Esekieli 13 - U TIENU MAAMA TILI 2013

U Tienu fu leni bi saawalipua-faadanba

¹ O Diedo den maadi nni yaa maama n tie ne:

² «Fini nisaalo biga, ŋan fu leni Isidayeli saawalipua-faadanba, bani yaaba n naandi bi pala nni ki pua saawali, ki yedi ba ke ban cengi o Diedo maama.

³ Mini o Diedo U Tienu yedi mi naa maama: Fala n baa bi saawalipua-yanluodanba po, yaaba n ŋua bi yaa yantiaceli ki naa laa liba kuli.

⁴ Isidayeli saawalipuaba tie nani i coli, yaaba n gaandi ti diejendi nni yeni.

⁵ Yii den gedi ki maa ki ŋanbi u bilinciamu n den mudi naankani, ki naa go maa bilinuba mo ki lindi Isidayeli diema, ke man fidi ki sedi bonŋanla bu toabu nni, o Diedo pabienli daali.

⁶ Bi bonlekaala tie fanma, bi saawalo mo tie faama, bi tua: ‹O Diedo yedi!› Ki nan sua ke o Diedo mo naa soani ba. Bi sugini ke ban yedi yaala n tieni.

⁷ Yin laadi yaa bonlekaala kuli tie faama. Yin wangi yaala n baa cua yeni kuli faama. Yi tua ke mini o Diedo n yedi, ke mini mo naa yedi puu.

⁸ Mini o Diedo U Tienu yedi: Nani yi maama n li tie fanma, ke yi bonlekaala mo tie faama yeni, moala n baa fii ki sedi yi po. Lani n tie mini o Diedo U Tienu n yedi yaala.

⁹ N nuu baa cuo yaa saawalipua-faadanba n baadi yaa bonlekaala n tie fanma, ki pua yaa saawalo n tie faama. Bi kan baa kaanu n niba taanli siiga. Bi yela mo kan diani, Isidayeli yaaba yela tili nni. Bi kan guani ki kua Isidayeli diema nni. Lani, yi baa bandi ke n tie Li Miali Diedo U Tienu.

¹⁰ Bi teni ke n niba yaadi kelima bi tua: ‹Mi yanduanma ye!› Ki nan sua yanduanma ki ye. N niba maa u bilinu ke bi mo boalini u leni li muanli.

¹¹ Waani yaaba n boalini u, ke u bilinu baa wudi. Ki tacianga baa mi, a tatana baa cua, ku tafaaciangu mo n fii ki loli.

¹² U bilinu yeni baa wudi. Lanwani, bi baa buali yi: ‹Yin den boalini u leni yaala yeni, li todi be?›

¹³ Lani n cedi mini o Diedo U Tienu yedi daa: n pabienli baa teni ku tafaaciangu leni ki tacianga n cua. N pali yaa fii yaa yogunu mo, n baa teni a tatana n cua ki bolini likuli.

¹⁴ N baa mudi yin boalini yaa bilinu yeni. N baa teni u bilinu yeni n wudi hali u tanpuuna n ñiidi. U baa baa ki midi yi, ki bolini yi. Lani, yi baa bandi ke n tie Li Miali Diedo.

¹⁵ N baa teni n pabienli n fii ki tuoni li bianu u bilinu yeni leni yaaba n boalini u kuli po. Lanwani, n baa yedi yi: ‹Bilinu ki go ye! Nilo mo ki go ye yua n baa boali u.

¹⁶ Isidayeli yaaba siiga kaa go pia bi saawalipuaba, yaaba n pua saawali Jerusalemi po, ki laa ke mi yanduanma ye u po, yanduanma n ki ye yaa yogunu! Mini o Diedo, U Tienu n yedi yeni.›

U Tienu fu leni yaa puoba n tie n saawalipua-faadanba

¹⁷ Fini nisaalo biga, ŋan maadi leni a buolu puoba, yaaba n yedi ke bi pua saawali, ama ki nan naandi la bi pala nne. Ŋan maadi ki fu leni ba.

¹⁸ Ŋan yedi ba ke mini o Diedo n yedi: ‹Fala n baa yaa puoba n lu a biana, ki pilindi bi niba nibiana kuli, ki lu a cabilibinkaana bi niba kuli po, ki dia ki bua ki ñani bi miana, ki bua ki fie n buolu niba miana, ama ki nan bua ki yaa kubi bi yaa miana.

¹⁹ Yi fiagidi nni n niba kani, kelima orje waamu po leni mu dupenjenmu po, ki kpaani yaaba n ki bi pundi ki kpe, ki ŋaani yaaba n ki bi pundi ki yaa ye, ki boandi yeni n niba.

²⁰ Li tie lani yaa po yo ke mini o Diedo U Tienu maadi mi naa maama: N koani leni yin pilindi bi niba yaa biana yeni. Yin den dia leni ya bi niba miana. N baa dadi ki cie laa biana ki ñani a yi buadi po, ki faabi yin cuo yaaba miana.

²¹ N baa dadi ki toadi yi cabilibinkaana, ki faabi n niba yi nuu nni, ke bi kan go baa yi diagu nni. Lani, yi baa bandi ke n tie Li Miali Diedo.

²² Yi faama po, yi den wudi o niteginka gbanu, ba ke mini n ba ki bua ki biidi o pali. Yi paagidi bi nibiadiba pala, ki teni ke baa lebidi bi pala, ki baa ŋaa bi tuonbiadi ki yaa fo.

²³ Lanwani, yi kan go naani bonlekaala. Yi kan go bu baagu bi po. N baa faabi n niba yi nuu nni. Lani, yi baa bandi ke n tie Li Miali Diedo.› »