Esiteri 5 - U TIENU MAAMA TILI 2013

Esiteri kua o bado kani

¹ Li dataali, Esiteri den bobi o puobaditiadi ki kua o bado luolu nni, ki gedi wani o bado dieli nintuali. O bado den kaa o badidieli nni o bali kalikaanu, ke o nunga tiegi bu buliñoabu.

² Wan den laa o puobado Esiteri ke o se u luolu nni yaa yogunu, o pali den mangi boncianla ke o tandi o po wan muubi yaa badigbiamu. Esiteri den nagini o kani ki sii u badigbiamu yeni joma.

³ O bado den yedi o: «Esiteri, be yia ŋa? A bua be? Ba a yaa mia n diema boagidima, n baa pa ŋa.»

⁴ Esiteri den guani ki yedi o: «Li yaa tie ke fini o bado laa ke li ŋani, ŋan cua dinla, fini leni Hamani kuli min ŋanbi a po yaa jaanjiema po.»

⁵ O bado den tuo Esiteri miabu, ki soani ke bi ban yini Hamani tontoni. O bado leni Hamani den gedi ki baa n je Esiteri n den ŋanbi yaa jaanjiema.

⁶ Ban den ñu duven, o bado den yedi Esiteri: «A miabu tie be? N baa pa ŋa la. A bua be? Ba li yaa tie hali n diema boagidima, a baa baa.»

⁷ Esiteri den guani ki yedi o: «Min bua yaala leni min mia yaala tie line:

⁸ Fini o bado pali yaa mani n po, ke a baa guani n po n miabu leni min bua yaala, fini leni Hamani n go cua min baa ŋanbi yi po yaa jaanjiema saala po. Lanwani, saala n baa guani a mi maguankaama nani ŋan yedi maama.»

Hamani bogini ki baa kpa Mardoke

⁹ Landaali Hamani den ñani o puobado kani ke o pali mani boncianla. Ama wan den laa Mardoke o bado diegu buliñoabu kani ke waa fii ki sedi ki digibi o nintuali leni i jeje, o pali den beni boncianla Mardoke po.

¹⁰ Ama ba yeni, o den fidi ki ñii o pali ki ban kuni. Lanwani, o den soani ke bi yini o danlinba leni o pua, yua n yi Selesi.

¹¹ Hamani den waani ba o piama n yabi maama, o bijaba coali leni o bado n den puni o yaa kpiagiciandi, ki teni ke o cie o bado koanbala leni o cancantieba kuli.

¹² O go den yedi: «Yaala n cie lani kuli tie ke o puobado Esiteri den yini mini bebe leni o bado, ke ti bi gedi ki ban dini wan den ŋanbi yaa jaanjiema. O go yini nni saala ke mini leni o bado n cua o kani.

¹³ Ama lani kuli naa tie n po puu, n yaa nua Mardoke Jufi yeni, ke o baa tuuni o bado diegu buliñoabu kani.»

¹⁴ O pua Selesi leni o danlinba kuli den yedi o yaa maama n tie ne: «Ŋan teni ban caani yaa dafoagidigu n pundi nukpanduna piimuu, ke saala ku tiŋaagu, ŋan mia o bado wan teni ban joani Mardoke ki soadi o ku daagu yeni po. Lani yaa pendi, ŋan yegi leni o bado ki gedi mi jaanjiema po ke a pali mani.» Laa maama den mangi Hamani ke o den teni ke bi caani ku daagu.