Esekieli 16 - U TIENU MAAMA TILI 2013

Jerusalemi tie nani ban luni yaa bonpuoga

¹ O Diedo den maadi nni yaa maama n tie ne:

² «Fini nisaalo biga, doagidi ki waani Jerusalemi dogu u cagindi.

³ Ŋan yedi u daa, ke o Diedo U Tienu maadi leni u yaa maama n tie ne: A yaajanba den tie Kanana diema yaabe, ke amoko go mali lankani. A baa den tie Amoriti buolu yua, a naa mo, Hititi buolu yua.

⁴ Ban den mali a yaa daali, baa den jia a ŋulibu, baa den wali a leni mi ñima ki ŋanbi a, baa den duuni a leni mi yaama, baa den bobini a canpanditiadi.

⁵ Niloba kuli ki den gbadi a po ninñima, ki tieni a po laa bonla kuli siiga ba bonyenla. Ama a maadaali, bi den sengi a, ki luni a li fuali nni.

⁶ N den tagi ki baa pendi a kani, ki laa ŋa ke a dua a soama nni, ki moa. N den yedi a: ‹Yaa fo!› Ŋan den dua a soama nni yaa yogunu, n den yedi a: ‹Yaa fo!›

⁷ N den teni ke a kpedi, nani i kuani nni yaa muadi yeni. A den fandi ki beni ki dagidi. A den ŋani hali bonŋanla. Die a da den ye mubime.

⁸ Li yaa puoli, n den tagini ki diidi a, ki sua ke a beni ki dagidi, ki pundi jafaano. N den tandi a po n kpalibu ki doagini a mubima. N den poli leni a, ki niani a n ñoanianu ki danli leni a, ke a den tua n yua. Mini o Diedo, U Tienu n yedi yeni.

⁹ N den taa mi ñima, ki wali a, ki ñani yaa soama n den maa a po. N go den wuli a po mi kpama.

¹⁰ N den yieni a leni yaa caba n ŋali ki kpaa, ki pilini a yaa cacaadi n tie gbandi. N den yilini len gaali yaa yucabili, ki go den lani a yaa liadili yaa dunga n pa.

¹¹ N den pilini a nii a biana, ki lani a tulu u laanu.

¹² N den joani a mianu mi ñoagima, ki tuuni a tuba mi tubilenlenma, ki cibini a yuli yaa badifogiliga n ŋani hali boncianla.

¹³ A laani leni a tubilenlenma kuli den tie wula leni ŋanjilifa, a tiayiekaadi mo den tie yaa tiadi n ŋani hali bonŋanla leni len gaali ki go ŋali ki kpaa. A jiema den tie yaa yoma n dingi bonŋanla, ti siadi leni olivie yaa kpama. A den ŋani boncianla, hali ki tua bado.

¹⁴ A yeli den ñani i nibuoli siiga, kelima a nunyieŋanga leni min den bobini a yaa tiakpiagidi, ki ŋanbi a po. Mini o Diedo, U Tienu n yedi yeni.

Jerusalemi naani leni li puoconconli

¹⁵ Ama ŋaa go den dugi n po, ki ji dugi a ŋamu po, kelima a yeli n den ñani maama po. A den tua puokpagili ki conbi leni yua n pendi a kani kuli.

¹⁶ A den yiedi a tiadi, tini yaadi n ñoalini ki ŋani, ki ŋanbidi a padibinbina ya n ye a juana po, ki ladi ki conbi ti po. Ŋan den tieni yaala yeni, li buolu daa bi tieni, ki kan go tieni mo.

¹⁷ Min den taa n wula leni n ŋanjilifa ki tieni a po yaa biana leni yaa laani ki ŋanbi a yeni, a den taa lane ki duadi a ninannana, ki conbi leni a.

¹⁸ A den taa a tiayiekaadi yaadi n hali ki kpaa ki bobini a ninannana yeni, ki go taa n kpama leni n dugibila ki padi a ninannana yeni po.

¹⁹ A go den taa min den puuni a yaa jiema, min den dindi a yaa yoma, yaa siadi leni yaa kpama ki padi laa bonla ke li tua nani yaa padijuukaali yaa nuulu n mani bi po. Lani n tie ŋan den tieni yaala. Mini o Diedo, U Tienu n yedi yeni.

²⁰ A go den taa a bijaba leni a bisiaba, ŋan den mali n po yaaba, ki padi ba a buli yeni po. Naani ŋan den conbi yeni daa, li daa den dagidi a po yo, ke a go den tieni yeni?

