Esidirasi 7 - U TIENU MAAMA TILI 2013

Esidirasi leni Nehemi gobidi Isidayeli yaaba 7—10 O kopadiciamo Esidirasi kpenma

^1-5 Lani kuli n den pendi, Esidirasi den kpeni Jerusalemi, Persi diema bado Aritakiselisesi bali yogunu. Esidirasi yeni den tie Seraya bijua, bi kopadicianba bado Alono puoliŋuanu yua. Alono den mali Eleasari, Eleasari n maa Finea, Finea n maa Abisua, Abisua n maa Buki, Buki n maa Usi, Usi n maa Seraya, Seraya n maa Melajoti, Melajoti n maa Asariya, Asariya n maa Amaria, Amaria n maa Ahitubi, Ahitubi n maa Sadoki, Sadoki n maa Salumi, Salumi n maa Hilikiya, Hilikiya n maa Asariya, Asariya n maa Seraya, Seraya mo n maa Esidirasi.

⁶ Esidirasi yeni den ñani Babilonni ki guani ki kpeni Jerusalemi. O den tie li bali maama bando, ki bani o Diedo Isidayeli Tienu n den teni Musa yaa bali maama hali bonŋanla. O bado den teni o wan mia o yaala kuli, kelima o Diedo o Tienu den ye leni o ki ŋanbi o po.

⁷ O bado Aritakiselisesi bali binleleeli binli, Isidayeli yaaba siiga bi tianba, bi kopadiciantianba, Levi buolu bi tianba, bi yanyinba bi tianba, a buliñoaguuda bi tianba leni U Tienu diegu naacenba bi tianba den yegi leni

⁸ Esidirasi ki kpeni Jerusalemi. Esidirasi den pundi Jerusalemi o bado bali binleleeli binli cimuulo.

⁹ O den fii Babilonni o ŋmakpialo dakpiali, ki ban pundi Jerusalemi o cimuulo dakpiali, kelima U Tienu den ye leni o, ki kubi o.

¹⁰ Li den tie yeni kelima Esidirasi den kuani o yama ki bangi o Diedo bali maama, ki go kubi ma ki tieni man yedi yaala, ki go bangi Isidayeli yaaba U Tienu bali maama yeni leni o ñoamabonbilikaana kuli.

O bado Aritakiselisesi n puogi Esidirasi yaa tuona

¹¹ O bado Aritakiselisesi den diani li tili ki teni Esidirasi yua n den tie o kopadiciamo leni li bali maama bando, ki go dangi o Diedo n den bili yaa bali maama leni yaa ñoamabonbilikaana Isidayeli yaaba po. Li tili yeni maama den tie mine:

¹² «Mini Aritakiselisesi, bi badiba bado, n diani fini Esidirasi po yaa tili n tie ne, fini yua n tie o kopadiciamo leni li bali maama bando, ki bani bonŋanla U Tienu yua n die tanpoli bali maama.

¹³ N ñani li ñoamabonli ki yedi ke Isidayeli yaaba, bi kopadicianba leni Levi buolu, yaaba n ye n diema nni kuli, ki bua ki fii ki yegi leni a ki gedi Jerusalemi kuli, ban cedi ban gedi.

¹⁴ Mini o bado leni n cancantie-leleediba soani a ŋan ban goandi Juda diema leni Jerusalemi kuli, ki bandi li bonla kuli yaa cuoni ki ŋua a Tienu bali maama, yaama n ye a nuu nni yeni.

¹⁵ A yaa caa, ŋan taa mini o bado leni n cancantieba yeni n tia ki puni yaa ŋanjilifa leni yaa wula Isidayeli Tienu yua yaa diegu n ye Jerusalemi po.

¹⁶ Ŋan go taa yaaba n ye Babilonni diema nni kuli n puni yaa ŋanjilifa leni yaa wula, Isidayeli yaaba leni bi kopadicianba n puni yaa paabu bi Tienu diegu yaagu n ye Jerusalemi po.

¹⁷ Ŋan kubi laa ligi bonŋanla, ki ban daa a naatona, a petona, a pebila leni yaala n baa dagidi mi pienma pada leni a ñincaba po kuli, ki padi likuli a Tienu diegu yaa padibinbinli yaali n ye Jerusalemi po.

¹⁸ Fini leni a kpiiba baa juogi ki bili yin baa tieni yaala leni yaa ŋanjilifa leni yaa wula n baa sieni, ki ŋoadi yi Tienu n bua maama.

¹⁹ Tin den teni yaa tadimu a Tienu diegu tuonli po, ŋan gedini ki ban bili mu wani U Tienu diegu nni Jerusalemi po.

²⁰ Ŋan go baa bua yaa ligi a Tienu diegu po, ŋan gaa yi mini o bado ŋalimanbilikaanu nni.

²¹ Mini o bado Aritakiselisesi n ñani li ñoamabonli, ke yaa ŋalimankubida n ye Efrati nintuali diema nni kuli n jaligi ki teni Esidirasi yua n tie o kopadiciamo leni U Tienu bali maama bando, ki bani tanpoli Tienu bali maama bonŋanla, wan mia ba yaala kuli.

²² Ban teni o hali ki pundi ŋanjilifa kilo tudanaa (4 000), mi kpama kilo tuda piitaa (30 000), duven litidi tudanaa, mi kpama litidi tudanaa leni yaa yaama n baa dagidi kuli.

²³ Yin jaligi ki tieni U Tienu yua n die tanpoli n puogi yaala o diegu tuonli po kuli, ke o pali n da ti be n diema po leni n bijaba po.

²⁴ Ti go bua ki waani yi ke yin da gaa bi kopadicianba kani, Levi buolu, U Tienu diegu yanyinba, li buliñoaguuda, li naacenba leni yaaba n tuuni U Tienu diegu nni kuli kani bancanli, lubili bi i sani tagima ligi.

²⁵ Fini Esidirasi mo, ŋan dini yaaba n baa yaa ja ti buciandi leni ti buwaadi Isidayeli yaaba po, bani yaaba n ye Efrati diema nintuali kuli, ki bani a Tienu bali maama. Ŋan dini ba nani U Tienu yanfuoma, yaama n ye a niinni n waani a maama. Yaaba n daa bani U Tienu bali maama mo, ŋan bangi ba.

²⁶ Yua n yie kaa kubi a Tienu bali maama leni mini o bado yaa bali maama kuli, ban cuo o wan dagidi nni yaa cuonu, ki kpa o, yaa ka ban ñani o o lieba siiga, yaa ka ban fie o bonpiakaala, yaa ka ban kuani o li kpaadidieli nni.»

Esidirasi tuondi U Tienu

²⁷ Esidirasi den jaandi ki yedi: «Ti tuondi ki kpiagidi o Diedo, ti yaajanba Tienu, yua n den kuani o bado yama nni ke wan jigini o Diedo diegu yaagu n ye Jerusalemi,

²⁸ ki go teni ke n baa ki nunmanga o bado yeni kani, o cancantieba leni o paatieba kuli kani. O Diedo n Tienu den paagi nni ke n taani Isidayeli yaaba yudancianba siiga bi tianba, ke bi fii ki yegi leni nni ki kpeni.»