Filipi 4 - U TIENU MAAMA TILI 2013

I tundi

¹ Lanwani, n kpibuadiba, min bua ki go le yaaba hali bonŋanla, yinba yaaba n tie n pamanli leni n kpiagidi, yinba n buakaaba, yin yaa se ke li pa o Diedo nni.

² N tundi ki go mia Evodi leni Sintika, ke ban yaa pia yantiayenli o Diedo nni.

³ N go mia fini min dugi yua yaa po, yua n tuuni leni nni ti Diedo tuonli. Ŋan todi bi puoliediba yeni, bani yaaba n den taani leni nni, ki moa o Laabaaliŋamo muali. Bani, Kilema leni nitoaba, n tuonsoanlieba yaaba taani leni nni laa tuonli nni, bimoko yela diani li miali tili nni.

⁴ Yaa mangidi mani yi pala o Diedo nni yogunu kuli. N go waani yi yeni, yaa mangidi mani yi pala!

⁵ Yi dingima n yaa doagidi bi niba kuli po. O Diedo cuama nagini.

⁶ Yin da yagi mani yi yama bonliba kuli po. Ama li bonla kuli yaa po, yin waani U Tienu yin luo yaala, ki yaa jaandi ki miadi o, ki go tuondi o.

⁷ Lanwani, U Tienu yaa yanduanma, yaama n pendi o nisaalo bandima kuli, baa guudi yi pala leni yi yantiana kuli Jesu Kilisiti nni.

⁸ N kpiiba, yaa maama n sieni tie mine: yin yaa tia yaala n tie moamoani, yaala n pia ti jigidi, yaala n tiegi, yaala n ŋani, bi niba n bua yaala ki faadi la kuli, yaala n pia o siediŋamo leni ti bulicindi, ki pundi bi niba n pagi la kuli. Yaa tia mani lankuli yaa po!

⁹ Yin go yaa tiendi min den bangi ki tundi yi yaala, yin den gbadi ke n yedi yaala ki go laa ke n tiendi yaala. Lanwani, mi yanduanma Tienu baa yaa ye leni yi.

Poli tuondi Filipi yaaba

¹⁰ N pali den mangi hali boncianla o Diedo nni, min den laa ke yi guani ki faadi yi buama n po. Moamoani, yi den tiani n po yogunu kuli, ama yi daa den baa u sanu ki fidi ki doagidi n po la.

¹¹ Mii maadi yeni kelima n luo bonliba kuli ka. N bani ki cuo ki dagini n yema lan tie yaa yema buoli kuli nni.

¹² N bani ki yaa ye leni mi luoma, ki go bani ki yaa ye ki pia ke li kandi. N yema n tie maama kuli leni min ye naankani kuli, n bani ki je ki guo, ki go bani mi koma. N bani ki yaa pia ke li kandi, bi ki yaa ye leni mi luoma.

¹³ N fidi likuli, kelima wani yua n puuni nni li paalu po.

¹⁴ Ba yeni, yin den taani leni nni ki tugi n fala tugili yeni, yi tieni yaala n ŋani.

¹⁵ Yinba Filipi yaaba bani bonŋanla, ke min den cili ki wangi o Laabaaliŋamo yaa yogunu, ki ñani Maseduani diema nni, Kilisiti Nitaana kuli siiga, yinba bebe n den tiadi n po ki todi nni, ki puni nni bu paabu.

¹⁶ Ba min den ye Tesaloniki, yi den soani n po bu paabu ke laa luo taalimilie, ki baa todi nni min luo yaala po.

¹⁷ Laa tie ke n bua ki yaa baadi bu paabu ka, n bua yin baa ti ñuadi boncianla kelima laa paabu po.

¹⁸ N diani yeni ki waani yi ke yin den soani n po yaala kuli pundi n kani, ke n pia ke li kandi. Min den gaa yin den soani Epafroditi ke wan teni nni yaala yeni, mii go luo liba kuli. Yi paabu yeni tie nani yaa tulale yaa nuulu n mani leni U Tienu n gaa yaa padili ke li mani o po yeni.

¹⁹ N Tienu baa pa yi yin luo yaala kuli, nani o ŋalimano kpiagidi n tie maama Jesu Kilisiti nni.

²⁰ U Tienu ti Baa n yaa pia ti kpiagidi hali yaa yogunu kuli. Amina!

I fuondijuodike

²¹ Fuondi mani bi nigagidiŋanba Jesu Kilisiti nni.

²² N kpiiba, yaaba n ye ne leni nni fuondi yi. Bi nigagidiŋanba yaaba n ye ne kuli fuondi yi, bi siiga yaaba n ye o badiciamo Sesari diegu nni fuondi yi hali bonŋanla.

²³ Ti Diedo Jesu Kilisiti yaa ŋanbili n yaa ye leni yikuli.