Esekieli 10 - U TIENU MAAMA TILI 2013

U Tienu guani ki doagidi o yuli Esekieli po

¹ N den yaadi ki diidi tanpoli ki laa ke yaala n kagini ki yiini selubanba yula po, naani leni safiri yaa tana. Li go den naani leni li bali kalikaanu.

² U Tienu den yedi yaa joa n la yaa tiadi n luni leni len gaali yeni: «Gedi yaa kaanda n ye selubanba yeni tiipo siiga nni, ki gbieni a nii leni a mukuanmoana, ya n ye selubanba siiga, ki gedi ki ban yadi a u dogu po.» N den laa o joa yeni ke o gedi ki taa a mukuanmoana ki ban caa.

³ O joa yeni n koa yaa yogunu U Tienu diegu nni, Selubanba den se jienu po, ku tawaligu mo den gbieni U Tienu diegu tugu nni kuli.

⁴ U Tienu kpiagidi den ñani selubanba kani, ki gedi U Tienu diegu buliñoabu po. Ku tawaligu yeni den gbieni U Tienu diegu, ke U Tienu kpiagidi yenma den yendi, ki gbieni ku luoli kuli.

⁵ Bi den gbadi selubanba fiabi fuugu hali li cancanli po, ke ku naani leni U Paaciamu Daano nialu, wan maadi yaa yogunu.

⁶ O Diedo den puogi yaa joa n laa yaa tiadi n luni leni len yeni, ki yedi o: «Taa u mu a kaanda yeni siiga, selubanba kani.» O joa yeni den kua ki sedi kaandiyenli kani.

⁷ Selubanba siiga yendo den tandi o nuu, ke u teli yaa mu n den kuu o yeni, ki ñani a mukuanmoana ki kuodi a, yaa joa n den la yaa tiadi n luni leni len yeni nuu nni ke o gedi.

⁸ Lanyogunu yaala n den naani leni u nisaalinuu den doagidi selubanba yeni fiabi tiipo.

⁹ N den laa ke kaandanaa ye selubanba kani, ke selubani kuli kani pia kaandiyenli, ke laa kaanda mo den ñuliti nani kilisoliti tana yeni.

¹⁰ A kaandinaada kuli den naani leni aya. Kaandili mo kuli den naaninni ke li taagi liyali nne.

¹¹ A yaa den cuoni, a den cuoni ganu, jienu, puoli leni nintuali ki suagi liiga ki kan jigi. A den cuoni ki ŋua selubanba nunjoma n tiegi naanpo, ki kan jigi.

¹² Selubanba gbanandi, bi puoli po, bi nii leni bi fiabi kuli den gbie leni i mukaabi. Li den tie yenma leni a kaandinaada yeni.

¹³ N den gbadi ke bi yini a kaanda yeni yaa yeli n tie ne: “Pinpinjoa”

¹⁴ Selubani kuli den pia nunmunaa, ki nunyenga tie selubani nunga, ki nunliega nisaalinunga, ki nuntaaga yangbannunga, ki nunnaaga mo jiebani nunga.

¹⁵ Selubanba yeni den yugi, ke li tie yenma leni min den laa yaa bonfuoda Kebari kpenu kani yeni.

¹⁶ Selubanba yaa den cuoni, a kaanda yeni mo yen cuoni leni ba, bi yaa den tandi bi fiabi ki baa yugi, a kaanda yeni moko yen yugi ki yegi leni ba.

¹⁷ Bi yaa den se, a kaanda moko yen se. Bi yaa yugi, a kaanda mo n yugi leni ba, kelima yaa yantiali n den ye a bonfuoda yeni niinni, n go den ye a kaanda yeni mo yaa niinni.

U Tienu kpiagidi ñani o diegu nni

¹⁸ U Tienu kpiagidi den ñani U Tienu diegu nni, ki ban yini selubanba yula po.

¹⁹ N den laa ke selubanba tandi bi fiabi ki yugi leni a kaanda yeni. Bi den gedi yaa buliñoabu n ye o Diedo diegu puoli po, ke Isidayeli Tienu kpiagidi den ye tanpoli ki yiini bi po.

²⁰ A bonfuoda yeni den tie min den ye Kebari kpenu kani, ki laa yaaba Isidayeli Tienu kpiagidi tiipo. Lani n den bandi ke a tie selubanba.

²¹ Yuakuli den pia nunmunaa leni fiabinaa, ke i nisaalinii mo ye bi fiabi tiipo.

²² Bi nunmu den naani leni min den laa yaa bonfuoda nunmu Kebari kpenu kani yeni. Li den tie bani cain, kelima bi den pia nannanyenli. Yuakuli den cuoni ki cuubi o liiga ki kan jigi.