²¹ A go den kodi n bijaba ki poandi ba u mu nni, ki puni ba a buli ki kpiagi yi.

²² Ŋan den maani ki tiendi yaa cagindi leni yaa conconma kuli yaa niinni, ŋaa den tiadi a biwaama, ŋan den ye mubima cain yaa yogunu, ki dua ki bilini ki moa a soama nni.

²³ Ŋan tieni yaa biadima na kuli po, fala n baa ŋa. Mini o Diedo, U Tienu n yedi yeni.

²⁴ A den maa ŋan baa yaa padi yaa kaani leni ŋan baa yaa conbi naankani.

²⁵ A den maa a binbina a sankada kuli kani, ki den cagini leni a ŋamu, ki den puuni a yuli, yua n pendi a kani kuli, ki pugini a conconma.

²⁶ A den conbi leni a kuantalieba Ejipiti yaaba, yaaba yaa gbani n ŋani bonŋanla, ki pugini a conconma, ki bieni n pali leni a cancagintuona.

²⁷ Lani yaa po yo, ke n den tandi n nuu ki pua ŋa, ki den wadi a jiema, ki go den teni ke a yibalinba paadi a, bani Filisiti yaaba bisiaba, a conconma n den cuo yaaba i fe.

²⁸ A den conbi leni Asiiri yaaba ke laa dagidi a, ke a go suagi ki pugini a conconma. Ama ba leni lani kuli, laa dagidi a.

²⁹ A go den pugini a conconma hali ke li kandi leni a kpenda, Kalide diema nni. Ama ba leni bani mo, li naa dagidi a.

³⁰ Jam Jerusalemi, be yaa tadingu n baa ŋa ke a soani ba puokpagibado n kan soani yaa tuonli! Mini o Diedo, U Tienu n yedi yeni.

³¹ Ŋan den maa a padibinbina a sankada leni mu daamu nni, ŋaa den tiendi nani puoconconli kuli yeni ka, kelima ŋaa den gaani panpaani.

³² A den tua yaa puoconconli n bua bi canba ki cie ba o calo.

³³ A puoconcona kuli baadi i panpaani, ama fini, a puuni a jaconcona bu paabu. A yen tendi ba a suuna, ki bua ban yaa ña i kani kuli ki kpendi ki conbi leni a.

³⁴ A conconma naa naani leni puoconcontoana. Baa den lingi a, baa den puuni a liba, ama fini n den puuni ba. Lani n teni ke ŋaa taa leni a puoconconya.

³⁵ Lanwani, fini li puoconconli yeni, cengi o Diedo maama!

³⁶ Mini o Diedo U Tienu yedi mi naa maama: Nani ŋan den taa a piama ki wuli ki ladi, ki go waani a mubima a jaconcona a conconma yogunu, ki ŋua i cancaginbuli, ŋan den padi a bila, ki taa bi soama ki puni yii yeni,

³⁷ lanwani n baa taani a jaconcona ŋan den mangidi a pali leni yaaba, ŋan den bua yaaba leni ŋan den nani yaaba kuli. N baa ñani ba i kaani kuli ki taani ba, ki yiedi ki sieni a mubima, ki teni ban le a mubima kuli cain.

³⁸ N baa bu leni a, nani ban bu leni yaa puoba n conbi leni yaa puoba n wuliti mi soama maama yeni. N baa teni n pabienli leni n ponli n kpa ŋa.

³⁹ N baa teni a a jaconcona. Bi baa mudi ŋan den padi yaa binbina kuli po yeni. Bi baa yiedi a, ki fie a laani, a tubilenlenma leni a biana kuli, ki ŋaa ŋa mubima cain.

⁴⁰ Bi baa teni bi niba n fii a po. Bi baa lugidi a a tana ki kpa ŋa, ki cua cua ŋa leni bi jugisiemu.

⁴¹ Bi baa juu a diedi leni u mu ki kuani yaa buudi n den bili a po, bi puoba boncianla kuli nintuali. N baa teni a conconma n baa u bianu, ke ŋan da go fidi ki pa paabuba conconma po.

⁴² N baa teni n pabienli n tuoni li bianu. Li yaa puoli, n kan go yaa pia a po ponli. N baa jiini n yama, ki kan go fiini n pali a po.

⁴³ Nani ŋan ki go tiadi min den tie a po yaala a panma nni yeni, ki tieni yaala n fiini n pali yeni, lani yaa po, mini o Diedo U Tienu yedi ke n baa teni a bontienkaala kuli n guani ki baa a yuli po. Naani ŋaa den tieni cagindi buoli kuli ki pugini a conconma yeni po?

