Esidirasi 6 - U TIENU MAAMA TILI 2013

O bado Dariyusi maguankaama

¹ O bado Dariyusi den ñani li ñoamabonli, ke ban lingi a tikpela n bili yaa dieli nni Babilonni po.

² Bi den lingi ki laa Medi dociamu Akimeta nni, li tigbabikaali ke bi diani lipo yaa maama n tie ne:

³ «O bado Sirusi bali binkpiali binli, o den ñani yaa ñoamabonli n tie ne: Ban guani ki maa U Tienu diegu yaagu n ye Jerusalemi, kun yaa tie ban baa yaa padi a pada naankani. Ban cili li tanpuuli lin yaa pa. Li kpedima baa yaa tie nukpanduna piiluoba, le pianu mo nukpanduna piiluoba.

⁴ Bi yaa ŋuani a tana ŋuanitaa, ban ŋuani ti daadi ŋuanyendu. Bi baa ñani mini o bado ligikpaku nne i ligi, ki pa laa tuonli po.

⁵ Nebukanesa n den fie yaa wula leni yaa ŋanjilifa tadimu Jerusalemi U Tienu diegu nni ki gedini Babilonni, ban taa mu ki guani ban guani ki ban bili mu Jerusalemi U Tienu diegu nni, tadiga kuli ki kaanu.»

⁶ Lani yaa po, Dariyusi den diani li tili ki yedi: «Fini Tatinayi yua n tie Efrati nintuali guveneeri, fini Setadi-Bosinayi leni yinba bi paatieba Afalisaki yaaba, yaaba n ye Efrati diema nintuali kuli, yikuli n fuadi mani ki cedi ba.

⁷ Yin cedi ban yaa tuuni U Tienu tuonli, Jufinba guveneeri leni bi yudanba n guani ki maa U Tienu diegu yeni, kun den kpa ye naankani.

⁸ N bili yi po yaa ñoamabonli n tie ne, ki waani yi yin baa tieni yaala ki todi Jufinba yudanba yeni, ban guani ki maa U Tienu diegu. Yin ñani mani Efrati nintuali yaaba n pa yaa lubili ke li tie mini o bado ŋalimano yeni niinni, ki teni Jufinba yudanba yaa ligi n tie tiladi li tuonli yeni po kuli, ke laa tuonli n da sedi ba waamu.

⁹ Yin yaa puuni yaa kopadicianba n ye Jerusalemi n baa yaa miadi yi yaala daali kuli, lani n tie yaala n tie tiladi Tanpoli Tienu padijuukaana po, a naatonbila, a petona leni a pebila, ŋalikama, mi yaama, duven leni mi kpama. Liba kuli n da poadi.

¹⁰ Lani n tie ban yaa padi U Tienu yua n die tanpoli po yaa pada n baa yaa mani o po, ki miadi o o bado leni o bijaba miana po.

¹¹ Diidi ki le min bili yaa ñoamabonli yua n yie laa maama kuli po: Ban fidi o diegu ki ñani ku dafoagidigu lienni ki caani ki joani o ku po, ki mudi o diegu kun tua diegbengu.

¹² U Tienu yua n gandi Jerusalemi ke lan yaa tie ban baa yaa kpiagidi o naani, n bolini yaa bado bi yaa nibuolu n baa yie n maama, ki biigi ke o baa bolini U Tienu diegu yaagu n ye Jerusalemi. Mini Dariyusi, n bili yaa ñoamabonli n tie ne: Yin tieni cap cap min yedi yaala.»

¹³ Tatinayi, yua n den tie Efrati nintuali guveneeri, Setadi-Bosinayi leni bi lieba den tieni cap cap o bado Dariyusi n den ñani bi po yaa ñoamabonli yeni.

¹⁴ Jufinba yudanba den suagi liiga ki maa ke U Tienu saawalipuaba Age leni Ido bijua Sakari den tundi ba, ki paagidi bi pala ke li den cuoni bonŋanla. Bi den maa ki gbeni nani Isidayeli Tienu ñoamabonli n den bili maama, Persi diema badicianba Sirusi, Dariyusi leni Aritakiselisesi kuli ñoamabona n den bili maama.

¹⁵ Bi den maa U Tienu diegu yeni ki gbeni Adaari ŋmaalo dataali, o bado Dariyusi bali binluobili binli.

U Tienu diegu gagidima jaanma

¹⁶ Isidayeli yaaba, bi kopadicianba, Levi buolu leni yaaba n sieni ki ñani ti yonbidi nni ki kpeni kuli, den jaani ki gagidi ki ŋanbi U Tienu diegu leni li pamanli.

¹⁷ Ku diegu yeni gagidima po, bi den padi naatona kobiga, petona kobilie leni pebila kobinaa, ki go padi Isidayeli yaaba kuli tuonbiadi po piiga n ŋuabuanalie, nani Isidayeli buolu coali n da maama.

¹⁸ Bi go den boagidi bi kopadicianba leni Levi buolu moko caga caga, ki ŋoadi lan den bili ke cagili kuli baa yaa tuuni yaala U Tienu tuonli nni Jerusalemi po, nani lan diani Musa tili nni maama.

Jufinba jaani mi Pendima jaanma

¹⁹ Yaaba n den ñani ti yonbidi nni ki kpeni yeni den jaani mi Pendima jaanma li binlieli o ŋmakpialo piiga n danaali daali.

²⁰ Bi kopadicianba leni Levi buolu den taani ki ŋanbi bi baa, ki gagidi bi yula U Tienu po. Bikuli den gagidi ki ŋani cain. Levi buolu den kodi mi Pendima jaanma pebimu yaaba n den ñani ti yonbidi nni ki kpeni kuli po, bi kpiiba bi kopadicianba po leni bi yaa yula po kuli.

²¹ Isidayeli yaaba, yaaba n den ñani ti yonbidi nni ki kpeni den taani ki dini mi Pendima jaanma jiema, yaaba n den paadi leni bi tuonjoagindi ki taani leni Isidayeli yaaba ki lingi o Diedo Isidayeli Tienu leni payenli.

²² Bi den jaani yaa dupen n ki pia dabinli jaanma leni li pamanli hali danalele. O Diedo den mangi bi pala, kelima o den kuani Asiiri yaaba bado yama nni ke o todi ba leni wani Isidayeli Tienu diegu tuonli.