Esekieli 12 - U TIENU MAAMA TILI 2013

Esekieli pua saawali ke bi baa gedini ba ti yonbidi

¹ O Diedo den maadi nni yaa maama n tie ne:

² «Nisaalo biga, a ye nibuoyieko siiga, yaaba n pia i nuni ki naa nua, ki pia a tuba ki naa gba, kelima bi tie nibuoyieko.

³ Lani yaa po, bogini a tiadi nani ban cuo ki caani yua ti yonbidi u yensiinu yeni. Ŋan ña ke bikuli nua, nani ban cuo yua ti yonbidi ki caani o kaanto yeni. Daalinba li baa todi ba, ban bandi ke bi tie niyiekaaba buolu yo.

⁴ Ŋan ñani a yonbitiadi yeni u yensiinu bikuli nintuali, ki ña fini a ba mo ku yenjuagu ke bikuli nua, nani ban cuo ki caani yaaba ti yonbidi yeni.

⁵ Ŋan cibi u dogu bilinu li bonli, ki ña leni a tiadi lankani ke bikuli nua.

⁶ Ŋan bugi a tiadi a boacabili po ke bikuli nua, ki ña li biigili nni, ki pii a nunga, ki da le mi diema, kelima n bua ŋan tua sinankeene Isidayeli buolu po.»

⁷ N den tieni nani wan den puogi nni maama. N den ñani n yonbitiadi u yensiinu. Ku yenjuagu n den cibi u bilinu li bonli ki bugi n tiadi n boacabili po, ki ñani ke bikuli nua.

⁸ Lan den fii ki faa, o Diedo den maadi nni yaa maama n tie ne:

⁹ «Nisaalo biga, naani Isidayeli nibuoyieko yeni ki buali a, ŋan tiendi yaala?

¹⁰ Yedi ba daa, ke mini o Diedo U Tienu yedi: ‹O naa saawalo maadi Jerusalemi bado, Isidayeli yaaba leni yaaba n ye laa dogu nni kuli po yo.›

¹¹ Yedi ba daa, ke a tieni yeni, ki bua ki waani ba yaala n baa baa ba. Bi baa cuo ba yene ki gedini ti yonbidi.

¹² O bado yua n ye bi siiga, baa bugi o tiadi o boacabili po, ki ña u dogu nni li biigili nni. Bi baa cibi u bilinu li bonle ki ñani o likani. O baa pii o nunga, ke o nuni n da le mi diema.

¹³ N baa lugidi n taalu ki cuo o ki gedini Babilonni, kalide yaaba diema nni. O baa kpe lipo ki naa laa laa diema.

¹⁴ N baa yadi yaaba n guu o leni o toatieba kuli puoli, nintuali, nuganu leni nujienu po kuli, ki noadi n jugisiega ki ŋoadi bi puoli.

¹⁵ N yaa yadi ba i nilanbuoli nni leni mi dielanma nni yaa yogunu, bi baa bandi ke n tie Li Miali Diedo.

¹⁶ Ama n baa ŋaa bi siiga bi tianba ki jugisiega, mi koma leni u yianbiadipuodiko n ŋaa yaaba, ke ban ban togidi bi cagindi kuli, ban baa gedi yaa nilanbuoli siiga. Lani, bi baa bandi ke n tie Li Miali Diedo.»

¹⁷ O Diedo go den maadi nni yaa maama n tie ne:

¹⁸ «Nisaalo biga, a baa yaa di a jiema leni mi digibima, ki yaa ñu a ñima mo leni i yanbani.

¹⁹ Ŋan yedi mi diema niba daa: o Diedo U Tienu yedi: Jerusalemi yaaba, yaaba n sieni ki ye Isidayeli diema nni, baa yaa di bi jiema leni i yanbani, ki ñu bi ñima mo ti yanyagidi nni, kelima bi diema baa tua diegbengu, ki kan go yaa pia man den kpa pia yaala, kelima yaaba n ye mi niinni tugutongu po.

²⁰ Bi diema baa tua fanpienma, bi dogi yii den pia bi niba boncianla yeni mo n tua diegbendi. Lani, bi baa bandi ke n tie Li Miali Diedo.»

O Diedo n yedi yaala baa tieni

²¹ O Diedo den maadi nni yaa maama n tie ne:

²² «Nisaalo biga, yin pua yaa kpanjama Isidayeli diema nni, ki tua ke a dana pendi, ke bonlekaaliba ki tiendi yeni mo bua ki yedi be?

²³ Ŋan yedi ke o Diedo U Tienu yedi: n baa teni laa kpanjama n gbeni. Bi kan go pua laa kpanjama Isidayeli diema nni. Ŋan yedi ba ke a dana kpendi, ke laa bonlekaala kuli baa tieni.

²⁴ Bi kan go pua yi mi saawalifaama, ki yedi ke bi baa bonlekaaliba, bi ki boandi yi leni baaguba, Isidayeli buolu siiga.

²⁵ Li tie mini o Diedo n maadi, ki wangi yaala n baa tieni, li kan waagi yi baa le la, yinba u nibuoyieko yeni, yi kan kpe kaa laa la. N baa tieni min yedi yaala yeni.» Mini Li Miali Diedo n yedi yeni

²⁶ O Diedo go den maadi leni nni ki yedi:

²⁷ «Nisaalo biga, Isidayeli buolu tua, ke ŋan laadi yaa bonlekaala yeni kan tieni moala ka, ke ŋan pua yaa saawalo mo baa waagi ki daa tieni.

²⁸ Lani yaa po, ŋan yedi ba daa, ke mini o Diedo U Tienu yedi: min maadi yaa maama kuli, baa tua yaa maama n baa tieni ke li kan waagi. Mini o Diedo, U Tienu n yedi yeni.»