Esiteri 9 - U TIENU MAAMA TILI 2013

Jufinba tu bi yibalinba li panli

¹ Piiga n cilie, yaa ŋmaalo n yi Adaari piiga n dataali, o bado bali maama leni o ñoamabonli n den baa tieni yaa daali den pundi. Jufinba yibalinba den sugini ke bi baa paadi ba landaali. Ja li kan tua yeni, li den lebidi ke Jufinba n paadi ba.

² Jufinba den taani ban den ye ye yaa dogi nni, o bado Asuerusi diema nni kuli, ki tuogi leni yaaba n den lingi ki baa kpa ba kuli. Niloba kuli ki den fidi ki tuogi leni ba ke li gedi kaanu, kelima i nibuoli kuli den jie ba ke li kandi.

³ A badibila, bi yudancianba, a koanbala leni bi badibaanba den sedi Jufinba puoli, kelima bi den jie Mardoke.

⁴ Bi den jie Mardoke kelima o den pia u paalu boncianla o bado diegu nni. O yeli mo den ñani mi diema nni kuli, kelima o paalu den pugidi.

⁵ Jufinba den pedi bi yibalinba kuli leni mu jugisiemu, ki kpa ki bolini ba. Bi den tieni yaaba n nani ba yeni kuli nani ban bua maama.

⁶ U dociamu Susi nni, Jufinba den kpa ki bolini jaba kobimuu.

^7-10 Bi den kpa Jufinba yibali Hamedata bijua Hamani bijaba, bila piiga yeni kuli. Bani bila piiga yeni yela nne: Palisandata, Dalifoni, Asipeta, Polata, Adalia, Aridata, Palimasita, Alisayi, Alidayi leni Vajesata. Ama baa den fagi bi piama.

¹¹ Landaali, bi den waani o bado ban den kpa yaaba u dociamu Susi nni coali n pundi yaa bianu.

¹² O den yedi o puobado Esiteri: «Jufinba kpa ki bolini u dociamu Susi nni jaba kobimuu leni Hamani bijaba bonba piiga yeni kuli. Li yaa tie yeni nekanba, li baa yaa tie lede a diema yaama n sieni nni? A go mia be? N baa pa ŋa la. A go bua be? A baa baa la.»

¹³ Esiteri den guani ki yedi o: «Fini o bado yaa laa ke li ŋani, ŋan pa yaa Jufinba n ye ne Susi nni u sanu, ban go tieni saala moko nani li ñoamabonli n den bili ke bi tieni maama dinla, ki go joani Hamani bijaba bonba piiga yeni mo, ban joangi bi nibiadiba yaa daagu po.»

¹⁴ O bado den ñani li ñoamabonli ke ban tieni yeni. Bi den kpaani li ñoamabonli yeni Susi nni, ki joani Hamani bijaba, ban den kpa yaaba bonba piiga yeni.

¹⁵ Yaa Jufinba n den ye Susi nni go den faa ki taani Adaari piiga n danaali, ki kpa Susi nni jaba kobitaa. Ama baa den fagi bi piama.

¹⁶ Yaa Jufinba n den sieni ki ye ye mi diema nni den taani ban ye yaa dogi nni kuli, ki moandi ki gaa bi yula. Bi den kpa yaaba n den nani ba siiga piilele n niba tudamuu (75 000), ki gaa bi yula bi yibalinba kani, ki faabi leni ba. Ama baa den fagi bi piama.

Purimi jaanma fuuli 9.17—10.3

¹⁷ Laa bonla kuli den tieni yaa ŋmaalo n yi Adaari yaa piiga n dataali. Jufinba den fuodi li piiga n danaali, ki tieni mi jaanjiema ki dini ki mangi bi pala.

¹⁸ Yaa Jufinba n den ye Susi nni den taani li piiga n dataali leni li piiga n danaali, ki tuu bi yibalinba li panli, ki fuodi li piiga n damuuli, ki tieni mi jaanjiema ki dini ki mangi bi pala.

