Esekieli 43 - U TIENU MAAMA TILI 2013

U Tienu lebidi ki guani o dieli nni

¹ O joa yeni den gedini nni yaa buliñoabu n tiegi puoli po.

² N den laa ke Isidayeli Tienu kpiagidi ñani puoli, ki kpendi. O nialu den naani leni mi ñincianma gola yaa fuugu yeni, o kpiagidi mo den yendi ki tinga.

³ Min den baa yaa bonlekaala, den naani leni min den kpa baa yaa bonlekaala, U Tienu den cua ki baa bolini Jerusalemi dogu yaa yogunu. Laa bonlekaala kuli den naani leni min den baa yaa bonlekaala Kebari kpenu balinma yeni. Lanwani, n den baa tiipo.

⁴ O Diedo kpiagidi den kua U Tienu diegu buliñoabu kani, yaabu n den tiegi puoli po.

⁵ O Fuoma den yua ki gedini nni deeni yaa luolu po. N den laa ke o Diedo kpiagidi gbieni U Tienu diegu.

⁶ N den gba ke bi maadi leni nni U Tienu diegu nni ke o joa yeni mo se n kani.

⁷ O den yedi nni: «Nisaalo biga, nekanba n tie n bali kalikaanu leni n taana n taaŋmaakaanu. N baa yaa ye lankane, Isidayeli yaaba siiga yaa yogunu kuli po. Isidayeli yaaba leni bi badiba kan go joagini n yeli yaali n gagidi ki ŋani leni bi cancagintuona, bi kan go yaa kpendi ki piindi bi badiba yaaba n guani a juana padibinbina kani.

⁸ Bi den maa bi buliñoakoala n yaa buliñoakoala kani. Bi den sieni bi buliñoagunda n yaa buliñoagunda kani. Li goanli bebe n den ye mini leni bani siiga. Bi den joagini n yeli yaali n gagidi ki ŋani leni ban den soani yaa cancagintuonli. Li tie lani yaa po yo, ke n pabienli nni, n den bolini ba.

⁹ Moala bi baa foagidi n kani bi cagindi leni bi baditinkpila. N baa yaa ye bi siiga yaa yogunu kuli.

¹⁰ Nisaalo biga, ŋan waani Isidayeli yaaba, U Tienu diegu n tie maama kuli, ke i fe n cuo ba bi tuonbiadi po, ban go faami bonŋanla ku naa diegu n maa maama.

¹¹ I fe yaa cuo ba ban tieni yaala kuli po, ŋan teni ban bandi ku naa diegu n tie maama, kun se maama, ku buliñoana leni ku diebona kuli. Ŋan diani ban baa fidi ki ŋoadi yaa bali maama leni yaa ñoamabona ki cuani la bi nintuali. Lani n tie ban kubi ki go tieni nani lan bili maama.

¹² Lani n tie ku Diegu yeni bali maama. Yaa fanma n ye li juali yeni yuli po kuli, baa yaa tie naankani n gagidi ki ŋani cain. Diidi, lani n tie ku Diegu yeni bali maama.»

Li padibinbinli leni a pada

¹³ Diidi ban den biigi li padibinbinli leni yaa nukpanduna. Laa nukpanduna ki den taa leni a nukpandunfana, kelima nukpandunli kuli kani bi go den pugini nubitugalie, u foaginu po. Yaa buogu n den lindi ki cebini li, ñuanlu den tie nukpandunli, li pianu mo nukpandunyenli. Li ñoakuni yii n kugini ki lindi li yeni pianu den tie nubadiyaagu. Lani n den tie yaala n kubi li padibinbinli yeni. Li padibinbinli yeni kpedinu nne:

¹⁴ ki cili yaa buogu n ye tiipo, ki ban ña ki pundi tinga nni yaa bunbunli, li den tie nukpanduna lie, li pianu mo nukpandunyenli. Ki cili tiipo ki buliñoabiga kani ki ban pundi hali tanpoli bunbunli kani, li den tie nukpanduna naa, li pianu mo nukpandunyenli.

¹⁵ Li padibinbinli yuli po, u fanu den ye ki pia ki pundi nukpanduna naa leni li yina ke a jagi u fanu po.

¹⁶ U fanu den pia kalinaa yii n da, u foaginu leni u pianu den de yenma, ki pia piiga n nukpanduna lie lie.

¹⁷ Li bunbunli den pia kalinaa ke ikuli den de yenma. Li foaginu den tie piiga n nukpanduna naa, li pianu mo piiga n nukpanduna naa. Li ñoakuni n den juodi leni yaa ñoagbieni yaa pianu den tie nubadiyaagu. Ku buogu yaagu n den lindi li, pianu den tie nukpandunyenli, li ŋmaadokaani mo den pegidi ki tiegi puoli.

¹⁸ O joa yeni go den yedi nni: «Nisaalo biga, o Diedo U Tienu yedi: ‹Diidi yaa ñoamabona n bili ban baa maa yaa padibinbinli po, ki yaa juugi a padijuukaana, ki go miini li po mi soama.

¹⁹ A baa teni bi kopadicianba Levi buolu, yaaba n tie Sadoki puoliŋuani, min puni bani yaaba u sanu, ban yaa kpendinni n po naatonbili ti tuonbiadi sugili miabu padili po. Li Miali Diedo U Tienu n yedi yeni.›

²⁰ A baa taa li soama ki tieni li padibinbinli yinnaada yeni po, li bunbunli ñoakunnaadi po leni yaala n kugini ki lindi li kuli po. Yeni a baa ñani li padibinbinli yeni po ti tuonbiadi, ki gagidi ki ŋanbi li.

²¹ Ŋan taa li naatonli yaali n padi ti tuonbiadi po, ki juu li ban bili yaa kaanu U Tienu diegu nni, ke laa taa leni u kaangagidiŋamu.

²² Li dalieli, ŋan taa yaa ŋuabuali n ki pia poadi, ki padi li ti tuonbiadi sugili miabu po. A baa tieni yeni ki ñani li padibinbinli tuonbiadi, nani ŋan den tieni maama leni li naatonbili, ki ñani ti tuonbiadi yeni.

²³ A yaa padi ti tuonbiadi sugili miabu padili ki gbeni, a baa cuani yaa naatonbili n ki pia poadi, ki go taa ti yanbidi siiga, yaa petonli n ki pia poadi.

²⁴ Ŋan cuani ba o Diedo nintuali. Bi kopadicianba baa tieni bi po mi yaama, ki padi ki juu ba o Diedo po.

²⁵ A baa padi daali kuli ŋuabuayenli ti tuonbiadi po, yeni hali danalele. Bi go baa taa naatonbiyenli leni ti yanbidi siiga petonyenli, ke bani bonbilie yeni kuli ki pia poadi ki padi ba.

²⁶ Bi go baa padi ti tuonbiadi sugili miabu pada li padibinbinli po hali danalele. Bi baa gagidi ki ŋanbi li, ki tieni u badu li maagbenma po.

²⁷ Laa dana yaa tuoni, ki ji cili li daniili leni yaa dana n baa ŋoadi, bi kopadicianba baa padi li padibinbinli po, yi padijuukaana leni yi taanyenma pada. Lani, n baa cengi yi. Mini o Diedo, U Tienu n yedi yeni.»