Esekieli 44 - U TIENU MAAMA TILI 2013

Puoli po buliñoabu, o bado n koa naani

¹ O joa yeni go den guani nni u kaangagidiŋamu buliñoabu yaabu n tiegi puoli ki lo kani.

² O Diedo den yedi nni: «Yaa buliñoabu n tie ne baa yaa lo yo. Bu kan luodi. Niloba kan tagini bu kani, kelima mini o Diedo, Isidayeli Tienu koa lankane. Lanwani, bu baa yaa lo yo.

³ Yaala n tie o bado po, wani o bado wani baa fidi ki kali lienni, ki ŋmani dupen o Diedo nintuali. O baa yaa koa bu buliñoabu buliñoajabu kani, ki go guani ki tagini laa sanu yo ki ña.»

Bi canba ki pia sanu ki kua U Tienu diegu nni

⁴ O joa yeni den gedini nni nujienu buliñoabu po, ku diegu nintuali. N den diidi ki sua ke o Diedo kpiagidi gbieni o Diedo diegu. N den baa ki labini tiipo.

⁵ Lani, o Diedo den yedi nni: «Nisaalo biga, ŋan faami ki diidi bonŋanla. Diadi a tuba mo ki cengi min baa yedi a yaa maama, yaa ñoamabona n bili o Diedo diegu po leni ku bali maama kuli po. Ŋan yaa faami bonŋanla o Diedo diegu kuakaani leni u kaangagidiŋamu ñakaani kuli n bua ki yedi yaala.

⁶ Ŋan waani Isidayeli yaaba, bi niyiekaaba yeni, ke o Diedo U Tienu yedi mi naa maama: ‹N coagi leni yinba Isidayeli yaaba cagindi.

⁷ Yi den kuani n kaangagidiŋamu nni yaa canba n tie jifola bi pala nni leni bi gbanandi po, ke bi joagini n diegu. Yin den padi n po dupen leni ti yandi kpama leni mi soama yaa yogunu, yi den biidi yaa ŋantaado n luo mini leni yinba siiga, kelima yi cagindi kuli po.

⁸ Yi naa den faami n tuonli yaali n gagidi ki ŋani yeni po. Ama yi den puogi li bi canbe ke ban gaa yi kaanu ki yaa tuuni n po n kaangagidiŋamu nni.›

⁹ Li Miali Diedo U Tienu yedi mi naa maama: ‹Caanoba kuli, yua n naa kua koanciagu o gbanandi nni leni o pali nni, kan kua n kaangagidiŋamu nni, ba o yaa ye Isidayeli yaaba siiga.›

Yaa bali maama n ye Levi buolu po

¹⁰ Levi buolu, yaaba n den foagidi leni nni, Isidayeli yaaba n den yaadi ki ŋaa nni yaa yogunu, ki ŋoadi i buli yeni, bi baa tugi bi tuonbiadi panpaani.

¹¹ N kaangagidiŋamu nni, bi baa yaa tie yaaba n pugidi ki todi bebe. Bi baa yaa ye ku diegu buliñoana kani, ki tuuni ku diegu tuonli. Bi baa yaa ye bi niba nintuali ki tuuni bi po, ki kodi bi po, a padijuukaana leni yaa pada n sieni yaa yandi. Bi baa yaa ye bi nintuali ki tuuni bi po,

¹² kelima bi den tuuni bi niba po bi buli kani, ki go den tua tantuudikaali Isidayeli yaaba po. Lanwani bi tagili po, mini o Diedo U Tienu yugidi n nuu ki poli ki yedi ke bi baa tugi bi tagili tugili.

¹³ Bi kan nagini n kani ki soani bi kopadicianba tuonli. Bi kan nagini ban gagidi n po yaa tiadi kani leni n kaangagidiŋamu kani. Bi baa guani ki tugi bi fe leni ban den tiendi yaa cagindi kuli.

¹⁴ N baa puogi ba tuonbibide, yaala n tie U Tienu diegu cenli ŋamu po.

