Filipi 3 - U TIENU MAAMA TILI 2013

Poli tundi Filipi yaaba po 3—4 Tin baa yaa tiegi U Tienu po maama

¹ N kpiiba, n majuodikaama tie mine: Yin yaa mangidi mani yi pala o Diedo nni. Laa coagini nni min go diani yi po yeni ki pugini, li go baa teni yin yaa se ke li pa.

² Yin yaa fangi yi yula leni yaaba n tie nani i sangbanli leni bi tuonsoanbiadiba, yaaba n ñii ke ban kua ku koanciagu yeni.

³ Tinba n tie a jungimoana, yaaba n kpiagidi U Tienu kelima o Fuoma po, ki jigini ti yula Jesu Kilisiti nni, ki naa bili ti dugidi ti gbanandi nni.

⁴ Ama mini, n bi baa fidi ki dugi min tie maama po. Li yaa tie ke nitoaba nua ke bi baa fidi ki dugi ban tie maama po, mini n baa fidi ki cie.

⁵ Bi den kuani nni ku koanciagu ke n pia dananii. N tie Isidayeli yua, Benjamen buolu, ki tie Hebilu ke n yaajanba kuli tie Hebilunba. Yaala n tie li bali maama po, n den tie Farisieni.

⁶ Yaala n tie n yankuali po, n den wangi Kilisiti Nitaanli fala. Yaala n tie yaa teginma n ŋua li bali maama kubima po, bi kan den fidi ki kuli nni leni liba kuli.

⁷ Ama min den nua yaala ke li tie n po bonmoanla yeni kuli, n ji nua likuli ke li tie bonfanla, kelima Kilisiti yaa po.

⁸ N go nua li bonla kuli, ke li tie nani li bonbodikaala yeni. Yaala n tie n po li bonmoanla tie: Ki bandi Jesu Kilisiti n Diedo. Wani yaa po yo, ke n tuo ki luni min pia yaala kuli, ki nua la nani ti baadi yeni, ke min fidi ki baa Kilisiti.

⁹ Mii go pia n yuli po yaa moamoansaali n ñani li bali maama kubima nni, ama yaali n baadi, kelima li dandanli Kilisiti nni yaa po. Li tie yaa moamoansaali n ñani U Tienu kani, ki ŋua leni li dandanli.

¹⁰ Min bua yaala tie min bandi wani Kilisiti leni o fiima bi tinkpiba siiga paalu. Min go bua yaala tie, ki taani leni o o fala nni, ki yaa naani leni o o kuuma nni.

¹¹ Yeni, lan tie maama kuli, mini moko n baa ki pundi bi tinkpiba guafiima.

Poli tiini ki bua ki pundi u bianu

¹² Laa tie ke n peli ki baa i panpaani no ka, bi ke n ŋanbi ki dagidi cain no ka. Ama n suagi ki tiini, ke min fidi ki cuo n nuama panpaani, kelima Jesu Kilisiti den cuo nni lani yaa po yo.

¹³ N kpiiba, mii nua ke n cuo laa panpaani no ka. Ama n tiendi bonyenla: N sundi yaala n ye n puoli, ki moandi ki suagi liiga.

¹⁴ Yeni, n tiini ki cuubi n nuama juodima, ki baa baa laa panpaani. Lani n tie U Tienu n yini nni, min baa yaa panpaani tanpoli po Jesu Kilisiti nni.

¹⁵ Tinba yaaba n cuoni ke li dagidi o Diedo sanŋoadima nni kuli, n yaa pia laa yantiali buolu. Yi yaa pia yantiatoali, lan tie yaala kuli, U Tienu baa yendi yi yama laa bonla po, yin bandi ki pugini.

¹⁶ Ama tin pundi yaa bianu po, tin taani mani ki suagi liiga yenma.

¹⁷ N kpiiba, yin yaa ŋua mani n yaa fuuli, ki yaa diidi yaaba n ŋua tin ŋaa yi po yaa bontogidikaala.

¹⁸ Niba boncianla ye, min den kpa waani yi yaaba yaa maama, ki go wangi yi la moala leni a bubula, ke bi tagi doagidi ke bi tie Kilisiti dapoanpoanli yibalinba.

¹⁹ Bi juodima baa yaa tie mi bodima. Bi tugidi n die ba. Ban tama ke yaala n tie bi po ti jigidi yeni, tie bi po i fe yo. Bi kuandi bi yama ŋanduna bonla nni bebe.

²⁰ Ama tinba, ti tie tanpoli diema yaaba. Ti guu ke ti Candaano o Diedo Jesu Kilisiti baa go ña lankani ki cua.

²¹ O yaa cua, o baa lebidi ti gbanandi, yaadi n tadi kaa go pia kpiagidi, ki teni tin yaa naani leni wani Kilisiti yaa gbanandi, yaadi n pia ti kpiagiciandi. O baa tieni lani, kelima o paalu po, yuu n teni ke o paani li bonla kuli, ki go die la.