Esekieli 3 - U TIENU MAAMA TILI 2013

¹ Yua n den maadi leni nni den yedi: «Fini nisaalo biga, je ŋan laa yaala, ki ŋmani yaa tigbabikaali n tie ne ki gedi ki ban maadi leni Isidayeli buolu.»

² N den yaadi n ñoabu ke o teni ke n ŋmani laa tigbabikaali.

³ O den yedi nni: «Fini nisaalo biga, gbieni a tugu, ki dini a gbanandi leni min teni a yaa tili ne.» Lani n den ŋmani li tigbabikaali ke li mani n ñoabu nni nani ti siadi yeni.

⁴ O den yedi nni: «Nisaalo biga, gedi Isidayeli yaaba kani, ki ban waani ba n maama.

⁵ Mii soani a yaa niba yaa maama gbadima n pa leni yaaba yaa maama n juagi kani ka, ama n soani a, Isidayeli yaaba kane.

⁶ N yaa den soani a yaa niba n maadi mi malanma kane, ba ke ŋaa gba ma, naani bi kan cengi a?

⁷ Ama bani Isidayeli yaaba, bi kan cengi a, kelima baa bua ki cengi nni. Bikuli tuli pa, ke bi pala mo juagi.

⁸ Ama n baa teni a pali n yaa juagi ki pundi bi yaa pala, a tulu mo n juagi ki pundi bi yaa tuli.

⁹ N baa teni ŋan yaa pa nani yaa tanli n juagi ki cie a tana kuli. Ŋan da jie ba, ŋan da digibi bi nintuali mo, kelima bi tie nibuoyieko yo.»

¹⁰ O go den pugini ki yedi nni: «Nisaalo biga, ŋan gaa a pali nni, ki go diadi a tuba ki cengi, min baa yedi a yaa maama kuli.

¹¹ Gedi ban gedini yaa niba ti yonbidi kani, a buolu yeni kani, ki maadi leni ba fini a ba. Ban cengi leni ban ki cengi a kuli, ŋan yedi ba ke o Diedo U Tienu n yedi yeni.»

¹² Li yaa puoli, U Tienu Fuoma den yua nni ki yugini nni, n den gbadi n puoli po u nialiciamu ke u tua: «O Diedo n baa ti pagidi hali o kpiagidi kaanu kani!»

¹³ N den gbadi a bonfuoda yeni fiabi n pua iyii ki tiendi yaa fuugu leni a kaanda ya n den baali a bonfuoda yeni mo yaa fuugu. Likuli den taani ki tie fuciangu.

¹⁴ U Tienu Fuoma den yua nni ki gedini nni. O Diedo paalu den cuo nni maama ke n kan fidi ki yie, ba ke n den caa ke n pali naa mani.

¹⁵ N den pundi ban den gedini yaaba ti yonbidi kani Teli-Avivi dogu nni. Bi den kaa ki kuu Kebari kpenu. N den gedi likani, kelima bi den ye lankane. N den kali bi siiga hali danalele leni ti jawaanciandi.

U Tienu puogi Esekieli n guudi Isidayeli yaaba

¹⁶ Danalele n den pendi, o Diedo den maadi leni nni yaa maama n tie ne:

¹⁷ «Nisaalo biga, n teni ke a tua Isidayeli yaaba doguudo. A yaa gbadi yaa maama n ña n ñoabu nni, ŋan waani n po ba laa maama.

¹⁸ N yaa yedi o nibiado: ‹A baa kpe,› a yàá tuodi ki waani o, wan ŋaa o tagibiadu ki fidi ki yaa ye, laa nibiado baa kpe o biadima nni, ama n baa buali a o soama.

¹⁹ Ama a yaa waani o, ke o naa lebidi ki ŋaa o biadima leni o tagibiadu, o baa kpe o tudima nni, ama o soama naa jagi a yuli po.

²⁰ Li yaa tie ke o niteginka ŋaa o teginma ki tieni yaala n bia, n baa teni fala n cua o po, wan kpe. A yàá waani o ke wan lebidi, o baa kpe kelima o tuonbiadi po. N kan go tiadi wan den tieni yaa tuonŋama kuli po, ama n baa buali fine o soama.

²¹ Ama a yaa waani laa niteginka, ke wan da tieni tuonbiadi, ke waa tieni ti, o baa yaa ye kelima bi den tuodi ki waani o, fini mo, a baa faabi.»

U Tienu bili Esekieli po mi ŋminma yogunu

²² Lankani o Diedo paalu go den jiidi n po, ke o yedi nni: «Fii, gedi ku joaloangu nni, lankani, n baa maadi leni a.»

²³ N den fii ki gedi ku joaloangu nni. O Diedo kpiagidi go den ye likani, nani min den laa ti maama Kebari kpenu balinma yeni. N den baa ki labini tiipo.

²⁴ U Tienu Fuoma den kua n niinni, ki teni ke n fii ki sedi. O Diedo den maadi nni, ki yedi: «Gedi ki ban luoni aba a dieli nni.

²⁵ Fini nisaalo biga, diidi, bi baa cua ki cuo ŋa lankani leni i baabi, ban baa loli a leni yii. Lani, a kan go fidi ki cua ki sedi bi siiga.

²⁶ N baa teni a lanbu n tabi a lanŋaandi nni, ŋan tua muulo. A kan go fidi ki maadi ki jaligi ba, kelima bi tie nibuoyieko.

²⁷ Ama n yaa baa ti maadi leni a yaa yogunu, n baa luodi a ñoabu ŋan yedi ba: ‹Li Miali Diedo U Tienu n yedi yaa maama nne: Yua n bua ki cengi, n cengi, yua n ki bua ki cengi mo, n da cengi,› kelima bi tie nibuoyieko yo.»