Esiteri 6 - U TIENU MAAMA TILI 2013

Hamani janbi ñiadi o 6.1—9.16 O bado teni ke Hamani kpiagi Mardoke

¹ Laa ñiagu, o bado ki den fidi ki guani. O den teni ke bi cuani o kani bi badiba jama tila, ban diani ya yaa niinni mi diema togida, ki teni ke bi cogi o po.

² Bi den cogi Bigitani leni Telesi, yaaba n den tie o bado moagilimu ki guu bu buliñoajabu, n den jagi ke bi baa kpa wani o bado Asuerusi maama ke Mardoke doagidi ki waani bi janbi.

³ Lane wani o bado den yedi: «Mardoke den baa be yaa gagidima leni be yaa kpiagide lipo?» O bado naacenba den guani ki yedi o: «Waa baa puu kuli.»

⁴ Lanwani, o bado den yedi: «Ŋme n ye u luolu nni?» Li den sua lanyogunu lige ke Hamani pundi u luolu nni, ki bua ki mia o bado wan teni ban soadi Mardoke wan den caani o po yaa daagu yeni po.

⁵ Lanwani, o bado naacenba den guani ki yedi o ke Hamani n ye u luolu nni. O den yedi ke wan kua.

⁶ Hamani den kua ke o bado yedi o: «Mini o bado yaa bua ki kpiagi o nilo, n baa tieni o po lede?» Hamani den kpaagi line: «O bado baa yaa bua ki kpiagi ŋme, li yaa tie mini yaa ka?»

⁷ Lane o den guani ki yedi o bado: «Fini o bado yaa bua ki kpiagi o nilo,

⁸ ban taa ŋan la yaa baditiadi leni ŋan jagi yaa taamo ke o yili li bali tannunga yeni,

⁹ ki teni a paatieba yudanba siiga nni yendo ti tiadi leni o taamo yeni, wan bobini ŋan bua ki kpiagi yaa nilo, ki jagini o a taamo, ki yaa dia ki goadi u dogu nni, ki kpaani ki tua mine: ‹Line n tie ban baa yaa tiendi maama o bado n bua ki kpiagi yua po.› »

¹⁰ O bado den yedi Hamani: «Jaligi ki taa ti tiadi leni o taamo nani ŋan yedi maama yeni, ki tieni Mardoke po yeni, yua n tie Jufi ki tuuni n diegu buliñoabu kani. Ŋan tieni likuli ki da poadi liba.»

¹¹ Hamani den taa ti tiadi ki bobini Mardoke, ki teni ke o joagini o taamo ke o dia o ki goadi u dogu nni, ki kpaani ki tua mine: «Line n tie ban baa tieni o bado n bua ki kpiagi yua maama.»

¹² Li yaa puoli, Mardoke den guani ki cua o bado diegu buliñoabu kani ke Hamani mo jaligi ki kuni o denpo, ki libini o yuli bu kpalibu, kelima o paboanli po.

¹³ O den togidi o pua Selesi leni o danlinba kuli yaala n tieni o kuli. O tundikaaba leni o pua Selesi den yedi o: «Ŋan cili ki wadi Mardoke yua yaa nintuali yeni, o yaa tie Jufi buolu, a kan fidi ki tieni o puu, a baa suagi liiga ki yaa wadi ki yaa wadi, hali ki ban tua fanma.»

¹⁴ Ban da den maadi leni o yaa yogunu, o bado moagilimu den cua ki gedini o tontoni Esiteri n go den ŋanbi yaa jaanjiema po.