Esekieli 23 - U TIENU MAAMA TILI 2013

Samari conbi

¹ O Diedo den maadi nni yaa maama n tie ne:

² «Nisaalo biga, puobilie n den ye ki tie puomadiyendo bisiaba.

³ Bi den conbi Ejipiti diema nni, bi den conbi bi panma yogunu. Lan po yo ke bi ŋmiani bi biina. Lanpo yo ke bi den cili ki taabi bi bena.

⁴ O kpelo den yi Ohola, o waalo mo Oholiba. O nikpelo n tie Samari, o waalo mo n tie Jerusalemi. N den taa bani bonbilie yeni kuli, bi den mali n po a bonjala leni a bonpola.

⁵ Ama ba ke Ohola den tie n pua, O den ŋaa nni ki ban conbi. O den bua o jaconcona Asiiri yaaba o yieninlieba hali boncianla.

⁶ O den bua guveneerinba, leni bi bujiaba yaaba n la yaa caba n moani ki suudi. Bikuli tie jawaaba ki ŋani, ki go den tie tanjagimoanba.

⁷ Ohola den mangi o pali leni Asiiri diema bijaba siiga bi bulicinba kuli. O den joagini o yuli leni wan den pia yaaba yaa po mi buama kuli leni bi buli kuli mo.

⁸ O den baa ki kubi o conconma, wan den tiendi yaama Ejipiti diema nni, kelima bi den taagi leni o o panma nni. Bi den taabi taabi o jafanbenli, ki cagini o.

⁹ Li tie lani yaa po yo, ke n den luni o, O jaconcona Asiiri yaaba nuu nni, wan den mangi o pali leni yaaba.

¹⁰ Bi den yiedi o mubima, ki taa o bijaba leni o bisiaba, ki kpa omo leni ki jugisiega. Lani, bi den jia o buudi, ke o tua bontogidikaala puotoaba po.

Jerusalemi conbi

¹¹ O waalo Oholiba den laa lane, ki gaadi o buama nni, ki cie o kpelo. O conconma den yabidi ki cie o kpelo yaama.

¹² O den bua o yieninlieba Asiiri yaaba hali boncianla, guveneerinba leni bi bujiaba yaaba n den yie bonŋanla yeni, ki jagi i taami po, bikuli den tie yaa jawaaba n pia li yankuali.

¹³ N den sua ke wani mo joagini o yule, ke bani bonbilie kuli den ŋua sanbiyenli.

¹⁴ Ama ba yeni Oholiba yaa conconma den yabi ki cie. O den laa ke bi diani u bilinu po, bi jaba nannana. Li den tie Kalide yaaba yaa nannana, ban den moandi ya.

¹⁵ Bi den ñagini bi ciamu leni ti gbanñagiditi, ki fini bi yula leni ti finfinjuadi. Bi den pia jakoandimoanba yaa sedima. Li den naani cain leni Babilonni yaaba. Kalide mo n den tie bi diema.

¹⁶ Oholiba n den li cili ki laa ba yaa yogunu yo ke o den bua ba, ki den soani a tonda bi po Kalide diema nni.

¹⁷ Babilonni yaaba mo den gedi o kani ki baa taani leni o. Bi den joagini o leni bi conconma. Wani mo den joagini o yuli leni ba. Lani n pende, ke o yama den ñani bi niinni.

¹⁸ O den doagidi o conconma. O go den doagidi o mubima. N yama den ñani o niinni, nani n yama n den ñani o kpelo nni maama yeni.

¹⁹ O den conbi ki pugini, ki tiadi o jafandi yogunu, wan den conbi Ejipiti nni maama.

²⁰ Lankane ke o go den mangi o pali leni mi conconma danba, yaaba yaa gbani n den fiidi nani i ŋunbi yeni, ke bi do biyaba nani i taami yeni.

U Tienu baa cuo Jerusalemi

²¹ Oholiba, a go tiadi a jafandi yogunu cagindi, Ejipiti yaaba n den taabidi a benli, ki go ŋmangi a jafanbiina yaa yogunu.

²² Oholiba, o Diedo U Tienu yedi mi naa maama: ‹N baa teni a jaconcona kuli n fii ki sedi a po, a yama n den ñani bani yaaba yaa niinni yeni. N baa ñani ba i kaani kuli ban fii ki sedi a po.

²³ Babilonni yaaba leni Kalide yaaba, Pekodi yaaba, Soa yaaba, Koa yaaba leni Asiiri yaaba kuli baa taani leni ba bi jawaaba yaaba n pia yankuali, guveneerinba leni bi yudanba kuli, bi toatieba yudanba leni a nikpiaga, bikuli jagi i taami.

²⁴ Bi baa baa ŋa leni ti jatiadi, ti toateliti leni ti jatiaciandi buoli kuli. I nibuoli mo baa taani i kaani kuli leni a gbankafenciama leni a gbankafenbila leni a kusana ki fii ki sedi a po. N baa waani ba a tagili, ban bu leni a nani bi bali maama n tie maama.

