Esekieli 19 - U TIENU MAAMA TILI 2013

I wanli Isidayeli badijaba po

¹ Lanwani fini, wanli Isidayeli badijaba po.

² Ŋan yedi: «Yi naa den tie be? Yangbanñua. O den laabi a yangbanjala siiga. Li tie yangbanbisaaga siiga yo Ke o den wubi o bila.

³ O den wubi o bila yeni siiga yendo, Ke o tua yangbanjawaalo. O den bangi wan baa cuo maama. O den ŋmani bi niba.

⁴ Dietoama den gbadi ke bi maadi o maama, Ke bi den dia ki cuo o bi diagu nni, Bi den pudi o maja ki gedini o Ejipiti diema nni.

⁵ O yangbanñua yeni den sua Ke o guudima leni o suginma tua fanma, O go den taa o bila siiga yendo Ki wubi o ke o fandi.

⁶ O den gaandi a yangbanjala siiga. O den baa u fidu bonŋanla Ki den bandi wan baa cuo maama. O den ŋmani bi niba.

⁷ O den pua ki mudi bi badiba diedi, Ki teni ke bi dogi kuli tua diegbendi. Mi diema leni mi niba kuli Den ye leni ti jawaandi, Bi yaa gbadi o dunli yaa yogunu.

⁸ Yaa nibuoli n den lindi o kuli Den fii o po ki baa baa o. Bi den dia o bi diagu, Ke o baa ku niinni ke bi cuo o.

⁹ Bi den pudi o maja ki kuani o ku kpaku nni. Bi den gedini o Babilonni bado kani, Ki kuani o li kpaadidieli nni, Ke ban da go gbadi o nialu Isidayeli diema juana po.

I wanli duven tiidi po

¹⁰ Yi naa den naani leni ban ŋuu yaa duventibu mi ñima kani. Bu den luoni ki go pia ti faadi bonŋanla, Kelima bun den baadi yaa ñima po.

¹¹ Bu den pia yaa beni n pia u paalu, Yii n den tua badigbiami. Bu den kpedi ki cie i tiidi kuli, Hali ke bi ñuadi bu kpedima Leni bu beni n yabi maama.

¹² Ama bi den ŋabi bu leni li pabienli, Ki luni bu tiipo. Yaa faalu n ña puoli den teni Ke bu bonluonkaala kuodi. Bu beni yii n den pia u fidu yeni, Den padi ki baa ki kuodi. U mu mo den buoni yi.

¹³ Moala bi ban ŋuu bu mi fanpienma nne, Yaa tinga n kuodi kaa pia ñima nni.

¹⁴ U mu den ñani bu beni nni, Ki buoni bu bonluonkaala leni bu beni kuli. Bu naa go pia yaa benu n pia u paalu Ki baa fidi ki go tua badigbiamu. Line n pundi yin wanli bu po. Moamoani, yiini mani bu po i kuyani.»