Esekieli 22 - U TIENU MAAMA TILI 2013

Jerusalemi cancagintuona

¹ O Diedo den maadi nni yaa maama n tie ne:

² «Nisaalo biga, bogini ki jia Jerusalemi u soawulidogu yeni buudi. Teni wun bandi u tuongunda kuli.

³ Ŋan yedi daa, ke o Diedo U Tienu yedi mi naa maama: ‹Diidi yaa dogu n wuliti mi soama u niinni, ki bogindi u bolinma daali. U tagi i buli ki joagindi u yuli!

⁴ I tagili jagi a yuli po kelima ŋan den wuli yaa soama po. I tagili jagi a yuli po, kelima a den joagini a yuli leni ŋan den tagi yaa buli. Lani yaa po, a wadi a miali dana. A bina tuoni a bianu. Lani n cedi ke n baa fiagi a i nilanbuoli nintuali, dielanma mo kuli baa yaa ñuadi a.

⁵ Yaaba n kuu leni yaaba n ye foagima baa ñuadi a, kelima a joagindi yeli n ñani, a go gbie leni ti yanyagidi mo.

⁶ Diidi, Isidayeli badijaba wuliti mi soama a niinni, yuakuli leni o paalu n da maama.

⁷ A yaa niinne, ke bi fali bibaa leni binaa. A siiga nne, ke bi mabindi bi canba. A yaa kane, ke bi janbidi a kpienbila leni a kpepuona.

⁸ A fali min gandi ki ŋanbi yaala, ki joagindi n fuodima dana.

⁹ A yaa kani n pia ku tuotabigu danba yaaba n wuliti mi soama. A kane ke bi di a juana po padijiema. Bi tiendi ti cagindi buoli kuli a yaa niinne.

¹⁰ A yaa niinne, ke bi laadi bibaa mubima. A yaa niinne, ke bi ñiigi yaa pua n laa o ŋmaalo.

¹¹ A yaa niinne, ke yuakuli tiendi ti cagindi leni o lielo pua, ke yuakuli joagini o yuli leni wan tiendi yaa cagindi leni o biyuaga, ke yuakuli mo ñiigi o waalo, o baa bisalo.

¹² A yaa niinne, ke bi gaani li suuli ki wuliti mi soama, ki gaani yaa ñuadi n yabi ki pendi, ki fenli bi lielo leni u paalu. Ama mini wani, a sundi n po! Li Miali Diedo U Tienu n yedi yeni.

¹³ Diidi, n pua ki ledi n nii, kelima ŋan tieni yaa febu leni ŋan wuli yaa soama, ke mi ye a niinni yeni po.

¹⁴ Naani a baa yaa pia li papaali, a nii mo n yaa pia u fidu, min baa cua ki pua ŋa yaa yogunu? Mini Li Miali Diedo n yedi yeni, n go baa tieni mo.

¹⁵ N baa yadi a buolu i nilanbuoli leni dietoama nni, ki ñani a niinni a joagindi kuli.

¹⁶ A Fiagi a yuli i nilanbuoli nintuali, die a baa bandi ke n tie Li Miali Diedo.› »

¹⁷ O Diedo go den maadi leni nni yaa maama n tie ne:

¹⁸ «Nisaalo biga, Isidayeli yaaba tua n po nani yaa kudi n naa duadi yeni. Bi naani leni ban kuodi yaa ŋanjilifa, yaa kumoandi, yaa noabindi, yaa kuboandi leni yaa sinkaali ki buaga nni yeni. Likuli tie ŋanjilifa yaa joaginde.

¹⁹ Li tie lani yaa po, ke mini o Diedo U Tienu yedi mi naa maama: Nani yikuli n tua joagindi yeni, n baa taani yi ki dogini yi Jerusalemi siiga.

²⁰ Nani ban tigi u mu ke ŋanjilifa, ti kumoandi, ti kuboandi, ti noabindi leni sinkaali kuli nandi ki taani maama ki buaga nni, nmoko baa taani yi n pabienli nni yene. N pabiencianli nni, n baa kpieni yi, yin nandi.

²¹ N baa taa yi ki dogini dogini, ki tigi n pabienli mu yi po. Lanwani, yi baa nandi Jerusalemi siiga nni.

²² Nani ŋanjilifa n yen nandi ki buaga nni maama, yimo baa nandi u niinni yene. Lani, yi baa bandi ke mini Li Miali Diedo n wuli n pabienli yi po.»

²³ O Diedo go den maadi nni yaa maama n tie ne:

²⁴ «Nisaalo biga, ŋan yedi Jerusalemi yaaba ke bi dogu naani leni yaa tinga n ki ŋuudi ki ŋanbi yene. Laa tinga naa den baa taaga li pabienli daali.

²⁵ Jerusalemi dogu saawalipuaba fiini mi yiema u niinni, nani yaa yangbanlo n yen duni, ki toadi wan cuo yaa yanga yeni, bi baa fie bi niba piama, bi tiadi, ki kpa bi niba, ki teni a kpepuona n yabidi u dogu nni.

²⁶ Laa dogu kopadicianba miidi n bali maama, ki fali min gagidi ki ŋanbi yaala. Bi naa tiendi gagidima yaala n gagidi ki ŋani leni yaala n joagini siiga. Baa bangi bi niba yaala n ŋani leni yaala n joagini paadima, baa go faami n fuodima dana po mo. Oba kuli mo ki go fangi nni, nani lan bi pundi ban yaa fangi nni maama.

²⁷ U badijaba ye u niinni nani yaa fuasangbanli n dadi ki toadi ban cuo yaa yandi yeni. Bi wuliti mi soama, ki bolindi bi niba ki bua ki yaa baadi ti ñuadi.

²⁸ U dogu yeni saawalipuaba yen bobini laa bonla kuli leni yaa bonlekaala leni yaa saawalo n tie faama, nani ban boali yaa bilini li muanli yeni. Bi tua: ‹Li Miali Diedo U Tienu yedi mi naa maama!› Ke o Diedo mo naa yedi liba kuli.

²⁹ Mi diema niba puni bi yula ki mabinga po, ki su, ki janbidi a luoda leni a tadima, ki mabindi bi canba, teginmiba kuli ki ye.

³⁰ N lingi bi siiga yaa niba n baa maa u bilinu ki gaa ba, yua n baa fii ki sedi n nintuali u bilinu n padi naankani, ki jaandi mi diema po, ke man da bodi. Ama mii laa oba kuli.

³¹ Lani n teni ke n wuli bi po n pabienli, ki bolini ba leni n pabienli mu. N baa teni bi tuona n guani ki baa bi yula po. Mini o Diedo, U Tienu n yedi yeni.»