Esidirasi 9 - U TIENU MAAMA TILI 2013

Jufinba boncianla taa bi nilanpuoba

¹ Lani kuli n den tieni ki gbeni, Isidayeli yaaba yudanba bi tianba den cua n kani ki yedi nni: «Isidayeli yaaba kopadicianba, Levi buolu leni bi nifanba naa gagidi bi yula ki paadi leni yaa nilanbuoli n ye yaa diema n tie ne niinni. Bi tuuni a cancagintuona, ki togidi Kanana yaaba, Hititi yaaba, Perisiti yaaba, Jebusi yaaba, Anmoni yaaba, Moabi yaaba, Ejipiti yaaba leni Amori yaaba tuona.

² Bi taa bi nilanba yeni bisiaba bani leni bi bijaba po, ki tieni bi puoba. Li teni ke ti nibuolu yuu n gagidi U Tienu po kali kali leni yaa nilanbuoli n ye mi diema ne niinni. Bi yudanba leni bi bujiaba n cili laa tuonbiadi.»

³ Min den gbadi lani, n pali den boandi ke n padi n tiayiekaadi leni n kpaligolikaabu kuli, ki ŋabi n yudi leni n langbiadi, ke n gbanu wudi ke n kali.

⁴ Isidayeli Tienu maama n den jieni yaaba kuli, kelima yaaba n den ñani ti yonbidi yeni n den tieni yaa tuonbiadi po, den taani n kani. Nmo, n gbanu den wudi ke n kaa hali ki pundi ku yenjuagu padili yogunu.

Esidirasi jaandi ki mia sugili ti tuonbiadi danba po

⁵ Ku yenjuagu padili yogunu n den pundi, n den fii min den boandi n pali ki jiini n yuli ki la n tiapadindi ki kaa naankani yeni. N den gbaani ki yugidi n nii, ki tandi ki tegini o Diedo n Tienu

⁶ ki yedi o: «N Tienu, i fe pia nni hali boncianla, ke n yuli tiibi. N Tienu, n kan fidi ki yaadi n yuli ki diidi a. Ti tagili yabidi hali ki milini ti, ti tuonbiadi dogini ki pundi tanpoli.

⁷ Hali ti yaajanba yogunu ki taa ki pundi hali moala, ti tieni ti tuonbiadi boncianla. Li tie ti tuonbiadi po ke a den taa ti, tinba, ti badiba leni ti kopadicianba ki tieni i nilanbuoli badiba nuu nni, ke bi den tuogi leni ti bu toabu ki paadi ti, ki fagi ti ki gedini ti ti yonbidi, ke dinla i fe kubi ti.

⁸ Ama ba yeni, a gbadi ti po mi ninñima yaa yoginjenga n tie ne po, ki teni ke ki nitianga faabi, ki go puni ti u kuakaanu a kaangagidiŋamu nni. Yeni, a yendi ti nunmu ki faabi ti ti yonbidi siiga.

⁹ Ti den ye ti yonbidi nni, ama ŋaa ŋaa ti lienni ti bebe. A teni ke Persi diema badiba gbadi ti po mi ninñima, ki cedi ke ti ye ki fo ki guani ki maa fini ti Tienu diegu yaagu n den mudi, ki teni ke ti baa kuakaanmoanu Juda diema nni leni Jerusalemi nni.

¹⁰ Moala, ti Tienu, ti baa yedi be lani kuli yaa puoli? Ti yie ki ŋaa a bali maama,

¹¹ ŋan den bili ti po yaama ki teni ke a saawalipuaba pua saawali ki tua: ‹Yin caa yaa diema nni ki baa n diedi ma yeni tie yaa diema n joagini, kelima yaa nibuolu n ye mi diema yeni niinni joagindi po. Bi gbieni ma bi cancagintuona ki cili napo yaa kunu ki gedi hali napo yaa kunu.

¹² Lani yaa po, yin da pa yi bisiaba bi bijaba, yin da taa bi bisiaba mo yi bijaba po. Yin da todi ba bi yema n mangi ban baa mi yanduanma. Lani, yi baa baa u fidu, yi baa je mi diema n pia yaa bonŋanla ki ŋaa man tua faali yi bila po hali yaa yogunu kuli.›

¹³ Fala cuo ti kelima tin den tieni yaa tuonbiadi leni yaa tagiliciami po. Ama ba yeni, ti Tienu ŋaa waani ti fala nani ti tuonbiadi n den pundi maama. A go kubi tinba yaa niba n sieni ti yonbidi nni, ke ti ye.

¹⁴ Naani lani kuli yaa puoli, ti go baa miidi a kuali ki taa yaa nibuolu n tuuni li cancagintuonli ne bisiaba ki go teni ba ti bisiaba? Naani a pali kan fii ki pebidi hali ki bolini ti cain ki kan ŋaa liba?

¹⁵ O Diedo, Isidayeli Tienu, a tiegi. Dinla ŋan faabi tinba yaaba, ti taani ki ye a nintuali leni ti tuonbiadi, ama ti kan bi baa ki yaa ye a nintuali leni ti tuonbiadi.»