Galati 2 - U TIENU MAAMA TILI 2013

Poli leni Jesu tondiba yaaba n sieni

¹ Piiga n binanaa n den pendi, n den yegi leni Barnabasi ki go gedi Jerusalemi, ki taa Titi ke o yegi leni nni.

² N den gedi kelima U Tienu doagidi n po min gedi. N den waani bani Jerusalemi yaaba, min den wangi bi nilanba o Laabaaliŋamo maama. N den piadi leni bi liiga yaaba ki waani bani bebe, kelima mii den bua ke min den kpa soani yaa tuonli ki go tuuni yaali moala, n tua fanma.

³ Baa den ñii ke Titi yua n den yegi leni nni n kua koanciagu, ba ke o tie Gireki.

⁴ Laa maama den fii mo kelima bi nitianba yaaba n kaa den tie ti kpiiba moamoani den kua ti siiga nni ŋasiili nni, ki bua ki goandi ti ki bandi tin pia yaa faabima Jesu Kilisiti nni, ke ban fidi ki go kuani ti li bali maama yonbidi nni.

⁵ Tii den tuo ki puni ba u sanu ba waamu, kelima ti bua ke o Laabaaliŋamo yaa moamoani n yaa ye yi siiga ki da lebidi.

⁶ Ban den nua yaaba ke bi tie bi yudanba, (to, ban tie yaaba ki tie n po liba, kelima U Tienu naa tiendi gagidima bi niba siiga,) yaaba n den tie bi yudanba yeni naa bili n po bontoala.

⁷ Bi den laa ke U Tienu den puogi nni min yaa wangi o Laabaaliŋamo bi nilanba, nani wan den puogi Pieli maama Jufinba po.

⁸ Moamoani, U Tienu yua n den teni ke Pieli tua o tondo ki gedini o Laabaaliŋamo Jufinba po den teni ke nmo tua o tondo ki gedini o Laabaaliŋamo bi nilanba po.

⁹ Jesu yaaba siiga, yaaba n den tie nani i benjieli yeni, Jaki, Pieli leni Jan, ban den laa U Tienu n ŋanbi n po maama, bi den cuo mini leni Barnabasi nijieni ki yoagi, ki doagidi ke bi taa leni ti. Bikuli den tuo ke mini leni Barnabasi baa yaa tuuni bi nilanba siiga, ke bani mo baa yaa tuuni Jufinba siiga.

¹⁰ Bi den mia bonyenla bebe, ke tin yaa tiadi ki todi a luoda, min pia li yankuali ki tiendi yaala.

Poli funi leni Pieli Antiosi po

¹¹ Ama, Pieli n den cua Antiosi, n den funi leni o kelima o tagili po.

¹² Wan den kpa cua, o den taagi ki di leni yaaba n ki tie Jufinba. Ama Jaki n soani yaaba n den cua, o den cili ki sengi ti kpiiba yaaba n ki tie Jufinba, kaa go taani leni ba, kelima o den jie yaaba n yedi ke Jufinba koanciagu tie tiladi.

¹³ Jufinba siiga bi tianba moko den cili ki ŋoadi laa yantiali buolu hali ke Barnabasi moko den taani leni ba laa palieda nni.

¹⁴ Min den laa ke baa ŋua o Laabaaliŋamo yaa moamoani n bili maama, n den yedi Pieli bikuli nintuali: «Fini yua n tie Jufi yaa tiendi nani bi nilanba n tiendi maama, ki naa ŋua Jufinba n tiendi maama, a baa fidi ki tieni bi nilanba u paalu lede ban yaa ŋua Jufinba n tiendi maama?»

Jufinba leni bi nilanba kuli tindi kelima li dandanli yaa po

¹⁵ Tinba ti mali ki tie Jufinba, tii tie nilanba yaaba n tie ti tuonbiadi danba ka.

¹⁶ Ti bandi ke o nilo kan baa li moamoansaali kelima U Tienu bali maama kubima yaa po. Ama o baa baa li kelima li dandanli Jesu Kilisiti nni yaa po. Timoko ti daani, ke tin baa li moamoansaali kelima ti dandanli Kilisiti nni yaa po ke laa ŋua leni li bali maama kubima. Niloba kuli kan baa li moamoansaali kelima li bali maama yaa po.

¹⁷ Ama li yaa tie ke ti lingi ki bua ki baa li moamoansaali kelima Kilisiti yaa po ti sua ke tinba Jufinba moko tie ti tuonbiadi danba. Naani li bua ki yedi ke Kilisiti tie ti tuonbiadi naacemo bi? Kalam!

¹⁸ Li yaa tie ke n guani ki maa min den mudi yaala, n tua mini n ba li bali maama miidika.

¹⁹ Mini yaa po li bali maama den teni ke n kpe yaala n tie li bali maama kubima yaa po, ke min yaa ye ki fo U Tienu po. Bi den taani ki joani nni leni Kilisiti li dapoanpoanli po.

²⁰ Lanwani, laa go tie mini yua n ye ki fo, li tie Kilisiti yua n ye ki fo n niinni. Min pia yaa miali n gbanandi nni moala, n pia li kelima n dugi wani U Tienu Bijua po, wani yua n den bua nni ki puni o yuli ki kpe n po.

²¹ Mii bua ki fali U Tienu ŋanbili. Li yaa tie ke li moamoansaali baadi kelima li bali maama kubima yaa po, lani Kilisiti den kpe fanma fanma.