¹⁹ Li tie lani yaa po ke yaa Jufinba n ye li dobila nni, teni ke yaa ŋmaalo n yi Adaari yaa piiga n danaali tie bi po jaanma daali. Bi yen tieni mi jaanjiema ki je ki mangi bi pala, ki go soani bi lieba po mi jiema.

²⁰ Mardoke den diani li bontienkaala yeni kuli togida, ki go soani a tila yaa Jufinba n ye o bado Asuerusi diema nni kuli po, yaaba n ye koanma nni leni yaaba n ye foagima kuli.

²¹ O den bili ke binli kuli ban yen gagidi yaa ŋmaalo n yi Adaari piiga n danaali leni o piiga n damuuli, ki tieni mi jaanma,

²² kelima laa dana den tie ban den gaa bi yula bi yibalinba kani, ki faabi leni ba yaa dana. Laa ŋmaalo den tie bi pabiidili n den lebidi ki tua pamanli yaa ŋmaalo, bi paboanli daali den lebidi ki tua jaanma daali. Binli kuli bi den baa tieni mi jaanjiema, ki je ki mangi bi pala laa dana, ki soani bi lieba po mi jiema, ki go pa a luoda bu paabu.

²³ Jufinba den niani u ñoanianu ke bi baa tuo Mardoke n diani yaala kuli, ki yaa tiendi mi jaanma binli kuli.

²⁴ Kelima Agagi buolu yua Hamedata bijua Hamani, Jufinba yibali, den jagi ke o baa bolini ba. O den luni ban yi yaala Purimi, lani n tie tiatia, ki bua ki bandi wan baa kpa ki bolini ba yaa daali.

²⁵ Ama Esiteri den kua ki laa o bado ke o ñani o ñoamabonli ki diani ke Hamani n den jagi yaa yanjagibiadili, ki bua ki bolini Jufinba yeni n guani ki baa o yuli po, ke ban joani o, wani leni o bijaba kuli ku daagu po.

²⁶ Li tie lani yaa po ke bi yini laa dana Purimi. Purimi yeni ñani Pudi kani, ki bua ki yedi tiatia. Li tie ke Mardoke n den diani yaa tili yaa po, bani Jufinba n den laa yaala leni yaala n den tieni ba kuli yaa po,

²⁷ bi den jagi ki bili bani bi ba po leni bi yaabila leni yaaba n baa lebidi ki tua Jufinba kuli yaa po, ke binli kuli bi baa yaa tiendi mi jaanma a dalieda yeni. Bi baa yaa ŋua Mardoke n diani yaala, ki yaa tiendi mi jaanma yeni lan bili ban yaa tiendi ma yaa yogunu.

²⁸ Bi baa yaa tiadi laa dana po, ki tiendi mi jaanma nifiima n tuu nifiima, Dogu kuli nni leni diebiga nni kuli, diegu kuli baa yaa jaani laa jaanma. Jufinba siiga Purimi dana kan bodi abada, bi puoliŋuani mo kan sundi lipo.

²⁹ O puobado Esiteri Abihayili bisalo leni Mardoke yua n den tie Jufi go den diani a tila ki maadi ki pugini ban den kpa diani ki yedi yaala Purimi jaanma po yeni u fidu.

³⁰ Bi den soani a tila yeni yaa Jufinba n ye o bado Asuerusi diema nni, i kobiga n piiliedi n diebileleeda nni. A tila yeni den pia mi mamanma yaama n duandi bi niba yama.

³¹ A tila yeni den tundi Jufinba ke ban yaa jaani Purimi jaanma yeni lan bili ban yaa jaani ma yaa dana, nani o puobado Esiteri leni Mardoke yua n den tie Jufi n den waani ba maama leni bani bi ba mo n den bili bi yula po leni bi puoliŋuani po maama. Bi baa yaa tiendi nani ban den jagi maama bi ñoalolima leni bi bubula po yeni.

³² Lanwani, Esiteri ñoamabonli yeni den saa moamoani ban den bili yaala Purimi jaanma po yeni, ke li diani ki bili tili nni.