Esekieli 5 - U TIENU MAAMA TILI 2013

U Tienu baa faligi Isidayeli yaaba

¹ U Tienu den yedi nni: «Nisaalo biga, taa yaa jugisiega n mani, kan tua nani ku penkuokaagu yeni, ki kuo a yudi leni a langbiadi. Ŋan yuandi ki taa yaala n biigidi u kpiagu, ki biigi ti, ki boagidi ti kaanitaa.

² Yaala n waani ke bi baa u dogu bu toabu yeni yaa dana yaa gbeni, ŋan taa kaanyendu ki juu u dogu siiga u mu nni. Ŋan taa u kaanlielu mo, ki jia jia ti leni ki jugisiega ki yadi yadi ti u dogu lindima kuli. Ŋan taa u kaantaalu mo ki yadi yadi ti u faalu nni, ke n baa ŋoadi ti puoli leni ki jugisiega.

³ Ŋan ñani ti waamu ki ŋuuni a liadili nni.

⁴ Ŋan jobi lienni ti tiandi ki lu u mu nni ki juu. U mu baa ña ti kani ki fii Isidayeli yaaba kuli po.»

⁵ Li Miali Diedo U Tienu n maadi yaa maama n tie ne: «Lani n tie yaala n baa nandi Jerusalemi dogu, min den gandi yuu, ki kaani i nilanbuoli siiga yeni.

⁶ U niba yie ki naa tuo min den teni ba yaa bali maama leni yaa ñoamabona kuli, ki biagi ki cie yaa nibuoli leni yaa diema n gaani ki lindi ba, kelima bi ŋaa min den bili bi po yaala. Bi naa go ŋua nni nani n ñoamabona n bili maama.

⁷ Li tie lani yaa po yo ke o Diedo U Tienu yedi mi naa maama: ‹Yi den tieni yaa janda n bia ki cie yaa nibuoli n lindi yi. Yi naa den ŋoadi n ñoamabona, ki naa go den kubi n bali maama mo. Yi naa den ŋoadi ba yaa nibuoli n lindi yi yaa maasuagu.

⁸ Li tie lani yaa po ke o Diedo U Tienu yedi mi naa maama: N baa cua ki fu leni yi, ki jia yi buudi i nilanbuoli nintuali.

⁹ Yi cagindi po, n baa tieni yi hali yin ye, min ki kpaa tieni yi yaala. N kan go faa ki tieni yi li buolu mo hali abada.

¹⁰ Li tie lani yaa po yo, ke dogu nni bi bidanba baa ŋmani bi bila, ke a bila mo baa ŋmani bi danba. N baa tieni yi, min den bili yi po yaa biadima, ki yadi yadi yi li ŋandunli nni.›

¹¹ Li tie lani yaa po yo ke mini o Diedo U Tienu yua n fo poli ki yedi: ‹Nani yin joagini n kaangagidiŋamu leni yi cagindi leni yi biadima buoli kuli yeni, mini moko kan gbadi yi po ninñima. Yi kan ŋmadi, n baa bolini yi.

¹² U yianbiadipuodiko leni mi koma baa kpa yi niba siiga cagiyenli. Yi gaanilindima, mi koma baa baa li cagilieli. N baa yadi yadi li cagitaali i kaani kuli ki noadi n jugisiega ki ŋoadi li puoli.

¹³ N baa teni n pabienli n tuoni li bianu. N baa tuu n panli. Yeni, bi baa bandi ke mini Li Miali Diedo n maadi n nunponli nni, ke n pabienli tuoni li bianu.

¹⁴ Yaa diema n lindi yaa niba leni yaaba n tagini likani kuli, baa le ke n fiagi Jerusalemi dogu, ki teni ke u tua diegbengu.

¹⁵ Yi baa tua i fe leni fala kaanu, i tundi leni i jeje kaanu, yaa nibuoli n lindi yi kuli po, n pabienli leni n pafiima buudi n baa cuo yi yaa yogunu leni i panpaanbiadi. Mini Li Miali Diedo n yedi yeni.›

¹⁶ N baa toa yi mi koma paboanli piemi. Laa piemi baa bolini yi. N go baa biagi mi koma yi po, ki teni yin da go baa kuli jesienkaama.

¹⁷ N baa soani mi koma leni ti yanbiaditi n kpa yi bila, u yianbiadipuodiko leni mi soama baa poandi yi kani, min teni bu toabu mo n cua ki baa yi. Mini Li Miali Diedo n yedi yeni.»