Esekieli 4 - U TIENU MAAMA TILI 2013

Esekieli tuodi ki waani yaa buudi n baa baa Jerusalemi 4—24 Yibalinba n baa Jerusalemi dogu maama

¹ O Diedo go den yedi: «Fini nisaalo biga, ŋan taa ku yoagu yaa tankonu ki bili u a nintuali. Ŋan diani upo Jerusalemi dogu nannanli.

² Ŋan gbi ti buodi, ki wuli a tanbinbina, ki sieni a toagola leni bi toatieba yudanba, ki sieni ti toatiaciandi, lan yaa tie nani ban lindi yaa dogu ki baa u bu toabu yeni.

³ Ŋan yuandi ki taa ku kucabigu, ki sieni ku nani li goanli yeni, fini leni u dogu yeni siiga. Pegidi a nunjoma ki teli u dogu yeni. U baa tua ban baa yaa dogu bu toabu, kelima a sieni bi toatieba ki lindi u. Li baa tua sinankeene Isidayeli yaaba po.

⁴ Ŋan duani a ganu kalu po, ki tugi Isidayeli yaaba tagili.

⁵ N bili a po yaa dana n da leni ban tieni mi tudima yaa bina bianu: dana kobitaa n piiyia, ke a baa tugi Isidayeli yaaba tagili.

⁶ Laa dana yaa pendi, ŋan jigidi ki duani a jienu kalu po, ki tugi Juda yaaba mo yaa tagili hali dana piinaa. N bili ke dayenli kuli baa yaa tie a po binli.

⁷ A baa pegidi a nunga, ki yoagi a buagu ki teli ban baa Jerusalemi dogu yuu yeni, ki pua saawali u po.

⁸ Diidi, n baa loli a leni i baabi, ŋan da fidi ki jigidi ganu bi jienu, hali ŋan baa Jerusalemi yaa dana bianu yeni n gbeni.

⁹ Ŋan taa ŋalikama yua dingi leni orje leni a tuuna, i di leni ŋalikama yua juagi ki taani ki kuodi likuli tiayengu nni, ki kaali ki tieni yaa dupen n baa dagidi a, ŋan baa yaa dua yaa dana bianu kuli a kalu po. A baa yaa di lane hali dana kobitaa n piiyia yeni.

¹⁰ A baa yaa biigide ki di. A baa yaa di grami piilie daali kuli. Lani n tie ŋan baa yaa di yaala laa dana nni kuli.

¹¹ A baa yaa biigidi mi ñima moko yo ki ñu. A baa yaa ñu litidiyendo daali kuli. Lani n tie ŋan baa yaa ñu yaala laa dana nni kuli.

¹² A baa yaa di orje yaa lalaade. A baa yaa ŋaandi ki pua ti lalaadi yeni bi niba binjenkuoma po, bikuli nintuali.»

¹³ O Diedo go den yedi: «Li tie yene ke Isidayeli yaaba baa yaa di yaa jiema n joagini min baa deli ki kuani ba yaa nilanbuoli nni.»

¹⁴ N den yedi: «Li Miali Diedo U Tienu, n daa dini kuli yaala n joagini. Hali n biwaama ki taa ki pundi hali dinla, mii ŋmani yankpienga, mii ŋmani bonfuodo n kpa yaa yanga, yaa nangu n joagini mo kuli daa kua n yaa ñoabu nni.»

¹⁵ O go den guani ki yedi nni: «Lanwani, n baa teni ŋan lebidi bi nisaaliba binjenkuoma yeni, ki tieni a naabinpabikuoma ki yaa ŋaandi a jiema leni ŋani.»

¹⁶ O go den yedi nni: «Fini nisaalo biga, n baa bolini bonjekaala n bi bili naankani kuli Jerusalemi dogu nni. Bi baa yaa ye leni i yanbani, kelima bi baa yaa biigide ki di bi jiema, ki go biigidi mo yo ki ñu bi ñima.

¹⁷ Bi baa luo li bonjekaala leni mi ñima, bi yama baa yagi biyaba po. Bi baa bodi kelima bi tuonbiadi po.»