Esekieli 18 - U TIENU MAAMA TILI 2013

U Tienu baa jia yuakuli buudi

¹ O Diedo den maadi nni yaa maama n tie ne:

² «Yi baa yedi be leni ban pua yaa kpanjama Isidayeli diema nni po: ‹Bi baanba ŋmani a cabikaana, ke bi bila ñina gaabi?›

³ Mini o Diedo U Tienu yua n fo poli ki yedi ke yi kan go pua laa kpanjama Isidayeli diema nni.

⁴ Mini n die yuakuli miali, bibaa miali leni ki biga miali, mini n die laa mialieda kuli. Yua n tieni ti tuonbiadi, wani n baa kpe.

⁵ O niteginka tie yua n ŋua yaa bujiali n tiegi leni mi teginma,

⁶ ki naa di a juana po padijiema, ki naa ŋua Isidayeli yaaba buli. O go tie yua n ki jiadi o lielo pua, ki naa taagi leni yaa pua n ye o ŋmaalo nni ki baa joagini o yuli.

⁷ O didi go tie yua n ki janbidi o lieba, ki guandi ban ledi o kani ki bili yaala, ki naa su, ki puuni mi koma n pia yua mi jiema, ki puuni yua n ye mubima mo ti tiayiekaadi.

⁸ O tie yaa nilo n ki dindi panli ki daani ñuadi, ki kubi o yuli, ki naa tiendi yaala n ki tiegi, ki ja nibilie siiga buudi leni mi teginma.

⁹ O ŋua n mabilikaama, ki kubi n bali maama, ki ŋua i moamoani. Moamoani, landaano baa yaa ye ki fo. Mini o Diedo, U Tienu n yedi yeni.

¹⁰ Ama li yaa tie ke o niteginka yeni, mali bibiadiga, yua n tie sanjialo, ki wuliti mi soama, bi ki tiendi yaa tuonbiadi n ye ne kuli,

¹¹ o baa n ki den tiendi yaadi: o yaa di a juana po padijiema, ki jiadi o lielo pua, ki janbidi taliga leni o tadimo, ki su,

¹² kaa guandi ban ledi o kani ki bili yaala, ki ŋua i buli, ki go tiendi ti cagindi,

¹³ ki dindi li panli ki gaani ti ñuadi. Naani laa nilo baa yaa ye? Moamoani, o kan yaa ye, kelima o tieni laa cagindi kuli. Laa pia kuli tama, o baa kpe, o soama mo n guani ki jiidi o yuli po.

¹⁴ Ama omo yaa mali biga, yaaga n laa o baa n tiendi yaa tuonbiadi kuli, ki naa ŋoadi o baa fuuli:

¹⁵ kaa di a juana po padijiema, kaa yaadi ki diidi Isidayeli yaaba buli, kaa jiadi o lielo pua,

¹⁶ kaa janbidi o lieba, kaa gaani bi yaa ledi o kani ki bili yaala, kaa su, ama ki puuni o jiema mi koma n pia yua, ki yiendi yua n ye mubima mo.

¹⁷ Waa mabindi taliga, waa dindi panli ki gaani ñuadi. O ŋua n mabilikaama leni n bali maama. Laa nilo kan kpe kelima o baa tagili po. Moamoani, landaano baa yaa ye.

¹⁸ O baa n den tie o nibiado, ki den su, ki tieni yaala n ki ŋani o buolu siiga. Lanwani, wani n baa kpe kelima o tagili po.

¹⁹ Yi tua: ‹Be yaa po ke ki biga kan tugi o baa tagili?› Li tie ke ki biga yeni, den tiendi yaala n dagidi ki tiegi, ki kubi ki go tiendi n mabilikaama kuli. Moamoani o baa yaa ye.

²⁰ Yua n tieni ti tuonbiadi yeni, wani n baa kpe. Ki biga kan tugi o baa tagili, bibaa mo kan tugi o biga tagili. O niteginka teginma baa jiidi o yuli po, o nibiado mo yaa biadima n jiidi o yuli po.

Mi ŋanma tienma

²¹ Li yaa tie ke o nibiado lebidi ki ŋaa wan den tiendi yaa tuonbiadi kuli, ki kubi n mabilikaama kuli, ki tiendi mi teginma, moamoani o baa yaa ye, o kan kpe.

²² Bi kan go tiadi wan den tieni yaa biadima kuli po, o baa yaa ye kelima wan tieni yaa teginma yeni po.

²³ Mini o Diedo U Tienu yedi: ‹Naani n bua o nibiado kuuma yo? Min sugini yaala tie wan lebidi o tagu ki yaa ye ki fo.›

²⁴ Ama li yaa tie ke o niteginka ŋaa o teginma, ki tieni yaala n ki tiegi, ki togidi o nibiado n bi tiendi yaa cagindi kuli, naani o baa yaa ye? Bi kan go tiadi wan den tieni yaa teginma kuli po. Wan tieni yaala n ki tiegi yeni po leni wan tieni yaa tuonbiadi po, o baa kpe kelima lani yaa po yo.

²⁵ Yi tua: ‹O Diedo sanu naa tiegi.› Cengi mani yinba Isidayeli yaaba! Naani mini yaa sanu n ki tiegi? Naani laa tie yinba yaa sani ka n ki tiegi?

²⁶ Li yaa tie ke o niteginka ŋaa o teginma ki tieni yaala n ki tiegi, o yaa kpe, o kpe kelima wan tieni yaala n ki tiegi yeni po yo.

²⁷ Li yaa tie ke o nibiado lebidi ki ŋaa wan den tiendi yaa biadima, ki ŋua yaa bujiali n tiegi leni mi teginma, o baa yaa ye.

²⁸ O yaa bandi wan den tieni yaa biadima kuli, ki nan guani ki ŋaa likuli, moamoani o baa yaa ye, o kan kpe.

²⁹ Ama yinba Isidayeli yaaba yi tua: ‹O Diedo sanu naa tiegi. Isidayeli yaaba! Naani li tie mini yaa sani n ki tiegi? Yi yaa sani n ki tiegi›

³⁰ Li tie lane yaa po, ke mini o Diedo U Tienu yedi: ‹Yinba Isidayeli yaaba, n baa jia yendo yendo buudi nani o tagu n tie maama. Lebidi mani ki ŋaa yi biadima ki guani mani, ke yi tagili n da ti tua yi po tantuudikaali.

³¹ Yin foagidi mani leni yin den tiendi yaa biadima. Lebidi mani yi pala leni yi yantiana. Be yaa po ke yinba Isidayeli yaaba baa kpe?

³² Mini o Diedo U Tienu yedi ke mii bua niloba kuli kuuma. Lebidi mani ki guani ki yaa ye!› »