Galati 4 - U TIENU MAAMA TILI 2013

¹ Diidi, n yedi ke hali o faajielo n da tie biwaaga yaa yogunu, waa paadi leni o yonbo, ba ke o die li bonla kuli.

² Wan da tie bonwaaga yeni yaa yogunu, o pia yaaba n die o ki go gobidi o piama, hali o baa n den bili yaa yogunu n baa ti pundi.

³ Li den tie yeni leni tinba tin den tie nani a bila yeni yaa yogunu, ke ŋanduna bogida den die ti.

⁴ Ama U Tienu n den bili yaa yogunu n pundi, o den soani o Bijua ŋanduna nni, ke o pua mali o, ke li bali maama n diedi o,

⁵ ke wan faabi li bali maama n die yaaba kuli, ke tin tua U Tienu bila, ki baa mu bimoanmu yaa bali.

⁶ Lani yaa po, yi tua U Tienu bijaba, wani U Tienu n den soani o Bijua Fuoma ti pala nni ke o kpaani ki tua U Tienu: «N Baa, n Baa!»

⁷ Lanwani, ŋaa go tie yonbo, a ji tie U Tienu bijua yo. Ŋan tie U Tienu bijua yeni, o baa pa ŋa wan bili o bila po yaa faali. Li tie U Tienu tuonle!

Poli yama lengidi Galati yaaba po

⁸ Yaa yogunu n pendi, yin ki den bani U Tienu yaa yogunu, yi den ŋua tientoe yii n ki tie U Tienu yeni, ki go tie bi yonbi.

⁹ Ama moala ke yi bandi U Tienu, bi ke U Tienu bani yi, be n teni ke yi lebidi ki go ŋua bi nisaaliba bogida, ya n tadi kaa pia mayuli, ki bua ki go tua laa bonla yonbi?

¹⁰ Yi gagidi danaba, ŋmaaliba, yoginiba leni binaba, ke likuli tua yi jaanma yogini.

¹¹ N jie ke daalinba min soani yaala yi siiga n da ti tua fanma fanma.

¹² N kpiiba, n mia yi ke yin tua nani mini n tie maama yeni, kelima nmoko tie nani yinba n tie maama yeni. Yii tudi n po ba waamu.

¹³ Yi bani ke li tie n yianu po yo, ke n den kpa baa u sanu, ki waani yi o Laabaaliŋamo.

¹⁴ Ba ke n tadingu yeni den tie yi po mi biigima, yii den fali nni ki sengi nni. Yi den gaa n cangu nani n tie U Tienu maleki yeni, nani n tie Jesu Kilisiti yeni.

¹⁵ Yin den pia yaa pamancianli yeni kua le? N tieni yi po siedi ke lanyogunu, li yaa den baa tuo, yi den baa logidi yi nunceli ki pa nni.

¹⁶ Naani min maadi yi i moamoani yeni n teni ke n ji tua yi yibali?

¹⁷ Yaaba n kpali ke bi bua yi yeni, jaga ki ŋani. Bi bua ke yin paadi leni nni ki ŋoadi bani.

¹⁸ To, li ŋani ke yin yaa pia li yankuali yaala n ŋani boncianla po yogunu kuli. Lan da tie min ye leni yi yaa yogunu bebe ka.

¹⁹ N bila, n go baa ki laadi yi po yaa fala n tie nani u maditugukoanu hali yin baa baa Kilisiti tagu yi niinni.

²⁰ N bi bua ki yaa ye leni yi moala, ki lebidi mataali leni yi, kelima n yama yagi yi po.

Agari leni Sala nannanli

²¹ Waani nni mani, yinba yaaba n bua ke li bali maama n yaa die yi, yii gba li bali maama n yedi yaala yo?

²² Li diani lienni ke Abalahama den pia bonjalalie, o puotuado Agari den mali o po yendo, Sala yua n ki tie yonbo mo, den mali o po yendo.

²³ O puotuado n mali yua, bi den mali nani ban maa bi nisaaliba kuli maama. Yua n ki tie yonbo n mali yua mo, bi den mali o, kelima U Tienu ñoanianu po.

²⁴ Laa puoliediba maama tie nani kpanjama, ki doagidi U Tienu ŋantaadiliedi. O ŋantaadiyendo yua n den kua Sinayi Juali kani naani leni Agari. Wan mali yaaba kuli tie yonbi.

²⁵ Agari yeni tie Sinayi Juali yaali n ye Arabi diema nni, ki naani leni yaa Jerusalemi dogu n ye moala, yua n ye ti yonbidi nni leni o bila kuli.

²⁶ Ama Jerusalemi dogu yuu n ye tanpoli die u yuli, wuni n tie ti yaa naa.

²⁷ Li diani: Fini ki ŋoaliga yua n ki mali, Ŋan yaa ye leni li pamancianli. Yeni de! Fini yua n daa bani u maditugukoanu, Ŋan kpaani kelima a pamanli po. Ku puonanbangu bila baa yaa yabi ki cie, Yaa pua n ye leni o calo yaa bila.

²⁸ N kpiiba, yinba n tie u ñoanianu bila nani Isaaka yeni.

²⁹ Nani ban den mali yua nani ban maa bi nisaaliba kuli maama, n den wangi ban den mali yua kelima mi Fuoma paalu po fala maama, li go tie yeni moala.

³⁰ Ama i Diani yedi lede? Li yedi: «Deli o puotuado leni o bijua kuli, kelima o bijua kan taani ki je li faali leni yua n ki tie yonbo yaa bijua.»

³¹ Lanwani, n kpiiba, tii tie o puotuado yaa bila ka, ti tie yua n ki tie yonbo yaa bila yo.