Esekieli 25 - U TIENU MAAMA TILI 2013

U Tienu baa bu leni i nilanbuoli 25—32 U Tienu fu leni Anmoni buolu

¹ O Diedo den maadi nni yaa maama n tie ne:

² «Nisaalo biga, pegidi a nunjoma ki nuali Anmoni buolu. Pua bi po saawali.

³ Yedi Anmoni buolu: Cengi mani o Diedo U Tienu maama! Li Miali Diedo U Tienu yedi daa: Nani yin den laa ha ha, ban den joagini n kaangagidiŋamu, ki bolini Isidayeli diema, ki gedini Juda buolu ti yonbidi yaa yogunu yeni,

⁴ n baa taa yi ki teni puoli yaaba. Bi baa kpaa bi naga yi diema nni, ki go tii bi yekaani yi diema nni. Bani n baa ŋmani yi tiidi bonluonkaala, ki ño yi yandi naaŋanma.

⁵ N baa teni Raba n tua ti yuoyuodi kpaakaanu, Anmoni buolu diema mo n tua i pe duankaanu. Lani, yi baa bandi ke n tie Li Miali Diedo.»

⁶ Li Miali Diedo U Tienu yedi mi naa maama: «Yi den pua yi nupola, ki ciini yi taana, ki mangi yi pala, ki waani yeni yi falima Isidayeli diema po.

⁷ Lani yaa po n baa tandi n nuu ki yie yi po, ki taa yi ki teni i nilanbuoli ban fagi yi. N baa ñani yi i nibuoli siiga. N baa bolini yi, yi kan go yaa pia diema. Lani, yi baa bandi ke n tie Li Miali Diedo.»

U Tienu fu leni Moabi buolu

⁸ Li Miali Diedo U Tienu go yedi mi naa maama: «Moabi yaaba leni Seyiiri yaaba yedi ke Juda yaaba mo tie nibuolu nani yaa nibuoli n sieni yeni.

⁹ Lani yaa po, n baa ñani Moabi dogi nni gbangbanjiidima kuli, ki go ñani mi diema doŋami kuli. Lani n tie: Beti-Yesimoti, Baali-Meyoni leni Kiriyatayim.

¹⁰ N baa teni yaaba n ye puoli n baa Anmoni buolu. N baa taa Anmoni buolu ki pa ba, ban tua bi piama. Lani, i nibuoli siiga, bi kan go tiadi Anmoni buolu po.

¹¹ Min den bili Moabi yaaba po, yaa buudi yeni baa nandi ba. Lani, bi baa bandi ke n tie Li Miali Diedo.»

U Tienu fu leni Edomi yaaba

¹² Li Miali Diedo U Tienu yedi: «Edomi yaaba tua i tagili danba, kelima bi tuu Juda yaaba kani li panli.

¹³ Li tie lani yaa po, ke mini o Diedo U Tienu yedi mi naa maama: N baa tandi n nuu Edomi yaaba po. N baa bolini bi nisaaliba leni ti yandi. N baa cili Temani dogu ki ban pundi hali Dedani dogu. Ki jugisiega n baa kpa ba.

¹⁴ N baa teni n niba Isidayeli yaaba n tuu n panli Edomi yaaba kani, Isidayeli yaaba baa soani ba nani n pabienli n bili maama. Lani, bi baa bandi n pantuuli n tie yaala. Mini o Diedo, U Tienu n yedi yeni.»

U Tienu fu leni Filisiti yaaba

¹⁵ Li Miali Diedo U Tienu go yedi: «Filisiti yaaba den pia li pantuuli yantiali ki den tuu li panli leni mi falima, ki den mangi bi pala mi bolinma nni, kelima bi den pia ki nanga bi niinni. Laa nanga tie nankpelige.

¹⁶ Lani yaa po n teni ke mini o Diedo, U Tienu yedi mi naa maama: N baa tandi n nuu Filisiti yaaba po. N baa bolini Keleti yaaba. N go baa teni yaaba n sieni ki ye mi ñincianma jaali po n bodi.

¹⁷ N baa tuu ba pancianli ki go teni yaa buudi n bia n nandi ba. Lani, bi baa bandi ke n tie Li Miali Diedo.»