Esekieli 2 - U TIENU MAAMA TILI 2013

U Tienu soani Esekieli Isidayeli yaaba kani

¹ O den yedi nni: «Fini nisaalo biga, fii ki sedi ke n baa maadi leni a.»

² Wan den maadi leni nni yaa yogunu, U Tienu Fuoma den kua n niinni, ki teni ke n fii ki sedi. N den cengi yua n den maadi leni nni yeni.

³ O den yedi nni: «Fini nisaalo biga, n baa soani a Isidayeli yaaba buoli kani, bani yaaba n fiini n po mi yiema yeni po. Bani leni bi yaajanba kuli den tie n po niyiekaaba, ki taa ki pundi hali dinla.

⁴ N soani a, bani yaaba yaa tuli n pa, ke bi pala mo juagi yeni kani. Ŋan yedi ba ke o Diedo U Tienu yedi daa:

⁵ ba ke bi tie niyiekaaba, bi baa bandi ke o saawalipualo ye bi siiga, ban cengi leni ban kaa cengi a kuli.

⁶ Ama fini nisaalo biga, ŋan da jie bani leni bi maama. Li baa yaa tie nani ke a ye i konkoni leni i nami siiga yene. Ŋan da jie bi maama leni bi nunmu, kelima bi tie nibuoyieko yo.

⁷ Ŋan togidi ba min den yedi a yaala, ban cengi leni ban ki cengi a kuli. Bi li tie niyiekaabe.

⁸ Ama fini nisaalo biga, cengi min baa yedi a yaa maama: Ŋan da tua niyieka nani laa nibuoyieko yeni. Ŋan yaadi a ñoabu ki ŋmani min baa teni a yaala.»

⁹ N den nuali ki laa ke u nuu tiegi nni ki muubi li tigbabikaali.

¹⁰ O den gbabidi li n nintuali: Li den diani li tugu nni leni li puoli po. Li den diani lipo: “Wanli, bubula leni paboanli.”