Esidirasi 3 - U TIENU MAAMA TILI 2013

Bi guani ki maa U Tienu diegu 3—6 Jufinba go cili ki padi a pada U Tienu po

¹ Cilele n den ñani, Isidayeli niba, yaaba n den ye bi dogi nni kuli den fii ki taani nani niyendo, ki gedi Jerusalemi.

² Yotisadaki bijua Josue, o kpiiba o kopadicianlieba, Seyalitieli bijua Sorobabeli leni o kpiiba, den fii ki guani ki maa Isidayeli Tienu padibinbinli, ki baa yaa padi li po a padijuukaana nani lan diani ki bili U Tienu nilo Musa bali maama tili nni maama.

³ Ba ke bi den jie yaa nilanbuoli n den cua ki kali mi diema nni, bi go den maa li padibinbinli yeni, lin den kpa ye naankani, ki padi li po a padijuukaana o Diedo po ku tiŋaagu leni ku yenjuagu kuli.

⁴ Li yaa puoli, bi den jaani a suga jaanma nani lan diani ki bili maama, ki padi a padijuukaana ke a coali da leni lan diani ki bili maama daali kuli pada po.

⁵ Laa jaanma puoli, bi den suagi ki padi daali kuli yaa padijuukaana nani lan den diani ki bili yaa padijuukaana i ŋmapaani po leni yaa jaanma n den gagidi o Diedo po. Bi go den padi yuakuli n den puuni o Diedo yaala o yama po.

⁶ Yeni, cilele dakpiali, bi den guani ki cili ki padi a padijuukaana o Diedo po, ba ke bi daa den cili o Diedo diepangu tanpuuli.

Bi guani ki cili ki maa U Tienu diegu

⁷ Bi den taa i ligi ki teni yaaba n baa kpie a tana leni yaaba n baa kpie ti daadi. Bi go den teni Sidon leni Tiiri dogi yaaba mi jiema, li bonñokaala leni mi kpama, ke ban pedi Liban sediri tiidi daadi, ki kpieni ti mi ñima nni, ke u ñinfaalu n tugi ki cuani ti hali Jafa dogu kani. Likuli den tieni nani Persi bado Sirusi n den puni u sanu maama.

⁸ Ban den guani ki kpeni Jerusalemi, o Diedo diegu n ye yaa dogu nni, bi binlieli cilielo nni, Seyalitieli bijua Sorobabeli, Yotisadaki bijua Josue, bi kpiiba bi kopadicianba, Levi buolu leni yaaba n den taani leni ba ki ñani ti yonbidi nni ki kpeni Jerusalemi kuli, den cili li tuonli. Bi den puogi Levi buolu, yaaba n pia bina piilie leni yaaba n cie yeni kuli, ban yaa gobidi o Diedo diegu tuonli.

⁹ Levi buolu yua Josue, o bijaba, o kpiiba, Juda buolu yua Kadimieli, o bijaba leni Henadadi bijaba kuli den taani ki baa yaa gobidi o Diedo diegu tuonsoanba.

¹⁰ Bi tanmaaba n den puu o Diedo diegu tanpuuli yaa yogunu, bi yudanba den teni ke bi kopadicianba nagini ki la bi tiagagidikaadi, ki kubi kakacinba, ki go teni ke Levi buolu yua Asafi bijaba nagini ki kubi ti kupandi, ki baa pagi o Diedo nani Isidayeli bado Davidi n den bili maama.

¹¹ Bi den yiini ki kpiagidi o Diedo, ki pagi o leni yaa maama n tie ne: «O Diedo ŋani, o ŋanbili Isidayeli yaaba po ye hali yaa yogunu kuli!» Ku niligu den kpaani ki pagi o Diedo, kelima bi den cili o Diedo diegu tanpuuli.

¹² Ama bi kopadicianba, Levi buolu leni bi diedanba siiga, bi nitianba, yaaba n kpeligi, ki den laa ku diekpiagu, den buudi boncianla ban cili laa diegu tanpuuli bi nunbu nni yaa yogunu. Nitoaba boncianla mo den kpaani li pamancianli kpaani,

¹³ hali ke baa den fidi ki gagidi yaa fuugu n tie li pamanli fuugu leni yaa fuugu n tie a bubula, kelima ku niligu den kpaani yaa kpaani n yabi hali ke yaaba n ye foagima gba.