Esekieli 9 - U TIENU MAAMA TILI 2013

U Tienu n waani Jerusalemi yaa fala

¹ Lani n den gbadi ke o Diedo maadi leni u nialiciamu ki yedi: «Yinba yaaba n baa faligi u dogu yeni, yuakuli n muubi mi bolinma jatiagu ki nagini.»

² N den laa ke nibiluoba ñani nujienu buliñoabu po, yaabu n yuugi kani, ke yuakuli mo muubi mi bolinma jatiagu o nuu nni. Yaa joa yaa tiadi n den luni leni len ke o bondiankaala juani o gbanñagidigu mo den yegi leni ba. Bi den cua ki sedi ti kumoandi padibinbinli kani.

³ Isidayeli Tienu kpiagidi yaadi n den yiini selubanba po yeni, den pegidi ki teli U Tienu diegu buliñoatuogili kani. U Tienu den yini yaa joa n den laa yaa tiadi n luni leni len gaali, ke o bondiankaala mo juani o gbanñagidigu yeni,

⁴ ki yedi o: «Kua Jerusalemi dogu nni ki tieni mi maalima yaaba n laadi fala ki buudi yutuna po, kelima yaa cagindi n tiendi u niinni po.»

⁵ Min den cengi, n den gbadi ke o yedi yaa niluobidiba n sieni: «Ŋoadi o mani, ki kua u dogu nni, ki kpa. Ninñimiba n da cuo yi, yin da ŋaa ba.

⁶ Kpa mani ba ki bolini a jakpela, bi jawaaba leni bi jafanba, a bila leni bi puoba. Ama yin da sii yua n pia mi maalima o yutunli po kuli. Yin cili n diegu kani.» Bi den cili ki kpa yaa nikpela n ye U Tienu diegu kani.

⁷ O Diedo den yedi ba: «Joagini mani n diegu, ki gbieni ku luoli kuli bi tinkpiba, ki suagi liiga.» Bi den ñani ki kua u dogu nni, ki kpa bi niba.

⁸ Ban den kpaani yaa yogunu, bi den ŋaa mini bebe ke n se. N den baa tiipo ki tiani ki yedi: «Ŋain, o Diedo U Tienu, a baa wuli a pabienli Jerusalemi po, ki bolini Isidayeli yaaba, yaaba n sieni?»

⁹ O den guani ki yedi nni: «Isidayeli leni Juda yaaba n tieni yaa tuonbiadi yabi hali boncianla. Mi diema gbie leni mi nisoama ke u dogu mo gbie leni ti tuonbiadi, kelima bi tua: ‹O Diedo ŋaa mi diema. O Diedo kan fidi ki le liba kuli.›

¹⁰ Lanwani, mini moko, ninñima kan cuo nni bi po, n kan ŋaa ba fanma, ama n baa pa ba bi tuona panpaani.»

¹¹ Yua n den la len tiadi, ke o bondiankaala mo juani o gbanñagidigu yeni, den yedi mi naa maama: «N tieni nani ŋan bi puogi nni maama.»