Esiteri 3 - U TIENU MAAMA TILI 2013

Hamani janbi 3—5 Hamani jagi wan baa bolini Jufinba maama

¹ Laa bonla n den pendi, o bado Asuerusi den duoni Hamedata bijua Hamani. O den tie Agagi buolu yua. O den pugini o ti kpiagidi, ki duoni o bali ke o cie yaa koanbala n ye o diema nni.

² O bado cancantieba, yaaba n den taagi o bado cancanli kuli nni, den gbaandi ki pugi Hamani, kelima o bado den ñani o ñoamabonli ki bili yeni. Ama Mardoke wani den yie ke o kan gbaani ki pugi Hamani.

³ Lanwani, o bado cancantieba, yaaba n den taagi o diegu cancanli nni den buali Mardoke: «Be yaa po ke a miidi o bado maama?»

⁴ Bi den lindi ki buali o laa buali ke waa cengi ba, kelima o den yedi ke o tie Jufi. Lanwani, bi den waani Hamani.

⁵ Hamani moko den laa ke Mardoke yiedi kaa gbaandi ki pugi o. O pali den beni boncianla.

⁶ Bi go den waani o Mardoke n tie yaa buolu yua. O den sua ke o yaa kpa Mardoke bebe, waa ñani yianu. Lanwani, o den bua ki bolini Mardoke buolu, lani n tie yaa Jufinba n den ye o bado Asuerusi diema nni kuli.

⁷ O bado Asuerusi bali piiga n binlieli, o ŋmakpialo, ban yi yua Nisan yaa niinni, Hamani den teni ke bi luni Purimi, lani n tie tiatia. Bi den toani tiatia yeni ki bua ki le ban baa taa yaa ŋmaalo leni yaa daali ki bolini Jufinba. Tiatia den cuo piiga n cilie, ban yi yua Adaari.

⁸ Li yaa puoli, Hamani den yedi o bado Asuerusi: «U nibuolu ye ki yadi yadi a diema nni kuli kaa taa leni yaa nibuolu n sieni. Bi pia yaa bali maama n ki taa leni yaa nibuoli n sieni, baa kubi fini o bado bali maama mo. Bi yaa cedi ba suo, li kan yaa ŋani a po.

⁹ Fini o bado yaa sua ke li dagidi, ŋan ñani a ñoamabonli ki diani ki bili ke ban bolini ba. Lani, n baa taa ŋanjilifa yua yaa kpiagu n pundi kilo tuda kobitaa, ki teni yaaba n kubi i ligi ŋantaadi, ban tieni a ŋalimano nni.»

¹⁰ O bado den pidi o ñoagima ki teni Agagi buolu yua Hamedata bijua Hamani, Jufinba yibali,

¹¹ ki yedi o: «Yaa kubi a ligi, n puni a u nibuolu yeni, ŋan tieni u ŋan bua maama.»

¹² O ŋmakpialo piiga n dataali, bi den yini o bado tidianla ke bi diani Hamani n yedi ba yaala kuli. Bi den diani ki soani mi diema nni kuli bi yudancianba, bi badibaanba leni nibuolu kuli yudanba kani. Bi den diani ki soani diebiga kuli po nani kan dangi maama leni yaa nibuolu n ye ki niinni n maadi yaa mabuolu. Bi den diani nani o bado Asuerusi wani o ba n diani, ki taa o bado ñoagima ki pua ki tieni o maalima.

¹³ Bi den teni a tila yeni a tonda ke bi gedini a o bado diema nni kuli ki teni teni. A tila yeni niinni, li den bili ke ban kpa ki bolini Jufinba kuli, bi nipanba leni a nikpela, a bila leni bi puoba, ki go fagi bi bonpiakaala. Ban bolini bikuli dayenli, piiga n cilie, ban yi yua Adaari, yaa piiga n dataali.

¹⁴ A tila yeni den pia o bado ñoamabonli, ban baa kpaani yaali o diema nni kuli, ki go waani bi niba ban bogini li daali yeni po.

¹⁵ Ban den teni a tila yaa tonda den jaligi ki fii ki gedi nani o bado n puogi ba maama. Bi den kpaani li ñoamabonli yeni u dociamu Susi nni moko. Lani, o bado leni Hamani den kaa ki ñu ke Susi dogu wani womi, ke bi niba kuli gbani wudi.