Galati 5 - U TIENU MAAMA TILI 2013

U Tienu Fuoma Yua gobidima 5—6 Da go tua mani yonbi

¹ Kilisiti den faabi ti ke tin yaa die ti yula. Lani yaa po, sedi mani bonŋanla ki da go kuani yi yula ti yonbidi lolima nni.

² Cengi mani, mini Poli n yedi yi, ke yi yaa tuo ke bi kuani yi ku koanciagu, Kilisiti naa go pia yi po mayuli.

³ N go kadi ki waani yua n tuo ke bi kuani o ku koanciagu kuli, li baa yaa tie o po tiladi wan yaa tiendi li bali maama n bili yaala kuli.

⁴ Yinba yaaba n lingi li moamoansaali li bali maama nni, yi paadi leni Kilisiti, ki luo U Tienu ŋanbili.

⁵ Ama tinba, li tie li dandanli leni U Tienu Fuoma paalu po yo ke ti guu ki daani ke ti baa li moamoansaali.

⁶ Jesu Kilisiti nni, ki kua ku koanciagu, bi ki da kua ka pia mayuli, kali li dandanli yaali n doagidi mi buama nni.

⁷ Yi den cili ki tiini mi nuama bonŋanla. Ŋme n den pigini ki yie yi po, ke yii go tuo ki ŋua i moamoani?

⁸ Laa bonla naa ñani U Tienu yua n yini yi yaa kani.

⁹ «Li dabinli waamu bebe baa teni ti yonbudi kuli n pili.»

¹⁰ Mini yaa po, n pia yi po ti dugidi o Diedo nni, ke yi kan tuo ki tia bontoala po. Ama yua n lengidi yi yama, wan tie yua kuli, U Tienu baa bu ki cuo o.

¹¹ N kpiiba, li yaa bi tie ke n baa yaa wangi ke ku koanciagu tie tiladi, be yaa po ke bi go wangi nni fala? Li yaa bi tie yeni, li dapoanpoanli n cuani yaa tudima bodi.

¹² N bi bua ke yaaba n yagini yi yama leni ku koanciagu maama yeni, n jia ki fali biba.

¹³ N kpiiba, U Tienu den yini yi ke yin yaa die yi yula. Yin da taa laa yudiedima ki yaa tiendi yi gbanandi bonbuakaala. Ama, mi buama po, yin yaa tuuni ki todi yiyaba.

¹⁴ Li bali maama kuli taani mayenma nni, yaama n tie ne: «Ŋan bua a lielo nani ŋan bua a yuli maama yeni.»

¹⁵ Ama yi yaa ñii yiyaba ki go ŋmani yiyaba, fangi mani yi yula, ke yi baa bolini yiyaba.

Ti gbanandi yaa tuona leni U Tienu Fuoma Yua gobidima

¹⁶ Min yedi yi yaala tie line: Cedi mani U Tienu Fuoma n yaa gobidi yi. Lani, yi kan yaa go tiendi yi gbanandi bonbuakaala.

¹⁷ O nisaalo gbanandi n bua yaala nia leni U Tienu Fuoma n bua yaala. U Tienu Fuoma n bua yaala mo nia leni ti gbanandi n bua yaala. Li bonliedila yeni koani leni biyaba, ki teni ke yii fidi ki tiendi yin bua yaala.

¹⁸ U Tienu Fuoma yaa gobidi yi, li bali maama kaa go die yi.

¹⁹ To, o nisaalo gbanandi tuona doagidi. Lani n tie: mi conconma buoli kuli, ti joagindi, ti cagindi,

²⁰ i buli ŋoadima, u ñoagubiadu lingima, ti yibalindi, li koanli, li nunponli, li pabienli, mi niagima yantiali, mi paadima,

²¹ li nunponbiadili, li dañogaadili, ku nuagu leni laa bonbuoli kuli. N go tuodi ki waani yi nani min den kpa wani yi maama, ke yaaba n tiendi laa bonjoagindi buoli kan kua U Tienu diema nni.

²² Ama U Tienu Fuoma n baa cuani yaa bonluonkaala tie: mi buama, li pamanli, mi yanduanma, li juunli, mi ŋanma, ti bulicindi, ti dugidi, mi dingima leni li yukubili.

²³ Li bali maama naa koani leni laa bonla.

²⁴ Yaaba n tie Kilisiti yaaba joani ti gbanandi, ti yantiali leni ti bonbuakaala li dapoanpoanli po.

²⁵ U Tienu Fuoma yaa teni ke ti fo, tin go yaa cuoni kelima o po.

²⁶ Tin da gbengidi ti yula, ki da ñundi tiyaba li mutuoli, ki da pia li nunponbiadili tiyaba po.