Esiteri 8 - U TIENU MAAMA TILI 2013

O bado Asuerusi ñani li ñoamabonli ki faabi Jufinba

¹ Landaali liga, o bado Asuerusi den puni o puobado Esiteri Jufinba yibali Hamani diegu. Esiteri den waani o bado wani leni Mardoke n kpi maama. Lanwani, o bado den teni ke bi yini Mardoke ke o cua o kani.

² O bado den pidi o ñoagima, wan den guani ki gaa yaama Hamani kani, ki teni Mardoke. Esiteri mo den teni ke Mardoke diedi Hamani diegu.

³ Esiteri go den gedi o bado kani ki maadi leni o. O den gbaani o bado taana kani ki buudi, ki mia ke wan da tuo ke Agagi buolu yua Hamani n den jagi yaa biadima, ki bili ke o baa bolini Jufinba yeni n tieni.

⁴ O bado den tandi o badigbiamu yuu n tie wula Esiteri po, ke o fii ki sedi o nintuali,

⁵ ki yedi: «Fini o bado yaa laa ke li ŋani, ki dagidi, a yaa baa tuo n po, a pali yaa mani n po, ŋan ñani a ñoamabonli ban diani li tili ki yie Hamani n den jagi ki diani yaa tila po. Wani Hamani, Agagi buolu yua Hamedata bijua, den jagi ki diani a tila ke ban bolini yaa Jufinba n ye a diema nni kuli. Ŋan diani ki bolini laa tila yaa maama.

⁶ N baa tieni lede ki yaa nua yaa janda n baa cua n niba po? N baa tieni lede ki yaa nua ban baa bolini n buolu maama?»

⁷ O bado Asuerusi den yedi o puobado Esiteri leni Mardoke yua n tie Jufi: «Diidi ki le, n puni Esiteri Hamani diegu, min den teni ke bi soadi yua ku daagu po, kelima o den tandi o nuu ki bua ki bolini Jufinba.

⁸ Moala yin diani yin sua maama, yaala n baa todi Jufinba, lan yaa tie nani mini o bado n diani yeni, ki poabini poabini, ki taa n ñoagima ki pua ki tieni mi maalima, kelima ban diani yaa tili n yeli nni kuli, ki taa n ñoagima ki pua ki tabini, li kan lebidi.»

⁹ Lanyogunu, yaa ŋmaalo n yi Sifana, ki tie citaa piilie n dataali, bi den yini o bado tidianla ke bi diani Mardoke n yedi ba yaala kuli. Bi den diani ki soani Jufinba po, bi yudancianba, a koanbala leni a badibila yaaba n die mi diema, kobiga n piilie n diebileleeda, ki cili puoli po Indi diema, ki yaa caa hali Etiopi diema nintuali po. Bi den diani ki soani diebiga kuli po nani ban dangi laa diebiga nni maama leni yaa nibuolu n ye ki niinni n maadi maama.

¹⁰ Bi den diani ke li tie nani o bado Asuerusi wan oba n diani yeni, ki poabini poabini ki taa o bado ñoagima ki pua ki tieni mi maalima. Bi den soani laa tila leni yaa tonda n jagi i taami leni yaaba n jagi i buomi.

¹¹ A tila yeni niinni, o bado den puni Jufinba u sanu, ban ye yaa dogu nni kuli, ban taani leni biyaba ki moandi ki gaa bi yula, ki kpa, ki bolini yaaba n baa taa ti toatiadi ki bua ki kpa ba kuli. Ban tie yaa nibuolu leni ban ñani yaa diebiga kuli, ban bolini bani, bi bila leni bi puoba kuli, ki go fagi bi piama.

¹² Li go den diani ke likuli n tieni dayenli Asuerusi diema nni kuli, lani n tie piiga n cilie, yua yi Adaari, yaa piiga n dataali.

¹³ A tila den pia o bado ñoamabonli, ban baa kpaani yaali diebiga nni kuli, ki waani i nibuoli kuli ke Jufinba baa bogini landaali ki tuu bi yibalinba bi panli.

¹⁴ Lanyogunu a tonda den jagini i taami leni i buomi ki fii ki jaligi, ki gedi tontoni nani o bado n den bili maama. Bi den kpaani li ñoamabonli yeni u dociamu Susi nni moko.

¹⁵ Mardoke den ñani o bado kani ki laa yaa badiliadili n ŋmadi li bonpienla leni mi waanuama, ki ciibi yaa fogilicianga n tie wula, ki goli yaa kpalibu n luni leni len gaali, ki moani. U dociamu Susi yaaba den kpaani ki mangidi bi pala.

¹⁶ Landaali, Jufinba den pia yemanma ki ye leni li pamancianli leni ti kpiagidi.

¹⁷ O bado bali maama leni o ñoamabonli yeni n den pundi yaa diebiga leni yaa dociamu kuli nni, Jufinba den ye leni li pamancianli, ki tieni mi jaanma leni mi jaanjiema. Yaa nibuoli n den ye mi diema nni kuli siiga, bi niba boncianla den lebidi ki tua Jufinba, kelima bi den jie Jufinba boncianla.