Esekieli 7 - U TIENU MAAMA TILI 2013

O Diedo waani Isidayeli diema juodima

¹ O Diedo den maadi nni yaa maama n tie ne:

² «Fini nisaalo biga, ŋan yedi Isidayeli yaaba: Li Miali Diedo U Tienu maadi yi po mi naa maama: Li tie mi juodima! Mi ñani ki tinga kunnaadi kuli, ki kpendi.

³ Moala li gbeni yi po n yeni, N pabienli baa jiidi yi po, N baa jia yi buudi, Nani yi tagi n tie maama.

⁴ Ninñima kan cuo nni yi po, Kelima n baa tuni yi yi tagili kuli. Yi cagindi mo baa yaa baa ki ye yi siiga. Lani, yi baa bandi ke n tie Li Miali Diedo.»

⁵ O Diedo U Tienu yedi: «Diidi, o falabiado nno, Yaa fala n ki pia lie, Wani n kpendi yeni.

⁶ Mi juodima cua ki gbeni, O falajuodika cua ki gbeni, O cua ki baa baa yi.

⁷ Mi bolinma bogindi ki kpendi Yinba mi diema niba po. U yogunu yeni kpendi, Ti buudi daali nagidi, Ti yanyagidi baa lebidi ki gaa Li pamanli kaanu a juana po.

⁸ Moala li kan go waagi, Ke n pabienli baa jiidi yi po, Li baa pundi hali li bianu. N baa jia yi buudi, Nani yi tagi n tie maama, Ki pa yi, yi cagindi panpaani.

⁹ Ninñima kan cuo nni yi po. N kan ŋaa yi fanma. N baa cuo yi yi tagili po, Ki pa yi yi cagindi panpaani kuli. Yeni yi baa bandi ke n tie Li Miali Diedo, Yua n pua yi.

¹⁰ Diidi li daali kpendi, Mi juodima baandi ki kpendi, Mi poagilima pugidi, Ti japaadi mo puudi.

¹¹ Mi biadima fii ki se, Nani yaa gbiamu n yuugi ki baa pua yeni. Yi siiga nni liba kuli kan sieni, Yi fuugu, yi coali leni yi yabinu, Likuli baa bodi ke bi kan mua yi po mo.

¹² U yogunu kpendi, Li daali mo pundi. Yua n daa n da mangi o pali, Yua n kuadi mo n da ye leni li paboanli, Kelima n pabienli fii mi diema piama kuli po yo.

¹³ Yua n kuadi kan go fidi Ki guani ki gaa wan kuadi yaala. Ba o yaa baa ki ye ki fo, Kelima yaala n kpendi Mi diema piama po yeni, Kan loagidi liba. Laa pia ki kan tieni mo. Yuakuli ye ti tuonbiadi nne, Oba kan fidi ki cia.

¹⁴ Bi baa piebi kakaci, Ki bogini likuli ki gbeni, Ama niloba kan ña bu toabu po, Kelima n pabienli fii Mi diema piama kuli po yo.

Fala yeni baa nandi yuakuli

¹⁵ Ki jugisiega baa yaa ye niinpo yaaba po, Mi koma leni u yianbiadipuodiko mo N diedi deeni yaaba. Ki jugisiega baa kpa Yaaba n ye i kuani nni. Mi koma leni u yianbiadipuodiko mo, N bolini yaaba n ye u dogu nni.

¹⁶ Yaaba n sieni ki naa kpe, Baa sani ki do a juana po, Nani ti joaloandi nni kpaajela yeni. Bikuli baa mua ki figindi, Yuakuli baa mua o tagili po.

¹⁷ I nii kuli baa tadigi, A duna mo kuli n kuagi.

¹⁸ Bi baa la li paboanli tiadi, Ti jawaanciandi baa mubini ba, I fe baa cuo bikuli, Bikuli baa kuo yukpankpanma.

¹⁹ Bi baa lu bi ŋanjilifa i sani nni, Ki noanli bi wula mo nani ti baadi yeni, Kelima bi ŋanjilifa leni bi wula kuli, Kan fidi ki faabi ba, O Diedo pabienli daali. Bi kan fidi ki baa yaala n baa guoni ba, Bi yaala n baa mangi bi pala, Kelima ŋanjilifa leni wula n kuani ba ti tuonbiadi nni.

²⁰ Bi piacianma cuani bi japaadi, Ki teni ke bi tagi bi cancaginbonla, Yaala n pia ti jawaandi. Li tie lani yaa po yo, Ke n baa teni man n tua bi po baadi.

²¹ N baa teni bi canba n cua ki fagi ma, Mi diema nibiadiba n joagini ma, Lan tua bi po fagidi ban tugi.

²² N baa buli ba n nunga. Bi baa kua ki joagini n ŋalimano, Bi sanjiaba mo baa cua ki joagini o.

²³ Ŋanbi ti kpaadi, Kelima mi diema gbie leni mi kukpama, U dogu mo gbie leni ku tugutongu.

²⁴ N baa teni yaa nibuoli n bia ki cie ba N cua ki fie bi diedi. N baa teni yaaba n pa yaa japaadi N baa u bianu. N baa teni bi jaandi kaani n joagini.

²⁵ Li paboanli yanbani kpendi, Bi baa lingi mi yanduanma, Ama bi nan kan le ma.

²⁶ Fala baa pendi, fala n cua. Laabaalibiado baa tuu laabaalibiado. Bi baa mia o saawalipualo li bonlekaala, O kopadiciamo mo kan go baa Wan baa bangi ba yaala, A nikpela mo kaa go pia bi po tundi.

²⁷ O bado baa mua i kumoe, O badijoa mo baa yaa ye li paboanli nni. Ti jawaandi po, bi niba baa digibi. N baa pa ba bi tagibiadi panpaani. N baa jia bi buudi nani bani bi ba n ja ti buudi maama. Lani, bi baa bandi ke n tie Li Miali Diedo.»