Galati 3 - U TIENU MAAMA TILI 2013

U Tienu ŋanbili Laabaaliŋamo 3—4 Li bali maama leni li dandanli

¹ Yinba Galati yaaba, bi yanluodanba, ŋme ŋmiagi yi yama? Yinba yaaba n den gbadi Jesu maama hali ke li naani ke yi den laa ban den joani o li dapoanpoanli po maama leni yi nuni.

² N bua ki buali bonyenla bebe: Naani yi den baa U Tienu Fuoma Yua kelima yi den tuo ki tiendi li bali maama n bili yaala bi? Bi kelima yi den gbadi o Laabaaliŋamo ki daani?

³ Yi luo mi yama cain yo? Yin den cili leni U Tienu Fuoma Yua yeni, naani moala yi baa juodi leni yi yaa moandili yo?

⁴ Yin den laa yaa yema li dandanli nni, naani li den tie fanma fanma po yo? Laa tie fanma fanma po ka.

⁵ U Tienu yua n puuni yi o Fuoma ki tiendi yi siiga mi bancianma yeni, o tiendi la kelima yi tiendi li bali maama n bili yaala bi? Bi kelima yi den gbadi o Laabaaliŋamo ki daani?

⁶ Yin kpaagi mani Abalahama po. O den daani U Tienu, ke U Tienu mo den coadi o po la ke li tie teginma.

⁷ Lanwani, yin bandi ke yaaba n pia li dandanli n tie Abalahama puoliŋuani moamoani.

⁸ I Diani nni li den tuodi ki waani ke U Tienu baa saa bi nilanba po moamoani kelima bi dandanli po. Lani yaa po, o den tuodi ki waani Abalahama yaa laabaaliŋamo n tie ne: «I nibuoli kuli baa li seli kelima a yaa po.»

⁹ Yeni yaa po yaaba n daani U Tienu nani Abalahama yeni, baa taani leni o ki baa li seli.

¹⁰ Yaaba n nua ke bi baa baa li moamoansaali kelima li bali maama kubima po ye ti solindi nni, kelima li diani: «U Tienu n naali yua n naa kubi ki go tieni laa bali maama n yedi yaala.»

¹¹ Oba kan baa li moamoansaali U Tienu nintuali kelima li bali maama kubima yaa po. Line doagidi cain, kelima li yedi: «O niteginka baa yaa ye ki fo kelima li dandanli yaa po.»

¹² Li bali maama naa taa leni li dandanli, ama mi yedi: «Yaa nilo n kubi ki tiendi likuli baa yaa ye kelima li yaa po.»

¹³ Kilisiti den daa ki faabi ti leni li bali maama yaa solindi, ki den tua ti solindi ti yaa po, kelima li diani: «Ban joani yua ku daagu po kuli tie ti solindi yua.»

¹⁴ Li den tua yeni ke bi nilanba n baa Abalahama seli kelima Jesu Kilisiti yaa po, ke tikuli n baa U Tienu n den niani ti yaala kelima li dandanli yaa po. Lani n tie o Fuoma.

Li bali maama leni u ñoanianu

¹⁵ N kpiiba, cedi min taa yaala n tiendi bi nisaaliba siiga ki doagidi min bua ki yedi yaala. O nilo yaa ŋaa ñoabu bonliba po, oba kuli kan bolini la bi ki pugini likani liba mo.

¹⁶ To, U Tienu den niani Abalahama leni o puoliŋuanu i ñoaniani. Laa yedi o puoliŋuani nani li tie boncianla yeni, ama yendu bebe: Leni a puoliŋuanu, lani n tie Kilisiti.

¹⁷ Diidi min bua ki yedi yaala nne: U Tienu n den bogini ki bili yaala ki niani ke o baa kubi la yeni, li bali maama yaama n den yuandi ki cua kobinaa n bina piitaa puoli kan fidi ki lebidi la, ki teni ke u ñoanianu kan kua.

¹⁸ Li yaa tie ke U Tienu ŋalimani baadi kelima li bali maama kubima yaa po, laa go tie u ñoanianu po. Ama li tie u ñoanianu yaa po yo ke U Tienu den puni Abalahama o ŋanbili.

¹⁹ Lanwani, be yaa po ke li bali maama ye? Mi den pugini ki baa doagidi bi niba tuonbiadi, hali U Tienu n den niani u ñoanianu yua yaa po n baa cua. Malekinba den doagidi ma, ke o candanbaalo mo soagini ma.

²⁰ O candanbaalo kan yaa ye niyendo bebe po. Ama U Tienu wan tie yendo.

U Tienu bali maama n den ye yaala yaa po

²¹ Naani li bali maama nia leni U Tienu ñoaniani bi? Kalam! Li yaa tie ke li den pia yaa bali maama n baa fidi ki pa li miali, lanwani li bali maama den baa fidi ki cuani li moamoansaali.

²² Ama i Diani doagidi ke bi nisaaliba kuli ye ti tuonbiadi lolima nni. Ama yaaba n daani kuli n baa U Tienu n den niani yaa ñoanianu kelima li dandanli Jesu Kilisiti nni yaa po.

²³ Hali ke li dandanli maama daa den cua, li bali maama den kubi ti nani li kpaadidieli nni yeni, hali U Tienu n baa doagidi laa dandanli.

²⁴ Lanwani, li bali maama den tie nani o biyualo yeni ki gobidi ki gedini ti Kilisiti kani ke tin baa li moamoansaali kelima li dandanli yaa po.

²⁵ Moala ke li dandanli maama cua, laa biyualo naa go die ti.

²⁶ Kelima yikuli tua U Tienu bijaba kelima li dandanli Jesu Kilisiti nni yaa po.

²⁷ Yinba, yaaba n den batisi Kilisiti nni, yi lani wani Kilisiti nani li liadili yeni.

²⁸ Mi gagidima naa go ye Jufinba leni bi nilanba siiga, i yonbi leni yaaba n die bi yula siiga, bi jaba leni bi puoba siiga, kelima yikuli tie yenma Jesu Kilisiti nni.

²⁹ Yi yaa tie Kilisiti yaaba, yi tie Abalahama puoliŋuani ki baa baa U Tienu n den niani yaa ŋalimani.