Filemon 1 - U TIENU MAAMA TILI 2013

I fuondi

¹ Mini Poli yua n tie kpaadili kelima Jesu Kilisiti po leni ti kpiilo Timote, n diani li tili fini Filemon ti buado leni ti tuonsoanlielo po.

² Ti go diani li ti kpiilo Apiya, Alikipa ti minteelilieli o Diedo toabu nni leni Kilisiti Nitaanli, yaali n taagi fini Filemon diegu nni kuli po.

³ Ti Baa U Tienu leni o Diedo Jesu Kilisiti n pa yi li ŋanbili leni mi yanduanma.

Poli tuondi U Tienu Filemon po

⁴ N tiadi a po yogunu kuli n jaandi nni, ki tuondi n Tienu

⁵ kelima bi wangi nni ŋan pia yaa dandanli o Diedo Jesu po leni ŋan pia yaa buama bi nigagidiŋanba po.

⁶ N miadi U Tienu ke ŋan pia yaa taanyenma leni ti kelima li dandanli yaa po, n yaa pia mayuli, ki teni ŋan bandi tin pia yaa seli kelima tin ye leni Kilisiti yeni po.

⁷ N kpiilo, a buama yeni mangi n pali ki go baagi nni boncianla, kelima a duandi bi nigagidiŋanba yama.

Poli n mia Filemon yaa miabu Onesimi po

⁸ Lanwani, ba ke n pia u sanu kelima Kilisiti po ki puogi a yaala n pundi,

⁹ yaala n mani n po ki cie tie ki mia ŋa bu miabu, kelima mi buama yaa po. Mini Poli, yua n tie jakpelo ki go tie kpaadili moala kelima Jesu Kilisiti po,

¹⁰ n mia ŋa bu miabu n biga Onesimi po, min mali yua ti kpaadi nni.

¹¹ Waa den kpa pia a po fuoma, ama moala o pia ma a po, ki go pia ma mini mo yaa po.

¹² N soani o wan guani a kani. O tie nani n boagidi mini n ba yeni ki soani a kani.

¹³ N den bua wan bi yaa ye n kani ki gaa a kaanu, ki yaa todi nni min ye ti kpaadi nni kelima o Laabaaliŋamo po yaa yogunu.

¹⁴ Die mii den bua ki tieni liba, kali min kpa buali a ki bandi ŋan jagi yaala, ke a ŋanma n da tie nani u paalu yeni ka, ama lan yaa tie a yama po yo.

¹⁵ Daalinba o den paadi leni a u yogunu waamu, ke ŋan guani ki gaa o wan yaa ye leni a hali yaa yogunu kuli.

¹⁶ Moala a kan go yaa nua o ke o tie yonbo ka, ama ke o ji cie yonbo. O tie a kpibuado. O tie yeni mini yaa po, ki baa yaa tie yeni fini yaa po ki cie, ti gbanandi nni leni o Diedo nni.

¹⁷ Lanwani, a yaa nua ke n tie a danli, ŋan gaa o nani ŋan bi baa gaa mini maama.

¹⁸ Wan bii a po yaala leni wan pia a po yaa panli, ŋan coadi la ke li tie n yaa panli.

¹⁹ Mini Poli n diani yaa maama n tie ne leni n nuceli, mini n ba n baa pa ŋa la. N kan maadi fini a ba n kubi n po yaa panli, lani n tie ke a pia li miali kelima n yaa po.

²⁰ Lanwani, n kpiilo, tieni n po laa ŋanbili kelima o Diedo po. Duani n yama Kilisiti nni.

²¹ Min diani lani kuli yeni, n dugi a po ke a baa tuo ki tieni min yedi yaala, ki go bani ke a baa tieni, ba ki cie min yedi yaala.

²² Ŋan go ŋanbi n po li candieli mo, kelima n sugini ke U Tienu n guani nni yi kani kelima yi jaandi po.

Mi majuodikaama

²³ Epafrasi, mini leni yua n taa ki ye li kpaadidieli nni kelima Jesu Kilisiti yaa po, fuondi a.

²⁴ N tuonsoanlieba Marki, Arisitarki, Demasi leni Luki moko fuondi a.

²⁵ O Diedo Jesu Kilisiti yaa ŋanbili n yaa ye leni yi.