Esekieli 21 - U TIENU MAAMA TILI 2013

O laabaalibiado Isidayeli yaaba po

¹ O Diedo den maadi nni yaa maama n tie ne:

² «Nisaalo biga, pegidi a nunga ki teli a jienu po, ki maadi ki fu leni nuganu po yaaba! Pua saawali nuganu fuali po yaaba po!

³ Ŋan yedi nuganu fuali po yaaba: ‹Cengi mani o Diedo maama! Mini o Diedo U Tienu yedi: Mini n ba cuoni u mu yi siiga, u baa buoni i tisoangidi leni i tikuondi kuli. U mu yeni kan gbindi, yaala n ye u mu yeni niinni kuli baa juu, ki cili nuganu ki yaa caa hali nujienu.

⁴ Lani, nisaalimiali kuli baa le ke mini Li Miali Diedo n cuoni u ke u kan gbindi.› »

⁵ N den yedi o Diedo U Tienu: «Bi tua ke n tie kpanjapuale.»

⁶ O Diedo go den maadi nni yaa maama n tie ne:

⁷ «Nisaalo biga, pegidi a nunga ki teli Jerusalemi dogu, maadi ki fu leni bi niba n kpiagidi yaa kaani, ki pua saawali Isidayeli diema po!

⁸ Ŋan yedi Isidayeli diema yaaba: O Diedo yedi mi naa maama: N baa cua ki baa yi, n baa ñani n jugisiega ki tuagu nni, ki ñani bi niteginkaaba leni a nibiadiba kuli yi siiga.

⁹ Nani min bua ki ñani yi siiga, o niteginka leni o nibiado yeni, lani n teni ke n ñani n jugisiega ki tuagu nni, ki baa bolini nisaalimiali kuli, ki cili nuganu po, ki yaa caa hali nujienu po.

¹⁰ Lani, li ŋandunli kuli baa bandi ke mini Li Miali Diedo n ŋundi n jugisiega ki tuagu nni, ki kan go guani ki ŋuuni ka lienni mo.

¹¹ Lanwani, fini nisaalo biga, buudi ki poali ki buani kelima li paboanli po, ki buudi bikuli nintuali.

¹² Lani, bi yaa buali a: ‹Be yaa po ke a buudi?› Ŋan yedi ba: ‹N buudi kelima laabaalibiado kpendi, yua n baa cie yuakuli jigi. Yuakuli tugusoama baa sani. Yuakuli gbanu mo baa jeli, yama kuli mo baa yagi, dunli kuli baa kuagi. O laabaalibiado yeni kpendi ne, o cua moko! Li Miali Diedo U Tienu n yedi yeni.› »

Bu toabu saawalo

¹³ O Diedo go den maadi leni nni yaa maama n tie ne:

¹⁴ «Nisaalo biga, Pua saawali ki yedi: O Diedo yedi mi naa maama: ‹Diidi ki jugisiega ne, Ban luani ki go kpilini yaaga.

¹⁵ Li tie baa kpa po yo ke bi luani ka. Bi kpilini ka ke ki pelini nani mi tañigima yeni.

¹⁶ N den teni ban kpilini ka Ke u nuu n fidi ki muubi ka. Kani ki jugisiega yeni, Bi luani ka ki go kpilini ka mo, Ki baa teni ga yua n kpaani.

¹⁷ Fini nisaalo biga, kpaani ki kuudi Li paboanli kuudi! Kelima laa jugisiega pegidi ki baa n niba Ki go baa Isidayeli badijaba. Bi taani ki luni ki jugisiega po, Bi badijaba leni n niba. Lani yaa po, pua a benli li paboanli po.

¹⁸ Li tie biigicianme. Be n bi den baa tieni, Ki faliga badigbiamu yeni yàá den ye? Li Miali Diedo U Tienu n yedi yeni.

¹⁹ Lanwani, fini nisaalo biga, Ŋan pua saawali, Ki pua ki ledi a nii. Ki jugisiega baa pedi taalimilie bi taalimitaa! Li tie mi bolinma jugisiega, Yaaga n ŋua ki deli ba.

