Galati 6 - U TIENU MAAMA TILI 2013Tin yaa todi ti lieba 1 N kpiiba, bi yaa pigini o nilo ke o tiendi tuonbiadiba, yi siiga nni U Tienu Fuoma n gobidi yaaba n pegidi ki guani o leni mi dingima. Fangi a yuli ke a mo n da ti kua mi tulinma nni. 2 Yaa todi mani yiyaba leni yin tugi yaa tuga, yeni yi baa yaa tiendi Kilisiti bali maama n bili yaala. 3 O nilo yaa nua ke o tie bonmoanla, ki naa tie puu, o boandi o yuli. 4 Yuakuli n biigi o tuona oba. Lanwani, o yaa baa jigini o yuli li po, li kan yaa tie ke o cie o lielo ka. 5 Nilo kuli baa tugi o yaa tugiceli wani o ba. 6 Ban bangi yua U Tienu maama n boagidi wan pia yaala kuli leni yua n bangi o. 7 Yin da boandi mani yi yula, oba kan ñuadi U Tienu. O nilo baa yendi wan buli yaala. 8 Yua n buli o gbanandi bonbuakaala po, baa yendi o gbanandi bonbuakaala po mi bedima. Yua n buli U Tienu Fuoma Yua n bua yaala, baa yendi U Tienu Fuoma po yaa miali n kan gbeni. 9 Tin da coagi leni a tuonŋama tienma, kelima ti yaa cedi, u yogunu yaa ti pundi, ti baa baa ti panpaani. 10 Lanwani, tin baa u sanu yaa yogunu kuli, tin yaa ŋanbidi bi niba kuli po, ki yaa ŋanbidi ti kpiiba li dandanli nni po ki cie. I tundijuodike 11 Diidi ki le mani min diani yi po yaa diani leni n nuceli n gbengi maama. 12 Yaaba n bua bi niba n yaa kpiagidi ba kuli tigini yi, ke yin kua ku koanciagu, ke bi niba n da wangi ba fala kelima Kilisiti dapoanpoanli po. 13 Ba bani yaaba n kua ku koanciagu, baa tiendi li bali maama n bili yaala. Ama bi nan bua ke yinba n kua ku koanciagu, ke ban baa u sanu ki kpiagi bi yula, kelima yaala n tieni yi gbanandi nni yaa po. 14 Ama mini, n kan tuo ki kpiagi n yuli bontoala kuli po, kali ti Diedo Jesu Kilisiti dapoanpoanli po. Kilisiti n den kpe li dapoanpoanli po yeni, ŋanduna bonla kuli tie n po nani li kpe, nmoko tie nani n kpe ŋanduna bonla kuli po yeni. 15 Yaala n pia mayuli naa tie ki kua ku koanciagu, bi ki da kua ka. Lani kuli ki tie liba, kali ki yaa tie nipaano. 16 Yaaba n tuo ki ŋua laa maama kuli, U Tienu n pa ba mi yanduanma, ki go gbadi bi po mi ninñima, bani U Tienu buolu Isidayeli yaaba yeni. 17 Moala liiga, oba kuli n da go yagi n yama, kelima n pia Kilisiti maalima n gbanandi nni. 18 N kpiiba, ti Diedo Jesu Kilisiti yaa ŋanbili n yaa ye leni yi! Amina! |
Gulmancema Protestant Bible © Bible Society of Burkina Faso, 2013.
Bible Society of Burkina Faso