Jerusalemi dogu bia ki cie yaa dogi n sieni

⁴⁴ Diidi bi kpanjapuaba kuli baa pua a po yaa kpanjama n tie ne: ‹Bi naa n tie maama, o bisalo mo tie yene.›

⁴⁵ A tie yaa biga yaa naa, yaa yama n den ñani o calo leni o bila nni. A tie a naataanpola waalo, yaaba yaa yama n den ñani bi ciaba leni bi bila kuli nni. Yi naa den tie Hititi buolu yua, yi baa mo den tie Amoriti buolu yua.

⁴⁶ A kpelo yua n ye a nuganu po tie Samari leni o bisiaba. A waalo yua n ye a nujienu po mo, tie Sodomi leni o bisiaba.

⁴⁷ Ŋaa den ŋua bi fuuli bebe ka. A den waani ke a bia ki cie ba, li bonla kuli nni.

⁴⁸ Mini o Diedo U Tienu yua n fo n yedi ke a naataanpuoga Sodomi leni o bisiaba naa tieni ki pundi fini leni a bisiaba n tieni yaala.

⁴⁹ Diidi yaala n tie a naataanpuoga Sodomi tagili: O den pia ti puopaadi, ki pia mi jiema ke li dagidi, ki naa yagini o yama liba kuli po. Wani leni o bisiaba naa den todi yaaba n ye fala nni leni yaaba n luo.

⁵⁰ Bi den fiini bi yula ki tieni ti cagindi n nintuali. N den laa lane ki bolini ba, nani ŋan nua maama.

⁵¹ Diidi, Samari naa den tieni ba a tuonbiadi boagidima. A cagindi den yabi ki cie o yaa yaadi. Bi yaa biigi fini leni a naataanpola: Samari leni Sodomi, bi baa sua ke bi tiegi ki cie ŋa.

⁵² Fini, tugi a fe, fini yua n den saa a naataanpola po i moamoani, kelima a tuonbiadi den yabi ki cie bi yaadi. Lani yaa po, n teni ke li naaninni ke bi tiegi ki cie ŋa. Lanwani, ŋan tugi i fe leni mi falima, kelima a den saa a naataanpola po i moamoani.

⁵³ N baa guani bi yonbi, Sodomi leni o bisiaba yonbi, Samari leni o bisiaba yonbi, ki taani leni a yaa yonbi yaaba n ye bi yaa yonbi siiga.

⁵⁴ A baa tugi a fe, ki go yaa ye i fe nni leni ŋan den tieni yaala, ke lan fidi ki baagi ba.

⁵⁵ A naataanpola Sodomi leni o bisiaba, baa tua nani ban den kpa tie maama, Samari leni o bisiaba moko baa guani ki tua nani ban den kpa tie maama. Fini leni a bisiaba mo baa guani ki tua nani yin den kpa tie maama.

⁵⁶ Ŋan den jigini a yuli yaa yogunu, a den maadi ki fali a naataanpuoga Sodomi.

⁵⁷ Laa bonla den tieni a biadima n daa den doagidi yaa yogunu. Moala a moko n tua Edomi bisiaba, bi dogi lindima kuli kani leni Filisiti yaaba bisiaba po i fe bonla. Bani yaaba n den fali a i kaani kuli yeni.

⁵⁸ A gaa a tuongunda leni a cagindi panpaani n yeni. Mini Li Miali Diedo n yedi yeni.

⁵⁹ Diidi mini o Diedo U Tienu n yedi yaala: N baa soani a nani ŋan tieni maama, fini yua n naa kubi li poli, ki fidi mini leni fini siiga ŋantaado mo.

⁶⁰ Ama mini, n baa tiadi min den kuani yaa ŋantaado leni a a panma yogunu. N go baa kuani leni a yaa ŋantaado n ki pia gbenma.

⁶¹ A baa tiadi a tagu po, i fe mo n yaa pia ŋa, a yaa ti laa a naataanpola, a nikpela leni a bila kuli. N baa pa ŋa ŋan diedi a naataanpola nani a bisiaba yeni. Ama lani kan yaa taa leni min den kuani yaa ŋantaado leni a.

⁶² N baa kuani o ŋantaado leni a. Yeni, a baa bandi ke n tie Li Miali Diedo.

⁶³ Lanwani, a baa tiadi yaala n den tieni puoli po, i fe n cuo ŋa, ke a kan go tuo ki yaadi a ñoabu. Ama n baa tieni a po sugili leni ŋan den tieni yaa biadima kuli. Mini o Diedo, U Tienu n yedi yeni.»