Esekieli 42 - U TIENU MAAMA TILI 2013

Yaa diena n go den pugidi U Tienu diegu po

¹ O go den ñani nni niini yaa luolu po, ki gedini nni, yaa diena n ye nujienu po, ki tiegi leni mi fanma yeni leni yaa dieli n den ye U Tienu diegu nujienu po.

² Lan den maa maama, nujienu po foaginu den tie nukpanduna kobiga, li pianu mo nukpanduna piimuu.

³ Mi den tiegi leni tugu nni luolu yuu n tie nukpanduna piilie kaliyendu po. U kalilielu po mo, mi den tiegi leni niinpo yaa luolu, ban den celi yuu yeni. Mi den pia a sanbila dietuanma kuli po, yeni hali dietuanmitaa.

⁴ A diena yeni deeni, nintuali luolu po den pia sanbili ke li pianu tie nukpanduna piiga, li foaginu mo nukpanduna kobiga. Bi den kaa laa diegu nni nujienu po.

⁵ Mi dietuantaama yaa diena den muagi ki cie tiipo ya leni siiga nni ya, kelima a sanbila yeni n den fie a diena fanma.

⁶ Dietuanmitaa n den ye, ama laa den pia benjieli nani u luolu nni diena ya n den sieni yeni. Li den tie lani yaa po yo, ke a diena den moagindi ban den maa ki do ki caa.

⁷ Niinpo luolu po, u bilinu yuu n den balini a diena ki naa siigi a, ki ye a nintuali yeni foaginu den tie nukpanduna piimuu.

⁸ A diena yeni foaginu niinpo den tie nukpanduna piimuu. Ama yaa diena n den tiegi U Tienu diegu po foaginu den tie nukpanduna kobiga.

⁹ A diena yeni tiipo, bu buliñoabu den ye puoli, yaaba n tiegi niinpo luolu.

¹⁰ Laa buliñoabu den ye u luolu yeni bilinu n den cili naankani. A diena go den ye u luolu nni nuganu po, ki tiegi yaa fanma leni yaa dieli n ye U Tienu diegu puoli po.

¹¹ Laa diena nintuali, u taginkaanu den ye nani nujienu po yaa diena nintuali yeni. A foaginu leni a pianu kuli den de yenma. I kuakaani leni i ñakaani leni a fanma kuli den naani leni liyala.

¹² Li den tie yene leni nuganu po diena buliñoana. Bu buliñoabu go den ye u sanu n caa ki kua u bilinu foaginu nni naankani, yaaba n den ña puoli kuli po.

¹³ O joa yeni go den yedi nni: «Nujienu po diena leni nuganu ya, ya n tiegi leni mi fanma yeni, tie yaa diena n gagidi ki ŋani. Yaa kopadicianba n kua u kaangagidiŋamu nni, baa yaa di yaala n gagidi ki ŋani cain laa diena nne. Bi baa yaa biliti lani nne yaa bonla n gagidi ki ŋani cain, bu paabu leni ban baa yaa biliti ban kodi yaa yandi ti tuonbiadi sugili po naani, kelima laa kaanu den gagidi ki ŋani.

¹⁴ Bi kopadicianba yaa kua u kaangagidiŋamu nni yaa yogunu, bi kan fidi ki ña niinpo luoli nni po, ki la bi kopadiciantiadi. Bi baa landi lani nne bi tiagagidikaadi, ban la yaadi yeni, ki la tiatoadi ki nan fidi ki ña bi niba n taagi naankani.»

Niinpo bilinu n da maama

¹⁵ O joa yeni n den biigi U Tienu diegu tugu nni ki gbeni, o den ñani nni puoli po buliñoabu kani, ki biigi yaa fanma n den gaani ki lindi U Tienu diegu.

¹⁶ O den biigi leni li kankagibiigikaali yeni, ki sua ke li tie kankaga kobimuu puoli kalu po.

¹⁷ O go den biigi nujienu po kalu ki sua kankaga kobimuu leni li kankagibiigikaali yeni.

¹⁸ O go den biigi nuganu po kalu leni li kankagibiigikaali yeni ki sua ke li tie kankaga kobimuu.

¹⁹ O go den pegidi ki biigi nintuali kalu po leni li kankagibiigikaali yeni ki sua ke li tie kankaga kobimuu.

²⁰ O den biigi u bilinu gaanilindima ñoakunnaadi kuli ki sua ke li foaginu tie kankaga kobimuu, u pianu moko kankaga kobimuu. Lani n den tie mi paadima u kaangagidiŋamu leni naani n ki gagidi siiga.