Esayi 9 - U TIENU MAAMA TILI 2013

Mi yanduanma bado kpendi

¹ Yaa niba n cuoni li biigili nni, Laa mi yencianma. Mi yenma cua ki yendi, Yaaba n kaa li biigili diema nni.

² A teni ke u buolu yabidi, Ke a puni u niba li pamancianli. Bi pala mangi a nintuali nani U jetaagu pamanli, bi nani bi niba N yen mangidi bi pala Ti fagidi boagidima yogunu maama yeni.

³ Yeni, yaa tugili n bi maa bi po yeni, Yaa gbiamu n den pua bi buanu yeni, Ban n den mabindi ba leni yaa gbadunduli yeni, A pua ki mudi likuli nani Madiani daali yene.

⁴ Ban pili yaa cacaagu mi janjanma nni Leni ban fali yaa liadili mi soama nni, Bi baa lu la u mu nni, U mu n buoni likuli.

⁵ Diidi, bi mali ti po ki biga. Ti baa bonjaga, Li bali baa yaa maa o boacaba po. Bi baa yini o: “Yaa Tundika n ki pia lie, U Tienu u Paalu Daano, Baa, yua n ye hali yaa yogunu kuli Leni mi Yanduanma Bado.”

⁶ O bali baa yaa pugidi, Mi yanduanma mo baa yaa ye Yaa yogunu kuli. O baa kali Davidi bali kalikaanu, Ki diedi o diema. O baa pugini mi paalu Ki kubi ma leni mi teginma Leni yaa bujiali n tiegi, Moala leni yaa yogunu kuli. Li Miali Diedo U Paaciamu Kuli Daano n baa Tieni yeni o buacianma po.

O Diedo baa faligi Isidayeli yaaba

⁷ O Diedo fu leni Jakob puoliŋuani. Laa fuugu tie Isidayeli yaaba po yo.

⁸ Bi niba kuli baa gaa li laabaalo, Efrayimi leni Samari dogi yaaba, Yaaba n maadi leni ti japaadi Ki jigindi bi yula ki tua:

⁹ «I tankonkuomi ŋmadi ki baa, Ti baa maa leni a tankpiekaana. Bi pedi sikomori tiidi, Ama ti baa lebidi yi leni sediri tiidi.»

¹⁰ O Diedo baa teni bi yibalinba Letisini yaaba n paadi ba. O baa pa bi yibalinba ti jatiadi.

¹¹ Siiri yaaba baa yaa ye puoli po, Filisiti yaaba nintuali, Bi baa yaadi bi ñoana ki nali Isidayeli yaaba. Ba leni lani kuli o Diedo pali daa kuugi. O nuu da baa ki tiane ki baa waani ba fala.

¹² Isidayeli yaaba naa guani U Tienu yua n pua ba kani. Bi naa lingi Li Miali Diedo U Paaciamu Kuli Daano.

¹³ Lani n teni ke o Diedo baa jia Isidayeli diema nni, li yuli leni li juoli kuli. Dayenli lige ke o Diedo jia Bu kpakpalibu benu leni ku sabigu,

¹⁴ O nikpelo leni li koanbali n tie li yuli, O saawalipualo yua yaa yeli n ñani O faapuama po n tie li juoli.

¹⁵ Bi naa niba gobidikaaba baa biani ba. Yaaba n teni ke bi gobidi ba mo baa bodi cain.

¹⁶ Lani n teni ke o Diedo kan fidi Ki mangi o pali bi jawaaba po, Bi ki gbadi mi ninñima bi kpepuona Leni bi kpienbila po, Kelima bikuli tie tuongunda danba Leni nibiadiba. Bi ñoana mo ki pia maŋanma. Ba leni lani kuli o Diedo pali daa kuugi bi po, O nuu mo baa ki tiane ki baa waani ba fala.

¹⁷ Mi biadima co nani u mu yeni Ki buondi a kongoaba leni i konkoni, Li fuali leni li fatudi moko co.

¹⁸ Li Miali Diedo U Paaciamu Kuli Daano pabienkandikaali po, Teni ke mi diema kuli cuo fantama, Ke u mu mo dini bi niba. Oba kuli kan ŋaa o kpiilo mo.

¹⁹ Bi pe ganu leni jienu, Ba leni lani kuli mi koma mo naa gbeni. Yuakuli koani leni o lielo mo.

²⁰ Manase koani leni Efrayimi, Efrayimi mo koani leni Manase. Bikuli taani ki baa Juda. Ba leni lani kuli o Diedo pali daa kuugi bi po, O nuu mo baa ki tiani ki baa waani ba fala.