Esiteri 1 - U TIENU MAAMA TILI 2013

Esiteri tua o bado pua 1—2 O bado Asuerusi tieni mi jaanma

¹ Li den tie o bado Asuerusi n den kaa ti gbandi po yaa yogunu. Wani Asuerusi den die yaa diecianma n boagidi kobiga n piilie n diemilele, ki cili Indi diema, ki yaa caa hali Etiopi diema.

² O den ye o diema kuli dociamu Susi nni ki kaa o bali kalikaanu.

³ O bali bintaali, o den tieni mi jaanma o badijaba leni o naacenba kuli po. Persi leni Medi diema toatieba yudanba, mi diema yudanba leni mi paatieba kuli den taani o bado kani.

⁴ O den wangi ba o diema ŋalimani leni o bali n pia yaa kpiagidi kuli. Li den waagi dana boncianla, li den pundi kobiga n dana piinii.

⁵ Laa dana n den pendi, o bado den tieni mi jaanjiema yaa niba n den taani o dociamu Susi kuli nni po, a nikpiaga leni taliginba kuli. Mi jaanjiema yeni den tieni o bado diegu nni, o salidinga fanma nni, ki waagi danalele.

⁶ U kaanu yeni den pia a bunbuna, ban den taa yaa tanŋama n yi marbre ki kpie ya. Bi den taa ŋanjilifa ñoagima ki kpaa ki tabini a bunbuna yeni, ki go taa ban pali yaa gaali leni ti kunkundi ke yi pieni leni i gaalimoani ki tuuni mi ñoagima nni, ke i luo a cabipiena leni mi cabiwaanuama. Bi den duani li nagili fanma yeni niinni yaa tanbila n moani, yaa tanbila n pieni, yaa tanbila n boani leni yaa tanbila ke bi wuli a po yaala n yen taabi u konkuonu tugu nni, ki ñuliti. Bi den bili lankani yaa bonkalikaala n tie wula leni ŋanjilifa.

⁷ Mu tadiñokaamu buolu den yabi, mu kuli den tie wula. Duven den dua boncianla, kelima o bado den puni leni ti bulicindi.

⁸ Baa den teni ke oba ñuni leni paalu, kelima o bado den teni yaa naacenba n ye o diegu nni kuli li ñoamabonli ke ban ŋoadi yuakuli n bua maama.

⁹ O bado pua Fasiti moko den tieni mi jaanjiema bi puoba po o bado Asuerusi badidiegu nni.

O puobado Fasiti yie o calo o bado maama

¹⁰ Li daleleeli, o bado n den ñuni duven ke o pali mangi, o den yini Mehumani, Bisita, Halibona, Bigita, Abagita, Setadi leni Kadikasi, bani yaa moagilileleedimu n den tuuni wani o bado po.

¹¹ O den soani ba ban yini Fasiti wan cua. Ke o yaa kpendi wan yaa ciibi ki badifogiliga bi paatieba leni taliginba kuli n le o ŋamu, kelima o nunga den ŋani boncianla.

¹² Ama mu moagilimu n den caa o puobado Fasiti o bado tondu, o den yie ke o kan gedi. Lani yaa po, o bado pali den beni hali boncianla.

¹³ Wani o bado yaa den pia maamiba, mi yen maadi ki kadi yaaba n bani li bali maama leni li bujiali nintuali. Lani yaa po, o den boe leni bani yaaba n tie o tundikaaba.

¹⁴ Persi leni Medi diema yudanleleediba den tie o tundikaaba yeni siiga tianba. Bani bi yudanleleediba yeni yela nne: Kadisena, Setala, Adimata, Tarsisi, Melesi, Madisena leni Memukani. O bado den pia bi po ti dugidi, ki teni ke bi tugi li yuli ki ŋua o puoli mi diema nni.

¹⁵ O den yedi ba: «N bi soani mu moagilimu ban yini o puobado Fasiti ke o yie waa cua. Li bali maama bili tin tieni o be?»

¹⁶ Bi yudanleleediba yeni siiga yendo, Memukani, den yedi o bado leni o yudanlieba: «O puobado Fasiti ki tieni yaala n bia fini o bado bebe po ka, li bia tinba bi yudanba leni yaa niba n ye fini o bado diema nni kuli yaa po.

¹⁷ Bi puoba kuli baa gbadi o puobado Fasiti n tieni yaala, ki fali bi ciaba. Bi baa yedi: ‹O bado Asuerusi wani n den soani ban yini o puobado Fasiti, waa den yie waa gedi?›

¹⁸ Dinla liiga, Medi diema leni Persi yaama yudanba puoba baa gbadi o puobado n tieni yaala, ki togidi la bi ciaba kani. Yeni mo bi puoba faliga baa fiini bi jaba pala.

¹⁹ Fini o bado yaa sua ke li ŋani, ŋan ñani a ñoamabonli ban kpaani ki go diani ki bili Persi diema leni Medi diema kuli yaa bali maama nni, ke li kan lebidi abada, ke Fasiti kan go cua a kani. Ŋan teni nitoa, yua n cie o, li puobali.

²⁰ Ba a diema n yabi maama kuli, bi baa gbadi i kaani kuli ŋan ñani yaa ñoamabonli. Lanwani, pua kuli baa kpiagi o calo, o yaa tie niciamo bi o yaa tie taliga.»

²¹ Laa tundi den mangi o bado leni bi yudanba kuli, ke o bado den tieni nani Memukani n yedi maama.

²² O den soani a tila o diema nni kuli. Bi den diani ki soani diebiga kuli po, nani kan dangi maama leni yaa nibuolu n ye ki niinni n maadi yaa mabuolu. Laa tila den bili ke joa kuli baa yaa die o diegu nni, ki yaa maadi o buolu maama o diegu nni.