Esekieli 15 - U TIENU MAAMA TILI 2013

Jerusalemi yaaba naani leni duven tiidi daadi

¹ O Diedo den maadi nni yaa maama n tie ne:

² «Nisaalo biga, Duven tiidi daadi pia be yaa fuome Ki cie yaa daadi n sieni?

³ Naani bi baa taa duven tiidi daadi, Ki tieni yaala n pia fuoma? Naani ti baa tuo ki tieni Ba ban joangi ti tiadi naankani?

⁴ Bi baa kuuni ti u mu nni wun buoni ti. U mu buoni ti ñoakuni leni ti siiga kuli. Naani ti go baa tuo ki soani tuonliba?

⁵ Tin den tie bonmunli yaa yogunu, Baa den taa ti ki tiendi tuonliba, Moala u mu n juu ti yene, Ke ti ji baa baa mi fuoma?

⁶ Li tie lani yaa po, ke o Diedo U Tienu yedi: ‹Nani min taa duven tiidi daadi, Ki luni ti u mu nni, Ke u buoni ti maama yeni, N baa buoni Jerusalemi yaaba yene.

⁷ N baa waani ba fala. Bi tama ke bi ñani u mu nni, Ama, u mu n li baa je ba. N yaa waani ba laa fala yaa yogunu, Yi baa bandi ke n tie Li Miali Diedo.

⁸ N baa teni bi diema n tua fanpienma, Kelima ban ki den tiegi maama po. Mini o Diedo, U Tienu n yedi yeni.› »