Filipi 2 - U TIENU MAAMA TILI 2013

Kilisiti yumiinli leni o kpiagidi

¹ Yi yema Kilisiti nni teni ke yi pia u fidu. O buama mo puni yi li papaali. Yi pia mi taanyenma leni o Fuoma. Yi pia li padingili leni mi ninñingbadima yiyaba po.

² Lanwani, yin mangi n pali hali lan kandi, ki yaa pia yantiayenli leni yiyaba. Yin yaa pia buayenma, payenli leni yantiayenli.

³ Yin da tieni liba kuli leni mi paadima yantiali, yaa ka yaa kpiagidi n tie fanma fanma po. Ama li yumiinli n teni yin yaa nua yi lieba ke bi cie yi.

⁴ Oba kuli n da lingi o yuli ŋamu bebe ka, ama yuakuli n yaa lingi o lieba ŋamu.

⁵ Yin yaa pia Jesu Kilisiti n den pia yaa yantiali.

⁶ O den tie U Tienu n tie maama. Ba ke o den tie yenma leni U Tienu, Waa den sua ke li tie wan baa fie yaala leni u paalu.

⁷ Ama o den landi laa kpiagidi kuli o yama po, Ki taa o naacemo n tie maama ki lani, Ki tua nani bi nisaaliba n tie maama yeni. Wan den tua nisaalo ki tie nani bi nisaaliba n tie maama,

⁸ O go den wadi o yuli, Ki tuo ki tiendi U Tienu yanbuama, Ki pundi hali mi kuuma, Ba hali li dapoanpoanli po yaa kuuma.

⁹ Li tie lani yaa po ke U Tienu mo jigini o hali boncianla, Ki puni o yaa yeli n cie a yela kuli.

¹⁰ Lani, dunli kuli baa gbaani Jesu yeli po, Tanpoli, ki tinga po leni ki tinga tiipo kuli.

¹¹ Nilo kuli mo n tuo Ke Jesu Kilisiti n tie o Diedo, U Tienu yua n tie Baa yaa kpiagidi po.

Tua mani mi yenma ŋanduna nni

¹² Lanwani, n buakaaba, nani yin den tuo ki tiendi min yedi yaala min den ye leni yi yaa yogunu kuli maama, moala min kaa go ye leni yi yeni, yin go yaa tiendi yeni ki pugidi. Yin yaa moandi leni li fangili leni mi digibima, ki yaa ye yi tindima yema.

¹³ U Tienu n baa teni yin bua, ki go fidi ki tieni nani o yanjagiŋanli n tie maama.

¹⁴ Yin tiendi yaala kuli, yaa tiendi mani la, ki naa yenbidi, ki da nia leni yiyaba mo.

¹⁵ Yeni n tie yin yaa ŋani cain, ki pia li papienli, ki tie U Tienu bila ban kan fidi ki kuli yaaba leni liba kuli, moala ne niba yaaba n joagini ki bia siiga. Yin yaa yieni nani i mukaani yeni ŋanduna yaaba siiga,

¹⁶ ki wangi ba li miali maama. Yi yaa tiendi yeni, li baa yaa tie n po ti jigidi Kilisiti guacuama daali, kelima li baa doagidi ke mii den tiini mi nuama fanma fanma, kaa tuuni fanma fanma mo.

¹⁷ Ba li yaa tie ke n soama baa wuli ki tua nani li ñincabili yeni, yi dandanli tuonli padili po, n baa yaa mangidi n pali li po, n go baa yaa mangidi n pali leni yikuli.

¹⁸ Yimo n mangi yi pala li po, ki taani leni nni n pamanli nni.

Timote leni Epafroditi

¹⁹ O Diedo Jesu yaa bua, li kan waagi, n baa soani Timote yi kani, ki baa yi laabaalo lan paagi n pali.

²⁰ Mii pia nitoa yua n taa leni nni yantiayenli, ki yagini o yama yi ŋamu po.

²¹ Yaaba n sieni kuli kuani bi yama bi ŋantaadiceli nni, baa kuani bi yama Jesu Kilisiti yaa ŋantaadi nni.

²² Yikuli bani Timote n doagidi ke o tie nidugika maama, ki taa leni nni ki tuuni o Laabaaliŋamo wangima tuonli, nani ki biga n baa yaa taa ki tuuni leni o baa maama yeni.

²³ N yaa bandi n maama n baa juodi maama, n sugini ki soani o yi kani lanyogunu.

²⁴ N dugi o Diedo po, ke mini n ba moko baa cua yi kani ke li kan waagi.

²⁵ N sua ke li tie tiladi min guani ki soani yi kani n kpiilo Epafroditi, n tuonsoanlielo leni n moamuadilielo, yin den soani yua n kani, ke wan yaa todi nni leni yaala n poadi n po.

²⁶ O den bua hali bonŋanla ki le yikuli. Wan den bandi ke yi gbadi ke o yia, o yama den yagi li po boncianla.

²⁷ Moamoani, o den yiagi boncianla hali ke li poadi waamu wan kpe. Ama U Tienu den gbadi o po mi ninñima, ki go gbadi mini yaa po moko mi ninñima, ki teni ke min da go baa pabiiditoali ki pugini.

²⁸ Yaala n tigini nni ke min soani o yi kani tie, ke n bua yin go le o yi pala n mangi, n yaa pabiidili mo n wadi.

²⁹ Lanwani, yin gaa o cangu bonŋanla, kelima o Diedo po leni li pamancianli, ki go yaa jigindi laa nibuolu.

³⁰ O den luni o miali ki tuuni Kilisiti tuonli hali ki nagini mi kuuma. O den bua ki todi nni yin bi baa todi nni yaa todima, ki naa ye n kani.