Esidirasi 1 - U TIENU MAAMA TILI 2013

Yaaba n ñani ti yonbidi ki kpeni 1—2 Sirusi puni u sanu ban guani ki maa U Tienu diegu

¹ Persi diema bado Sirusi bali binkpiali binli, o Diedo den jagi ke o baa tieni wan den teni ke o saawalipualo Jeremi yedi yaala. O Diedo den teni ke Persi diema bado Sirusi yeni baa li yantiali, ki ñani li ñoamabonli ki diani li ki soani o diema nni kuli, ki yedi:

² «Mini Persi diema bado Sirusi yedi yaa maama n tie ne: o Diedo U Tienu yua n die tanpoli puni nni ŋanduna diema kuli, ke n die ma. O puogi nni min maa o diegu Jerusalemi dogu nni, Juda diema nni.

³ Yi siiga, ŋme n tie U Tienu nibuolu? Wan fii ki gedi Jerusalemi Juda diema nni, o Tienu n yaa ye leni o, wan ban maa o Diedo Isidayeli Tienu po ku diegu. Laa Tienu n ye Jerusalemi.

⁴ Isidayeli yaaba n ye naankani kuli, likani yaaba n todi ba ki pa ba ŋanjilifa, wula, tiatoadi, ti yandi, ki go pa bi yama po U Tienu diegu yaagu n ye Jerusalemi maama yeni po.»

⁵ Juda leni Benjamen buoli yudanba, bi kopadicianba leni Levi buolu kuli siiga, U Tienu n den kuani yaaba yaa yama nni mi kunma yantiali kuli, den bogini ki baa gedi Jerusalemi ki ban maa o Diedo diegu.

⁶ Ban den ye yaaba siiga kuli den puni ba yaa tiadi n tie ŋanjilifa, wula, tiatoadi, ti yandi leni yaa paabu n pia mayuli, kaa taa leni ban den puni yaala kuli bi yama po.

⁷ Babilonni bado Nebukanesa n den fie yaa tiadi kuli Li Miali Diedo diegu nni Jerusalemi po yeni, o den ban kuani ti o budieli nni. Persi bado Sirusi den taani ti ki guani Jerusalemi.

⁸ Wani Sirusi den teni ke mi diema ŋalimankubilo Metiledati ñani ti o bulo yeni dieli nni, ki teni Juda diema badijoa Sesibatisadi.

⁹ Ti coali n tie ne: Wula, tadibuomu piitaa, ŋanjilifa tadimu tudili, mu jugimu piilie n bonmuyia,

¹⁰ wula tadikuamu bonmu piitaa, yaa ŋanjilifa tadiñokaamu n ŋani nani mu liemu, bonmu kobinaa n piiga leni tiatoadi bondi tudili.

¹¹ Yaa tiadi n den tie wula leni ŋanjilifa kuli yaa coali den pundi tudamuu n kobinaa (5 400). Sesibatisadi leni o yonbilieba n den ña ti yonbidi ki baa kuni, o den taa laa tiadi kuli ki guani ti Jerusalemi.