Habakuki 1 - U TIENU MAAMA TILI 2013

Habakuki leni o Diedo booli 1.1—2.1 Habakuki yenbidi kelima Isidayeli tuonbiadi po

¹ O Diedo n den doagidi o saawalipualo Habakuki po yaala li bonlekaala nni.

² «O Diedo, n baa yaa kpaani ki miadi a todima, Hali ki ban tuoni u laa yogunu yo, ŋan cengi nni? N baa yaa kpaani ki miadi a Ki ban tuoni u laa yogunu yo, Ŋan faabi ti yaaba n faligidi ti nuu nni?

³ Be yaa po ke a teni ke n laadi Yaa yebiadima n tie ne? Be yaa po ke a ŋmini ki nua Ke bi niba tiendi yaala n ki ŋani? Mii nua kuli bontoala yaaba n gaani Ki lindi nni siiga se mabinga leni paalu, Koana leni niama n ye i kaani kuli.

⁴ Bi niba ki go ŋua li bali maama. Bi bujiaba ja yaa bujiali n ki tiegi. Bi nibiadiba baadi i moamoani Ki ŋaani bi niteginkaaba. Li tie lani yaa po yo ke li bujiali ki go pia fuoma.»

U Tienu maguankaama

⁵ «Yi yaa diidi i nilanbuoli siiga, Li pakili baa cuo yi hali yi gbani n wudi, Kelima n tieni bonla moala ne, Yaala ke bi yaa bi togidi yi, yi kan daani la.

⁶ N baa teni Kalide yaaba n baa u paalu, Bani yaa nibuolu n bia kaa gba ninñima yeni. Bi baa goadi mi tinfanma nni, Ki fie ban kaa die yaa tinmu.

⁷ I kaani kuli i nibuoli jie ba ki digibi bi nintuali. Bani n biliti bi bali maama bi yula po.

⁸ Bi taami jaligi mi nuama ki cie i naamunpieni. Bi ciba bia mo nani yaa fuasangbanli n goadi ku ñiagu yeni. Bi tanjagiba ñani hali foagima ki kpendi. Bi jaligi nani jiebani n yen poli ki ña tanpoli maama, Ki baa pua li bonla yeni.

⁹ Bi toagola tiini ke bi nunmu cuubi lipo ki bia. Bi kpendi ki baa tieni u paalu Leni mi biadima ki diedi yuakuli. Ban cuo ki taani yaa yonbi yabi Nani mi ñincianma kani tanbiima yeni.

¹⁰ Bi fali bi badiba ki ñuadi a koanbala. Laa pia kuli yaa dogu yaa bilinciamu n baa sieni ba. Bi yen dogini mi tama ki kandi ki kua, Ki baa i dogi ki diedi yi yendu yendu.

¹¹ Bi pendi tontoni nani ku tafaaciangu yeni. Bi tieni ti tuonbiadi kelima bi dugi bi paalu po, Ki nua ke bi fidu n tie bi tienu.»

Habakuki go mia o Diedo

¹² Naani fini ka li tie o Diedo hali mi cilima? Naani fini ka li tie n Tienu yua n Gagidi ki ŋani, Ke a miali mo ki pia bianu? O Diedo, a gandi Kalide yaaba ki puni ba u paalu, Ke ban tundi ti leni tundifala. Ama fini n tie ti faabima tangu.

¹³ Ama a gagidi ki ŋani boncianla, Hali yaala ke a kan fidi ki yaa nua yaa bonla n bia. A kan fidi ki yaa nua fala ki ŋmini. Lanwani, be yaa po ke a baa yaa ŋmini Ki nua yaaba n janbidi bi lieba? Be yaa po ke bi nibiadiba yaa bolindi Yaaba n tiegi ki cie ba, A yen ŋmini kaa tua liba?

¹⁴ Be yaa po ke a tuuni bi nisaaliba Nani i jami leni i bonfuodi yii n ki pia daano yeni?

¹⁵ Kalide yaaba co bi niba ti yonbidi, Nani ban co yaa jami leni ki jandiaga yeni. Bi co ba bi taali nni, Ki mangidi bi pala boncianla li po.

¹⁶ Lanwani, bi padi a pada bi taali yeni po, Ki juugi yaa sinma n pia u nuulumanu ki kpiagidi yi, Kelima yini n teni ke bi baadi Yaa jiema n yabi ki go mani mo.

¹⁷ Lanwani, naani bi baa gedi ki ban yaani bi taali, Ki guani ki yaa kpaani bi niba kaa gba ninñimiba?