Esekieli 8 - U TIENU MAAMA TILI 2013

I buli ŋoadima U Tienu diegu nni

¹ Juda yaaba yonbidi binluobili, ciluoba damuuli, n den kaa n dieli nni leni Juda nikpela, ke o Diedo U Tienu nuu jiidi n po, ki cuo nni.

² N den laa o nisaalo nannanli ke li ñani. Ki cili yaala n den naani leni o ciaga, ki jiidi hali tinga po, den moani nani u mu yeni. Ki ji taa ki pundi hali o yuli mo, den tie nani yaa kudi n tongi ki ñuliti yene.

³ O den tandi yaala n den naani leni o nuu, ki cuo n yudi. U Tienu n den soani n po yaa bonlekaala yeni niinni, U Tienu Fuoma den yugidi nni mi fawaama nni ki gedini nni Jerusalemi. N den sua ke n ye u dogu nujienu po buliñoabu kani tugu nni, ke li nunponli bulo, yua n fiindi o Diedo nunponli mo se likani.

⁴ Isidayeli Tienu kpiagidi den doagidi n po, nani min den kpa laa ti maama ku joaloangu nni.

⁵ U Tienu den yedi nni: «Nisaalo biga, yaadi ki diidi nujienu po kalu.» N den yaadi ki diidi nujienu po, ki laa U Tienu n nani yaa bulo yeni, ke o ye li padibinbinli buliñoabu kani.

⁶ O den yedi nni: «Nisaalo biga, a nua ban tiendi yaala? Diidi Isidayeli yaaba n tiendi yaa caginciandi ki bua ki teni min foagidi leni n kaangagidiŋamu. Ama a go baa le cagintoadi yaadi n bia ki cie tine.»

⁷ O go den gedini nni o diegu cancanli kani, ke n laa ke li bonli ye li goanli nni.

⁸ U Tienu den yedi nni: «Nisaalo biga, cibi li goanli li bonli.» N den cibi li goanli li boncianli.

⁹ O go den yedi nni: «Kua ki le ban didi go tiendi yaa cagindi nekanba.»

¹⁰ N den kua ki sua ke bi diani ki nandi a goana po, li bonbalinkaala buoli, i we buoli leni ti yanjoagindi buoli kuli, ke Isidayeli yaaba buli kuli den diani ki nandi lipo.

¹¹ Isidayeli yaaba buolu nni, nikpela piilele, Safani bijua Yaasania n den ye yaaba siiga, den se a nannana yeni nintuali. Bi siiga yuakuli den kubi wan juugi yaa tiagu nni a dugibila ke i muñii do tanpoli.

¹² U Tienu den yedi nni: «Nisaalo biga, ŋaa laa Isidayeli yaaba nikpela, yuakuli o dieli nni, wan gagidi yaa kaanu, ki tiendi yaala li biigili nni o bulo po? Bi tua: ‹O Diedo naa nua ti, o ŋaa mi diema.› »

¹³ O go den yedi nni: «A go baa le ban tiendi yaa caginciandi ke ti bia.»

¹⁴ O den gedini nni o Diedo diegu buliñoabu, yaabu n ye nujienu po. Lankani bi puoba den kaa ki buudi yaa bulo n yi Tamusi kuuma.

¹⁵ U Tienu den yedi nni: «Nisaalo biga, a baa le cagintoadi yaadi n cie tine.»

¹⁶ Li yaa puoli, o den gedini nni o Diedo diegu luolu nni. Diidi o Diedo diegu buliñoabu kani, bu buliñoajabu leni li padibinbinli siiga, piilie n jabimuu den ye likani. Bi nunmu den tiegi puoli, ke bi cakoda mo tiegi o Diedo diegu. Bi den labindi ki kpiagidi u yienu.

¹⁷ U Tienu den yedi nni: «Nisaalo biga, a ko nua ban tiendi yaala? Baa tiendi lani bebe ka, bi kuani u paabiadu mi diema nni, ki biendi n pali ki pugidi. Diidi, bi nagidi li tibenli bi miani kani.

¹⁸ Mini moko, n baa soani ba tuonli leni n pali n fii maama. N kan mua bi po, n kan gbadi bi po ninñima mo. N kan cengi ba, ba bi yaa kuudi ki miadi nni ke min faabi ba.»