Esiteri 4 - U TIENU MAAMA TILI 2013

Jufinba yama yagi ke bi loli bu ñoabu

¹ Mardoke n den gbadi yaala n tieni kuli, o den padi o tiadi ki lani li paboanli tiadi, ki wuli oba po mi fantanpienma, ki doagidi o paboanli, ki kua u dogu siiga ki buudi ki kpaani.

² O den sedi o bado diegu buliñoabu kani, kelima li den kua ke yua n yie li paboanli tiadi n kua o bado diegu nni.

³ O bado ñoamabonli leni o bali maama n den pundi mi diema nni naankani kuli, li paboancianli den cuo Jufinba kuli. Bi den luo bu ñoabu ki buudi ki kpaani, ke bi siiga boncianla den yie li paboanli tiadi, ki dua mi fantanpienma nni.

⁴ O puobado Esiteri puotuada leni o moagilimu den cua ki waani o lani kuli, ke i jeje cuo o boncianla. O den soani ti tiayiekaadi Mardoke po, ke wan lebidi li paboanli tiadi yeni, ama waa den gaa ti.

⁵ Lani yaa po, Esiteri den yini Hataki o bado n den puogi yaa moagilimu ban yaa tuuni wani Esiteri po, siiga nni yendo, ki soani o wan ban buali Mardoke lan tie yaala leni yaala yaa po ke o tiendi yeni.

⁶ Hataki den gedi Mardoke po, u dogu fancianma nni, o bado diegu cancanli po.

⁷ Mardoke den togidi o yaala n tieni kuli, ki waani o Hamani n yedi ke o baa tieni o bado ŋalimano nni yaa ligi banlu, o yaa bolini Jufinba kuli.

⁸ O go den teni o ban den kpaani o bado ñoamabonli yaali Susi nni, ke ban bolini Jufinba yeni tila siiga tiyenli. O den teni o li, ke wan ban waani Esiteri ki togidi o mi maama fuuli kuli. O go den yedi Hataki ke wan ban waani Esiteri wan mia o bado wan gbadi wani Esiteri buolu po mi ninñima.

⁹ Hataki den guani ki cua ki togidi Esiteri Mardoke n yedi yaala.

¹⁰ Esiteri go den soani Hataki wan ban yedi Mardoke yaa maama n tie ne:

¹¹ «O bado naacenba kuli leni o diema yaaba kuli bani ke li bali maama bili ke lan tie yuakuli, joa bi pua, o yaa kua o bado luolu nni ke waa yini o, o baa kpe. Ama bonyenla bebe n ye. Lani n tie: yua kua ke o bado tandi o po o badigbiamu yuu n tie wula, wani n baa faabi. Ama mini mo, li pundi dana piitaa ke o bado ki yini nni.»

¹² Ban den guani ki togidi Mardoke Esiteri n yedi yaala,

¹³ o den soani ban ban yedi Esiteri: «Da tama ke Jufinba kuli siiga fini bebe n baa faabi, kelima a ye o bado diegu nni yaa po.

¹⁴ A yaa ŋmini yaa yogunu n tie ne, mi todima baa ña Jufinba po poto, ban faabi. Ama fini, a baa kpe, a baadiegu mo n bodi. Ŋme bani li yàá tie yaa yogunu buolu n tie ne yaa po yaa ka, ke a baa ki tua puobado?»

¹⁵ Esiteri go den soani ban ban yedi Mardoke:

¹⁶ «Gedi ki ban taani yaa Jufinba n ye Susi kuli nni, yin loli bu ñoabu. Yensiinitaa leni ñiaditaa yin da je, yin da ño, ki yaa miadi n po. Nmoko baa tieni yeni mini leni n puotuada. Ti baa loli bu ñoabu. Lani yaa pendi, n baa kua o bado kani ba ke li kua. N yaa baa bodi, min bodi.»

¹⁷ Mardoke den gedi ki ban tieni nani Esiteri n yedi maama.