Esidirasi 5 - U TIENU MAAMA TILI 2013

U Tienu diegu maama goacilima

¹ Bi saawalipuaba Age leni Ido bijua Sakari, den pua saawali Jufinba yaaba n den ye Jerusalemi leni Juda dogi yii n sieni po, ki waani ba Isidayeli Tienu n yedi ba yaala.

² Lanwani, Seyalitieli bijua Sorobabeli leni Yotisadaki bijua Josue den fii ki cili ki maa U Tienu diegu Jerusalemi, ke U Tienu saawalipuaba ye leni ba, ki todi ba.

³ Lanyogunu Tatinayi yua n den tie Efrati kpenu nintuali guveneeri, Setadi-Bosinayi leni bi lieba den cua ki laa ba, ki buali ba: «Ŋme puni u sanu yin guani ki maa ku diegu ne leni i bilini?

⁴ Yaaba n maa yi lede?»

⁵ Ama U Tienu den kubi Jufinba yudanba. Lani, baa den teni ke bi sieni li tuonli yeni, hali ban soani ke bi waani Dariyusi ki guani ki waani ba wan yedi yaala laa bonla po.

Bi kuli Jufinba o bado Dariyusi kani

⁶ Tatinayi yua n den tie Efrati kpenu nintuali guveneeri, Setadi-Bosinayi leni bi lieba Afalisaki yaaba, yaaba n ye u kpenu nintuali n den diani yaa tili ki soani o bado Dariyusi kani n tie ne.

⁷ Bi den diani ki yedi: «Ti fuondi a o bado Dariyusi.

⁸ O bado, ti bua ki waani a ke ti gedi U Tienu yua n yabi diegu kani, Juda diema nni. Bi maa ku leni a tanciama, ki maandi ti daadi i bilini po. Bi tuuni bonŋanla, li tuonli mo cuoni tontoni.

⁹ Ti den buali bi yudanba yua n puni baa u sanu ban maa ku diegu leni i bilini yeni.

¹⁰ Ti go den buali ba bi yela, ki diani yaaba n gobidi li tuonli yela ke ŋan bandi ba.

¹¹ Bi den guani ki yedi: ‹Ti tie U Tienu yua n die tanpoli leni ki tinga naacenba. Ti guani ki maa Isidayeli badiba siiga yendo n den maa ki gbeni yaa diegu hali bina bina puoli po.

¹² Ama ti yaajanba den fiini U Tienu yua n die tanpoli pali ke o taa ba ki tieni Kalide yua Nebukanesa, Babilonni bado nuu nni ke o mudi mudi laa diegu, ki cuo bi niba ki gedini ti yonbidi Babilonni po.

¹³ Die Sirusi n den diedi Babilonni yaa binli, o den ñani li ñoamabonli ke ban guani ki maa U Tienu diegu.

¹⁴ O bado Nebukanesa n den fie yaa wula leni yaa ŋanjilifa tadimu Jerusalemi U Tienu diegu nni ki ban bili Babilonni budieli nni, o den teni ke bi taa mu ki teni Sesibatisadi, wan den dini yua Juda guveneeri.

¹⁵ O den yedi ke wan taa ki gedini mu Jerusalemi ki ban kuani mu U Tienu diegu nni, bi yaa ti guani ki maani gu ku kaankpelu.›

¹⁶ Lanwani, laa Sesibatisadi cua Jerusalemi ne ki cili U Tienu diegu tanpuuli. Ki cili lanyogunu, ki taa ki pundi hali moala, bi maa ku, ama ku daa gbeni.

¹⁷ Moala o bado, a yaa sua ke li dagidi, ŋan teni ban lingi yaa tila n maadi Babilonni badiba maama nni, ki le li yaa tie moamoane ke o bado Sirusi den teni li ñoamabonli ke ban guani ki maa U Tienu diegu Jerusalemi. Li yaa puoli, ŋan waani ti ŋan jagi yaala li po.»