²⁰ Lan baa tieni maama Ti jawaandi n cuo ba po yo, Ke n teni ke yuakuli digibi leni i jeje. N sieni mi bolinma jugisiega Buliñoabu kuli nintuali, Yaaga n pelini nani mi tañigima yeni, Bi luani ka kan kpa po yo.

²¹ Ki jugisiemanga yeni, Pe ganu leni jienu.

²² Nmoko baa pua ki ledi n nii, Ki teni n pabienli n tuoni li bianu. Mini Li Miali Diedo n yedi yeni.› »

Bi baa baa Jerusalemi

²³ O Diedo den maadi nni yaa maama n tie ne:

²⁴ «Fini nisaalo biga, ŋan fuu sanilie, Babilonni bado n baa tagini yii ki cua leni o jugisiega. I sanliedi yeni kuli baa ña dieyenma nne. Yin ñani naankani, ŋan waani sanu kuli n caa yaa dogu po.

²⁵ A baa fuu sanyendu, ke ki jugisiega n pundi Anmoni yaaba dociamu Raba leni Juda diema kaanpaalu Jerusalemi.

²⁶ Babilonni bado sedi a sankada kani, sanilie yeni n ñani naankani, ki baa bu ku baagu. O bebegi o piemi, ki buali o buli, ki go diidi bonŋanla wan padi yaa yandi yeni puana.

²⁷ Yaa piemu n waani Jerusalemi yeni, den baa o nujienu nni, wan den sieni ti jatiaciandi naanpo. O baa teni li ñoamabonli ban gedi ki ban bolini ki yaa kuudi bu toabu kuudi. Bi baa sieni a petona buliñoabu kuli kani, ki fiini a binbina ki maa i toawuonkaani.

²⁸ Bani yaaba n poli yeni baabuuli tie fanme. Ama wani, o tiadi ba bi tagili, ke laa pia kuli tama ke bi baa cuo ba ti yonbidi.

²⁹ Li tie lani yaa po, ke mini o Diedo U Tienu yedi mi naa maama: Yi tiadi yi biadima yaa tiadima, yi yiema n den doagidi maama leni yi tuonbiadi mo n den doagidi yi bontienkaala kuli nni maama. Lanwani, nani yin guani ki tiadi lipo yeni po, yi baa baa yibalinba nuu nni.

³⁰ Lani, fini Isidayeli badijoa, o nibiado leni yua n ki ŋua Tienu yeni, u yogunu kpendi ke a tuonbiadi yeni baa baa u bianu.

³¹ Li Miali Diedo U Tienu maadi ki yedi mine: ‹Ban ñani wan yili yaa cabili yeni, ban ñani o badifogiliga. Li bonla kuli lebidi! Bi yumiindanba baa diedi yaa kaani n pa, bi paatieba mo n jiidi.

³² Bolinma, bolinma, bolinma bebe n yeni! Lani n tie min baa tieni yaala! Li bonla kuli lebidi cain, ki guu yua n die li bujiali yaa cuama leni min baa teni yua u dogu yeni.› »

Bi baa baa Anmoni yaaba

³³ Nisaalo biga, ŋan pua saawali ki yedi: «Li Miali Diedo U Tienu maadi mine, Anmoni yaaba po leni bi fe po. Ŋan yedi: ‹Ki jugisiega! Ki jugisiega ŋundi, Bi kpilini a mi bolinma po, A baa je ki go yaa pelini nani mi tañigima yeni.

³⁴ Ŋan baadi li bonlekafanla leni ŋan bu yaa baagu n tie faama yaa yogunu yeni, ki jugisiega baa taani a leni ban jia yaa nibiadiba yula, yaaba yaa daali n pundi ke bi biadima mo tuoni mi bianu yeni.

³⁵ Ŋan guani ki ŋuuni a jugisiega ki tuagu nni. N baa jia a buudi ban den tagi a naankani, ŋan den mali yaa diema nni.

³⁶ N baa wuli n pabienli a po, ki teni n pabienli mu n baa ŋa, ke ŋan baa yaa nibolinkaaba n bolindi nuu nni.

³⁷ U mu baa je ŋa, a soama mo baa yaa ye mi diema siiga. Bi kan go tiadi a po, kelima mini Li Miali Diedo n yedi yeni.› »