Esekieli 11 - U TIENU MAAMA TILI 2013

Bi baa jia Jerusalemi yaaba buudi

¹ O Diedo Fuoma den yua nni, ki gedini nni, o Diedo diegu buliñoabu yaabu n tiegi puoli po kani. N den laa piilie n jabimuu, ke bi ye bu buliñoabu kani. N den laa bi siiga badijabilie, Asuri bijua Yasania leni Benaya bijua Pelatia.

² O Diedo Fuoma den yedi nni: «Nisaalo biga, yaa jaba n tie ne, tie yaaba n pia yaa yantiali n ki ŋani, ki go tundi yaa tundi n ki ŋani u naa dogu nni.

³ Bi tua: ‹Li baa waagi ke ti daa go maa diedi. U dogu tie kpinbobili, ke timo tie ti nandi.›

⁴ Lani yaa po, fini nisaalo biga, fu leni ba, ki pua saawali.»

⁵ Lane, U Tienu Fuoma den jiidi n po, ki puogi nni min yedi yaa maama n tie ne: «O Diedo yedi: n bani yinba Isidayeli yaaba yin tua yaala leni yin maliti yaala yi pala nni.

⁶ Yi den kpa bi niba boncianla u naa dogu nni, ki gbieni i sani kuli leni bi tinkpiba.

⁷ Li tie lani yaa po ke o Diedo U Tienu yedi: yi tinkpiba, yin bili yaaba u dogu siiga yeni, n tie ti nandi, u dogu mo n tie li kpinbobili. Ama yinba wani, n baa ñani yi lienni.

⁸ Yi jie ki jugisiega ka? N nan baa soani yi po kane. Mini o Diedo, U Tienu n yedi yeni.

⁹ N baa teni yin ña u dogu yeni niinni, ki lu yi bi canba nuu nni, ki bu yi leni min den bili yi po yaa buudi.

¹⁰ N baa jia yi buudi Isidayeli diema nni, ki teni ki jugisiega n kpa yi. Lani, yi baa bandi ke n tie Li Miali Diedo.

¹¹ U dogu kan tua yi po kpinbobili, yimo kan tua yaa nandi n ye li niinni. Ama n baa jia yi buudi Isidayeli diema nni.

¹² Lani, yi baa bandi ke n tie Li Miali Diedo, yin yie mini yua yaa bali maama, kaa go kubi n ñoamabona yeni, kelima yi ŋoadi yaa nibuoli n lindi yi maasuagu.»

¹³ Min den pua laa saawalo yaa yogunu, Benaya bijua Pelatia den kpe. N den baa tiipo ki buudi ki yedi: «Ŋain, naani fini o Diedo U Tienu, a baa bolini Isidayeli buolu yuu n sieni kuli cain?»

U Tienu baa guani ki taani yaa niba n yadi

¹⁴ O Diedo den maadi nni yaa maama n tie ne:

¹⁵ «Nisaalo biga, bi tie a kpiiba, fini leni yaaba n taa buolu, ki tie Isidayeli buolu, Jerusalemi yaaba n maadi yaaba yaa po, ki tua: ‹Yin da nagini o Diedo kani, kelima o den puni tinbe yaa diema n ye ne ke mi tua ti piama.›

¹⁶ Lani, ŋan yedi ba daa: ‹Li Miali Diedo U Tienu yedi yaala n tie ne: Li yaa tie ba ke n den yadi yadi ba yaa diema n foagi leni ne niinni, ki go den kuani ba i nilanbuoli nni, n den tua bi po kaangagidiŋamu, ban den gedi ki ban ye yaa diema nni.

¹⁷ Ŋan go yedi ba daa: Li Miali Diedo U Tienu yedi yaala n tie ne: n baa taani yi, yin den ye yaa nilanbuoli siiga. N baa yini yi, yin den yadi yadi ki ye yaa dielanma nni, ki ñani yi lipo, ki go pa yi Isidayeli diema.›

¹⁸ Bi baa guani ki cua lankani, ki ñani ban den tieni yaa tuongunda leni yaa cagindi kuli.

¹⁹ N baa pa ba payenli. N baa kuani bi niinni yantiayenli, n baa ñani bi pali yaali n juagi nani li tanli yeni, ki pa ba yaa pali n dingi.

²⁰ Yeni, bi baa fidi ki ŋoadi n ñoamabona, ki yaa kubi n mabilikaama. Bi baa yaa tie n niba, nmo baa yaa tie bi Tienu.

²¹ Ama yaaba yaa pala n mani ti cagindi leni a tuongunda tienma po, n baa teni bi tuona n jiidi bi yula po. Mini o Diedo, U Tienu n yedi yeni.»

U Tienu kpiagidi ñani Jerusalemi

²² Selubanba yaaba n den yegi leni a kaanda, den tandi bi fiabi, ke Isidayeli Tienu kpiagidi ye hali tanpoli, ki yiini bi yula po.

²³ O Diedo kpiagidi den ñani u dogu siiga, ki ban jagini yaa juali n ye Jerusalemi puoli po.

²⁴ Li bonlekaala nni, U Tienu Fuoma go den yugini nni, ki guani nni Babilonni diema nni, ban den gedini yaaba ti yonbidi kani. Lanwani, min den baa yaa bonlekaala ke li yiini n po den bodi, ke mii go laa la.

²⁵ N den togidi ban den gedini yaaba ti yonbidi, o Diedo n den doagidi n po yaala kuli.