. Moala, go tieni timo yaa yogunu ne laa tuona buolu, Ki teni bi niba n bandi a. Ba a pabienli nni ŋan gbadi ti po mi ninñima.

³ O Diedo ñani Temani ki kpendi, O Diedo yua n gagidi ki ŋani, Ñani Paran juana po ki kpendi. Joma Tanpoli gbie leni o kpiagidi, Ki tinga mo gbie leni o pagidi.

⁴ O kpendi leni mi yenma boncianla, Mi yenma ña o nuu nni Ki tuodi nani u yienu yeni, O paalu wuo lankane.

⁵ O yen soani i yianbiadipuodike o liiga, Mi bolinma mo yaa ŋua o puoli.

⁶ O yaa sedi ki tinga yen digibi, O yaa diidi i nibuoli, se yin yaa digibi ti jawaandi po. Hali u yogu nni joaciama yen digibi. Hali u yogu nni joabila yen ñuani. Ŋani ya n tie wan den tagi yaa sani hali yogu.

⁷ N den laa ke Kusani yaaba gbandiena bia fanma, Ke Madiani yaaba mo yaa diedi digibi ti jawaandi po.

⁸ O Diedo, naani i kpenciami n fiini a pali? Naani a pali beni i kpenciami po yo? Naani mi ñincianma n teni ke a pali fii? A den jagi ti tawadi nani ku toateligu yeni, Ki baa koani ki paadi.

⁹ A kpali a dabanli, Ke a piemi mo tie a maama. Joma A budi ki tinga ke i kpeni tiini.

¹⁰ A juana laa ŋa ki digibi. Mi ñima ña tanpoli ki cuudi ki tinga po. Mi ñincianma fu ki fiindi a ñinguona Ke a pua ki yugi hali tanpoli.

¹¹ A toani a piemi ke i pelini, Ki lugidi a kpaanli mo ke li ñuliti ki tuodi. U yienu leni o ŋmaalo jidi bi cenli Ki se kaanyendu.

¹² A pali fii ke a goadi ki tinga nni, Ki ŋmaa ki midi i nibuoli Kelima a pabienli po.

¹³ A ñani ki baa faabi a niba, Ki baa faabi ŋan den gandi yaa bado. A pua ki guli bi nibiadiba diedi, Ki bolini bi diedi cain. Joma

¹⁴ A muudi ki cibidi yibalinba yudanba yula Leni bani bi ba yaa piemi. Bi den fii nani ku tafaaciangu, Ki jaligi ki kpendi ki bua ki yadi ti, Ki kuudi leni li pamanli, Ki bua ki bolini ŋasiili nni yaa niba n ki pia paalu.

¹⁵ A jagi a taami ki gaandi mi ñincianma po, Ki fiindi a ñingociama.

¹⁶ N den gbadi lani kuli, Ke n tugusoama sani. N ñoacuuna jeli kelima ti jawaandi po. N gbanu wudi, N taana digibi. N ŋmini ki guu li pabiidili daali, Tin baa gedi ki baa yaaba n mabindi ti yeni yaa daali.

¹⁷ I kankandi kan go tieni puuma. I duventiidi kan luoni. Olivie tiidi kan luoni liba kuli. Kpaangu kan tieni i kuani nni. I pe kuli baa bodi a yanlola nni, I ne mo n bodi i naapagi nni.

¹⁸ Ba leni lani kuli, N baa yaa mangidi n pali o Diedo po. N baa yaa mangidi n pali Kelima n faabima Tienu po.

¹⁹ O Diedo, n Diedo n tie n fidu. O teni ke n taana yua nani o kabilo yeni, Ke n cuoni yaa juana n kpedi po. Bi yanyinba yudaano yani siiga yanbu, ban yiini yaabu leni ti gogiditi.