Esekieli 6 - U TIENU MAAMA TILI 2013

U Tienu fu leni yaaba n padi i buli

¹ O Diedo den maadi nni yaa maama n tie ne:

² «Nisaalo biga, pegidi a nunjoma ki teli Isidayeli juana po, ki pua saawali yaaba n ye a juana yeni po.

³ Ŋan yedi: ‹Cengi mani o Diedo U Tienu maama, yinba yaaba n ye Isidayeli juana po! Li Miali Diedo U Tienu yedi mi naa maama: Yinba yaaba n ye a joaciama leni a joabila po, yinba yaaba n ye a joatanmaba nni leni ti joaloandi nni, n baa tuogi yi leni bu toabu ki bolini yi juana po padibinbina.

⁴ Yi padibinbina baa mudi, yin juugi yi dugibila yaa bunbuna nni mo baa mudi. N baa cedi yi siiga niba boncianla n kpe yi buli nintuali.

⁵ N baa ladi Isidayeli yaaba tinkpila bi buli nintuali. N baa yadi bi kpaba ki lindi bi padibinbina.

⁶ Yin ban ye naankani kuli, yi dogi baa tua diegbendi, yi padibinbina ya n ye a juana po baa mudi, yi padibinbina mo baa wudi. Yi buli baa kua kua ki pendi. Yin juugi a dugibila yaa bunbuna nni baa baa, yin tagi yaala kuli mo baa bodi.

⁷ Niba boncianla baa baa yi siiga ki kpe. Yeni yi baa bandi ke n tie Li Miali Diedo.

⁸ Ama bu toabu n baa kpa ki sieni yaaba, ba bi yaa yadi yadi i nilanbuoli nni, n baa yaa guu bi siiga bi tianba ban da bodi.

⁹ Lani, yi niba yaaba n ciadi yeni, baa tiadi n po, ban ban ye ti yonbidi yaa nibuolu siiga. Min baa mudi bani yaaba yaa pala, ya n yie nni ki tiendi mi conconma leni i buli yeni, baa tiadi min den faligi ba maama. Bi kan go fidi ki diidi bi lieba nunmu, kelima bi cancagituona po.

¹⁰ Yeni bi baa bandi ke n tie Li Miali Diedo, kelima laa tie fanma fanma po ka, ke n yedi ke n baa tieni ba laa biadima.› »

¹¹ O Diedo U Tienu yedi mi naa maama: «Pua ki ledi a nii, ki ciini a taali, ki mua ŋain, kelima Isidayeli yaaba cagindi kuli po, bu toabu, mi koma leni u yianbiadipuodiko baa bolini ba.

¹² U yianbiadipuodiko baa kpa yaaba n ye foagima, ki jugisiega n kpa yaaba n ye koanma nni, mi koma mo n bolini ban cua ki baa mi diema ki cuo ki sieni yaaba. N baa teni n pabienli bi po n tuoni li bianu.

¹³ Yeni, yi baa bandi ke n tie Li Miali Diedo, yi yaa la yaa yogunu ke bi tinkpila bili bi buli siiga, ki gaani ki lindi bi padibinbina, a joabila, leni a joaciama po. Bi baa yaa bili tisoangibu leni tibiigibu kuli tinga, ban caa ki juugi naankani yaa pada yaa nuulu n mani bi buli po.

¹⁴ N baa fii ki sedi bi po, ki teni mi diema n luo bi niba, ki cili mi fanpienma ki yaa caa hali Dibila dogu nni. Ban ye naankani mo kuli, bi baa bandi ke n tie Li Miali Diedo.»