Esiteri 2 - U TIENU MAAMA TILI 2013

Esiteri tua puobado

¹ Lan den waagi waamu ke o bado Asuerusi pali jiidi, o den tiadi Fasiti po leni wan den tieni yaala leni ban den jagi ke bi baa tieni o yaala kuli.

² Lanwani, o bado naacenba den yedi o: «Ban lingi fini o bado po yaa jafanba n daa bani jaba, ki go pia ti jafandi.

³ Ŋan gandi a diema nni kuli bi niba ki dini ba li bali, ban lingi yaa jafanba n pia ti jafandi, ki soani ba a dociamu Susi nni, ki kuani ba a puoba diegu nni. A moagiliga Ege, yua guu bi puoba, baa yaa kubi ba likani ki yaa tendi ba yaala n baa pugini ba ti jafandi.

⁴ Lanwani, yaa jafaano n dagidi a po n gaa Fasiti kaanu, ki tua o puobado.» Laa tundi den mangi o bado ke o tieni yeni.

⁵ Li den pia u dociamu Susi nni jayendo, ke o tie Jufi buolu yua ki yi Mardoke. O den tie Yayiiri bijua, Yayiiri mo den tie Simeyi bijua, Simeyi mo Kisi bijua, Benjamen buolu yua.

⁶ Babilonni bado Nebukanesa n den ñani Juda bado Yekonia leni o diema yaaba Jerusalemi nni, ki gedini ba ti yonbidi, Mardoke yeni den tie bi siiga yendo.

⁷ O den wubi o baa naataanjaga bisalo Adasa, ban go yi yua Esiteri, kelima o baa leni o naa kuli den kpe. O jafaano yeni bugima leni o nunga kuli den ŋani. O baa leni o naa n den kpe, Mardoke den taa o ki wubi o.

⁸ Ban den kpaani o bado ñoamabonli, bi den taani bi jafanba boncianla, ki gedini ba u dociamu Susi ki teni ba bi puoba guudo Ege. Bi den taa Esiteri moko ki taani ki gedini o leni o jafanlieba, o bado diegu nni.

⁹ Esiteri den dagidi Ege po, ki baa o kani ki nunmanga. O den jaligi ki teni o yaala n tie tiladi ki baa pugini o ti jafandi kuli leni yaala n tie tiladi o miali yema po kuli. O go den gandi o bado diegu nni jafanbilele, ki teni o ban yaa tuuni o po, ki kuani o wani leni o jafanleleediba bi puoba diegu nni, yaa dieli n ŋani ki cie yaa niinni.

¹⁰ Esiteri ki den doagidi ki waani ke o tie Jufi buolu yua, kelima Mardoke den tuodi ki waani o wan da waani.

¹¹ Daali kuli Mardoke den lindi ki poandi bi puoba diegu cancanli nni, ki baa le Esiteri n ye leni maama leni ban tiendi o yaala.

¹² Li den bili ke bi jafanba yeni kuli baa yaa ŋanbidi bi baa hali piiga n ŋmaalilie. Bi baa yaa sogini yaa kpama n yi mili ŋmaaliluoba, yaa ŋmaluobidi n sieni mo ban yaa sogini bi puoba n maani ki sogini yaa tulale. Lanwani, yua yaa yogunu n pundi, bi baa gedini o o bado kani.

¹³ Lani n tie jafaano kuli n yen tieni maama ki nan gedi o bado kani. Jafaano yaa baa ña bi puoba diegu nni ki kua o bado yaa diegu nni, bi yen cedi wan taa wan bua yaala kuli.

¹⁴ O yen gedi ku ñiagu, li yaa fii ki faa wan kua bi puoba dieliegu nni, o bado moagiliga Sagasi yua guu ti puonanbandi n yaa kubi o. O kan go guani o bado po, wani o bado yaa ka bua ki taa o yeli ki yini o.

¹⁵ Mardoke baa naataanjaga Abihayili bisalo Esiteri, Mardoke n den wubi yua, yaa gediyogunu o bado po den pundi. Waa den mia liba se o bado moagiliga Ege yua n den guu bi puoba n den yedi wan taa yaala. Esiteri den baadi ki nunmanga yaaba n laadi o kuli kani.

¹⁶ Bi den kuani o o bado diegu nni, Asuerusi kani, o bali binleleeli. Li den tie cipiiga yaa ŋmaalo, ban yi yua Tebeti.

¹⁷ O bado den bua Esiteri ki cie bi puoba kuli. Wani Esiteri den baa o kani ki nunmanga boncianla ki cie yaa jafanba n sieni. O den cibini o ki puobadifogiliga, ki dini o li bali ke o gaa Fasiti kaanu.

¹⁸ O den tieni mi jaanjiema o diema yudanba leni o naacenba kuli po. O den tieni yeni ki kpiagi Esiteri. O den puni o diema niba kuli mi fuodima, ki go puni bu paabu leni ti bulicindi.

Mardoke waani ke moagilimulie bua ki kpa o bado

¹⁹ Bi go den taani bi jafanba miliema. Lanyogunu Mardoke den tie o bado cancantieba siiga nni yendo ki kaa o bado diegu buliñoabu kani.

²⁰ Esiteri ki den doagidi ki waani ke o tie Jufi buolu yua, kelima Mardoke den tuodi ki waani o wan da waani. O den suagi liiga ki kubi Mardoke ñoamabona nani wan da den ye o kani ki kubi maama.

²¹ Dayenli Mardoke n den kubi o tuonli o bado diegu nni, o bado moagilimu bonbilie, Bigitani leni Telesi, yaaba n den guu o bado diegu buliñoabu, pala den beni o bado po. Bi den jagi ke bi baa kpa o.

²² Mardoke den bandi, ki waani o puobado Esiteri, ke omo waani o bado ki doagidi o po ke Mardoke n waani o.

²³ Ban den diidi ki sua ke li tie moamoani, bi den cuo mu moagililiedimu yeni, ki joani ba ti daadi po ke bi kpe. O bado wani o ba den teni ke bi diani laa bonla kuli bi badiba jama tili nni.