Yaa bali maama n ye bi kopadicianba po

¹⁵ Ama bi kopadicianba Levi buolu Sadoki puoliŋuani, n den kubi n kaangagidiŋamu tuonli bonŋanla, Isidayeli yaaba n den yaadi ki foagidi leni nni yaa yogunu. Bani n baa nagini n kani, ki yaa tuuni n po, ki ye n nintuali, ki padi n po ti yandi kpama leni mi soama. Mini o Diedo U Tienu n yedi yeni.

¹⁶ Bani bebe n baa yaa koa n kaangagidiŋamu nni, ki nagidi n tabili kani ki tuuni n po. Bi baa yaa kubi min puogi ba yaa tuonli bonŋanla.

¹⁷ Bi yaa pundi deeni buliñoana kani, bi baa la yaa tiadi n tie len. Bi yaa tuuni deeni luolu buliñoana kani leni ku diegu nni, bi kan yaa la tiadiba ke ti luni leni pekobidi.

¹⁸ Bi baa yaa pia len caba ke a tie bi finfinjuadi, ki go soali len banda. Bi kan ñagini bi ciamu nni gbanñagiditi kelima li manmanli po.

¹⁹ Bi yaa baa ña niinpo yaa luolu nni, bi niba n ye naani yeni, bi baa landi ban bi tuuni u kaangagidiŋamu nni, ki la yaa tiadi. Bi baa la tiatoadi, ke ban da gagidi ki ŋanbi bi niba leni bi tiadi.

²⁰ Bi kan kuo bi yula, bi kan go cedi bi yudi n foagidi ki kandi. Ama bi baa yaa moagidi ti.

²¹ Kopadiciamoba kan ño daama o yaa baa kua deeni yaa luolu nni.

²² Bi kan taa kpepuoli, bi puoñaka, ama bi baa fidi ki taa o kopadiciamo yaa kpepuoli wani. Bi baa yaa taani yaa jafanba n daa bani jaba, ki tie Isidayeli buolu.

²³ Bi baa bangi bi niba ban bandi ki gagidi yaala n gagidi ki ŋani leni yaala n ki gagidi siiga, yaala n joagini leni yaala n ki joagini siiga.

²⁴ Maamiba yaa ye, bi baa ŋoadi n bali maama, ki jia ti buudi. Bi baa yaa kubi n bali maama leni n ñoamabona n badi kuli nni, ki go gagidi ki ŋanbi n fuodima dana.

²⁵ Kopadiciamo kan nagini tinkpilo, ki da ti joagini oba. O baa fidi ki joagini o yuli li yaa tie ke o baa bi o naa, bi o bijua, bi o bisalo, bi o naataanjaga bi o naataanpuoga yua n daa kuni joa yaa kpe.

²⁶ Li yaa puoli, o yaa ŋanbi oba ki gbeni, o baa guudi danalele.

²⁷ Yaa daali ke o kua u kaangagidiŋamu nni, o baa cuani o padili ki padi ti tuonbiadi sugili miabu po. Li Miali Diedo U Tienu n yedi yeni.

²⁸ Line n tie ban baa baa yaa faali: mini n ba n baa yaa tie bi faali. Yi kan pa ba biinuba kuli Isidayeli diema nni. Mini n ba n baa yaa tie bi biinu.

²⁹ Bi baa yaa di ban kpendinni yaa paabu leni ban padi yaa yandi ti tuonbiadi sugili miabu po leni i tagili po. Ban paadi ki bili n po yaala Isidayeli diema nni kuli, baa yaa tie bi yaale.

³⁰ Yi baa yaa tendi bi kopadicianba, yi kpaandi bonluonkakpiala leni yin paadi ki bili yaala kuli n po. Yi baa yaa tendi ba yin yen kpa buuni yaa yoma, lani n tie min seligi yi diedi.

³¹ Bi kopadicianba kan ŋmani yankpienga bi fuayanga n toadi toadi yaa yanga bi yaa nuano.