²⁵ N baa wuli n nunponli a po: bi baa mabini a leni li pabienli. Bi baa dadi ki ŋabi a mianu leni a tuba, ki kpa a puoliŋuani mo leni ki jugisiega. Bani n go baa taa a bijaba leni a bisiaba u mu n je a puoliŋuani yaaba n baa sieni mo.

²⁶ Bi baa fie a tiayiekaadi, ki ñani ŋan bogidi a yuli leni yaa tiadi kuli.

²⁷ N baa teni ŋan den ñani Ejipiti diema nni leni yaa conconma yeni, n baa u bianu. A yama baa ña bi niinni, ke a kan go tiadi Ejipiti yaaba po.› »

²⁸ Li Miali Diedo U Tienu yedi: N baa taa ŋa ki teni ŋan nani yaaba yeni leni a yama n den ñani yaaba yaa nni yeni.

²⁹ Bi baa mabini a leni ki nanga, ki gaa a piama kuli, ki yiedi a ki ŋaa ŋa mubima. A cagindi kuli baa doagidi, ban bandi tin bia ki da maama.

³⁰ Bi baa soani a yene, kelima a den conbi leni i nilanbuoli, ki joagini a yuli leni bi buli.

³¹ A den ŋoadi a kpelo taafuuli. Li tie lani yaa po yo ke n baa faligi a, nani min faligi o maama yeni.

³² Li Miali Diedo U Tienu yedi mi naa maama: «A baa ño a kpelo tadiñokaaga nni, Kani yaaga n pia ki go ñua. Ki baa yaa tie faliga leni ñuali bonla Kelima ki gbie bonŋanla.

³³ A kpelo Samari tadiñokaaga yeni, Baa gbieni a mi gaadima leni mi funfunma, Kelima ki tie fala leni paboanli tadiñokaage.

³⁴ A baa ñuudi ga ki mudi ga cabacaba, Ki poagili a biina, Kelima mini n maadi. Li Miali Diedo U Tienu n yedi yeni.»

³⁵ Li tie lani yaa po yo, ke mini o Diedo U Tienu yedi mi naa maama: «Nani ŋan sundi n po ki luni nni a puoli po yeni, a conconma leni a cagindi panpaani kuli, baa guani ki jiidi a yuli po.»

U Tienu buni ki cuo Samari leni Jerusalemi

³⁶ O Diedo den yedi nni: «Nisaalo biga, a bua ki jia Ohola leni Oholiba buudi, ki doagidi ki waani ba bi tuongunda bi?

³⁷ Bi puni bi yula mi conconma po. Bi nii mo pia mi soama. Bi den conbi leni i buli, ki taa ba ban den mali n po yaa bijaba yeni, ki padi ba i buli po.

³⁸ Diidi ban go tieni nni yaala: dayenli nni bi den joagini n kaangagidiŋamu, ki go joagini n fuodima dana.

³⁹ Ban den kua n kaangagidiŋamu nni yaa daali, bi den taa bi bijaba ki padi i buli po, ki joagini likani. Lani n tie ban den tieni yaala n diegu tugu nni.

⁴⁰ Bi go den teni ba ke bi lingi bi po bi jaba, yaaba n ñani foagima. Bi den soani bi po a tonda ke bi cua. Bi jaba yeni yaa po yo, ke a wali, ki diani a nuni leni cilo ki bogidi a yuli leni a tiaŋandi.

⁴¹ A den kali yaa duanu n ŋani po, tabili n den se yuu yaa nintuali, ŋan den tuani n dugibila leni n kpama yua yaa po.

⁴² Bi den gba yaa niligu n yabi, ki naa yagini ku yama fuugu. Niba boncianla den pugini bi po, yaaba n den ñani mi fanpienma nni kuli. Bi den pilini a naataanpolieda yeni nii a biana, ki go cibini bi yula po yaa badifogilimu n ŋani.

⁴³ Lanwani, n den yedi yua n cadi kelima mi conconma po yeni: ‹Wani n puni o yuli moala mi conconma po.

⁴⁴ Bi den caa o kani, nani ban caa li puokpagili kani maama yeni. Bi den caa Ohola leni Oholiba, bi cancaginpuoba yeni kani yene.

⁴⁵ Ama diidi yaa jaba n tiegi, baa bu bi buudi, nani ban bu yaa puoba n conbi buudi maama yeni. Nani ban bu yaa puoba n wuliti mi soama buudi maama yeni, kelima bi tie conconma danba. Bi nii mo gbie leni mi soama.› »

⁴⁶ Li Miali Diedo U Tienu yedi mi naa maama: «Bi niba n taani ki fii bi po, ban fagi ba, ki lu ba i jeje nni.

⁴⁷ Laa nitaanli baa lugidi ba a tana, ki pedi ba leni mu jugisiemu. Bi baa kpa bi bijaba leni bi bisiaba, ki juu bi diedi mo u mu.

⁴⁸ N baa teni ti cagindi n gbeni mi diema nni. Li baa bangi bi puoba kuli, ke bi kan go tieni cagindi, nani yi yaadi yeni.

⁴⁹ Bi baa teni yi cagindi n guani ki baa bi yula po, yin tugi yi bupadu tuonbiadi tugili. Lani, yi baa bandi ke n tie Li Miali Diedo U Tienu.»