Galati 1 - U TIENU MAAMA TILI 2013

Poli doagidi wan tua Jesu tondo maama 1—2 I fuondi

¹ Mini Poli yua n tua Jesu tondo, ke laa ŋua bi nisaaliba ka soani nni, bi niloba mo, ama kelima Jesu Kilisiti leni U Tienu yua n tie Baa, yua n den fiini o bi tinkpiba siiga n soani nni.

² Mini leni n kpiiba, yaaba n ye ne leni nni kuli, taani ki fuondi yi yinba Kilisiti Nitaana ya n ye Galati diema nni.

³ Ti Baa U Tienu leni o Diedo Jesu Kilisiti n pa yi li ŋanbili leni mi yanduanma.

⁴ Wani Jesu Kilisiti n den puni o yuli ti tuonbiadi po, nani ti Baa U Tienu n den bua maama, ki baa faabi ti leni ŋanduna na leni o biadima.

⁵ Wani n yaa baadi ti kpiagidi hali yaa yogunu n tuu u yuu. Amina!

Laabaaliŋantoa naa ye

⁶ Li paki nni leni yin jaligi ki lebidi ki ŋaa U Tienu yua n yini yi kelima Kilisiti ŋanbili po, ki baa ŋoadi laabaaliŋantoa.

⁷ Moamoani laabaaliŋantoa ki ye, n maadi yeni kelima bi nitianba lengidi yi yama, ki moandi ki baa lebidi Kilisiti Laabaaliŋamo.

⁸ Ba tinba, ti yaa wangi yi yaa laabaaliŋamo n ki taa leni tin den kpa wangi yi yua, ba maleki yaa ñani tanpoli ki tieni yeni, yua n tieni yeni kuli, wan tua ti solindi yua.

⁹ Nani tin den kpa yedi maama, n go yedi yeni moala, yaa nilo n wangi yi laabaaliŋantoa yua n ki taa leni yin den kpa gaa yua, wan tua ti solindi yua.

¹⁰ Moala po, naani n moandi ke bi nisaaliba n saa n po i moamoani bi, bi U Tiene? Naani n moandi ki bua ki mangi bi nisaaliba yaa pala bi? Li yaa tie ke n bi bua ki mangi bi nisaaliba yaa pala, n kan bi yaa tie Kilisiti naacemo.

Poli n tua tondo maama

¹¹ N kpiiba, n kadi ki waani yi ke min den waani yi yaa Laabaaliŋamo ki ñani bi nisaaliba kani ka.

¹² Mii den gbadi o nisaalo kani ka, o nisaalo ka den bangi nni o maama fuuli mo, ama Jesu Kilisiti n den doagidi o n po.

¹³ Yi den gbadi n tagu n den tie maama min den ŋua Jufinba jaanma yaa yogunu. N den wangi U Tienu niba fala hali ki bua ki bolini ba.

¹⁴ Jufinba jaanma yeni niinni, n den ŋua ma ki cie n buolu leni yaaba n taa leni nni saala boncianla, kelima min den pia li yankuali ke li pendi maama ti danbogida po.

¹⁵ Die U Tienu den ŋanbi n po ki gandi nni ki gagidi nni hali n naa tugu nni, ki go ti yini nni o tuonli po.

¹⁶ Wan den sua ke li dagidi o po, o den doagidi n po o Bijua, ke min yaa wangi o Laabaaliŋamo bi nilanba siiga. Lanyogunu mii den kpa gedi ki buni niloba kuli.

¹⁷ Mii den gedi Jerusalemi mo ki baa lingi yaaba n den kpa tie Jesu tondiba hali ke n daa tua o. Ama n den fii ki gedi Arabi diema. Li yaa puoli, n den guani Damasi dogu nni.

¹⁸ Binataa n den pendi, n den gedi Jerusalemi ki baa bandi Pieli, ki den tieni o deni piiga n danamuu.

¹⁹ Likani Jesu tondiba siiga, mii den laa nitoa kuli kali o Diedo Jesu waalo Jaki.

²⁰ Min diani yi po yaa maama na, mii pua faama, U Tienu tie n siedo.

²¹ Li yaa puoli, n den gedi Siiri diema leni Silisi diema nni.

²² Lanyogunu Kilisiti Nitaanli yaali n ye Jude diema nni, daa den laa n nunga.

²³ Bi den gba bebe ke bi tua: «Yua n den kpa wangi ti fala lebidi ki wangi li dandanli maama, wan den kpa moandi ki baa bolini yaama.»

²⁴ Lane bi den pagi U Tienu kelima n po.